Luk 14 - DAWAN BÎLA AISKA

Jisas mita waitna kum wîna puskan ba rakisa

¹ Ris yua kum ra, Jisas ba parisi wihtka kum watla ra wan plun piaia, bara parisi wala nani lika aihwaki kaiki kata.

² Bahara sin witin mawanra, waitna wîna tara puskan sikniska bri kum bâra kan.

³ Bara Jisas makabi walan Lâ Smasmalkra nani ra bara parisi nani ra sin: —¿Aitani kabia ki ris yua ra upla siknis rakaia, apia kaka sip apia sa ki?

⁴ Sakuna witin nani sut sâp kan. Bamna Jisas sikniskira ba brih rakan, bara mahka wabia wisata.

⁵ Ningkara, witin parisi nani ra win: —¿Ya man nani tilamra bâra sa ki, witin ai luhpia, apia kaka ai bîpka kra pakni kum ra dimi wabia kaka, baha pali piua ra trai muni sâkbia apia, ris yua kabia sin?

⁶ Sakuna baha nani mita pana diara kumi sin sip aisaras kata.

Marit pata ra paiwan nani ba

⁷ Jisas kaikan, paiwan uplika nani plis kau pain ba pliki iwaia brin dauki kan, bamna witin baha nani ra naha kupia kraukanka na yan:

⁸ —Ani piua upla kum marit pata liliaka ra mai paiwbia kaka, tâ iwaika ra iwpara, kan bâra ban kra upla kum man wal kau tara kulkan ba balbia ba ra,

⁹ man nani wâlsut mai paiwan uplika ba bal, mai wibia: ‘Naha wala na ra iwaika na yas iwbia.’ Bara man swiram pali taki, kulkanka kau mâyara ba iwaika ra wih iwma.

¹⁰ Baku bamna, mai paiwi banhbia ba ra, man iwaika mâyara ba kat wih iws; bamna mai paiwan uplika ba bal, mai wibia: ‘Pâna, naha iwaika na swis bara iwaika kau pain ba ra wih iws.’ Baku mika baha nani man wal tibil ra plun pi ba wina mayunra brima.

¹¹ Kan ya tara kaia lukbia ba, mâyara tawbia, bara ya mâyara ba, tara kulkan kabia.

¹² Bara Jisas parisi plun piaia paiwan ba ra tawi, naku win: —Plun kum, apia kaka tutni pata kum daukma ba ra, man paiwpara uplikam nani, muihkam nani, tamya nani, upla yuyakira nani man wamtla lamara iwi ba sin apia; kan witin nani mita kli man ra mai paiwbia, bara baku man mamna ba pat brima.

¹³ Baku bamna, plun tara daukma ba ra, upla umpira nani ba paiws, mina dakwan nani ba, skahwa nani bara blain nani ba sin;

¹⁴ baku bamna yamni pali kama, kan witin nani sip mamna maikbia apia; bamna upla kasakkira nani pruan wina bubia ba ra, mamna bri kama.

Tutni pata tara maprika lilka ba

¹⁵ Naha walan ba ra, baha nani tibil ra iwi kan ba wina kum mita Jisas ra win: —¡Lilia pali sa ani uplika Gâd king aimaki tasbaya ra brit pibia ba!

¹⁶ Bara Jisas bila: —Waitna kum plun tara kum daukan, bara blikan wan upla manis paiwaia.

¹⁷ Tutni pata tara ba ridi kan, ai albika blikan paiwan uplika nani ra wiaia: ‘Man nani bal, diara sut ridi sa bamna.’

¹⁸ Sakuna sut ba sip apia win. Pas ba bila: ‘Bisiura pali tasba kum atkri, bara yang wih kaikaia sna; bamna pliskam yang sip apia wis.’

¹⁹ Wala bila: ‘Yang wark bîpka matsip atkri, bara baha trai kaikaia sna, bamna pliskam sip apia wis.’

²⁰ Bara wala bila: ‘Bisiura pali marit takri, baha mita yang sip waras.’

²¹ Alba ba kli tawi bal, ai dawanka ra diara nani ba sut wisata. Dawanka ba kupia baiwan, bara ai albika ra wisata: ‘Aihni taki was yabal nani ra, tawan yabal dimi nani ra sin, bara nahara paiwi bri bal upla umpira nani, mina dakwan nani, blain nani bara skahwa nani sin.’

²² Naika kan, alba ba bila: ‘Dawan, man ai wiram ba kat pat daukri, sakuna kau plis bâra sa.’

²³ Bara dawanka ba ai albika ra win: ‘Taki was kuntri yabalka nani ra, yabal sirpi nani ra sin, bara baha nani ra taibi muns bal dimaia, yang waitla na banhki kaia dukiara.

²⁴ Bara yang mai wisni, tâura paiwri uplika nani ba kumi sin yang pati ba pih kaikbia apia.’

Jisas nina blikaia wina wan takaski ba

²⁵ Upla ailal Jisas nina bliki kan; bara witin tawi, baha nani ra wisata:

²⁶ “Upla kumi yang ra aula, sakuna witin ai aisika, ai yaptika, ai maya, ai luhpia nani, ai muihni nani, ai lakra nani bara ai rayaka ba sin bahki kulkras kaka, witin sip yang disaipilki kabia apia.

²⁷ Ya ai dusa prihni brih twilki, nini blikras kaka, witin sin disaipilki kaia sip apia sa.

²⁸ Man nani tilam wina upla kum tawer kum paskaia lukbia kaka, witin iwi dîa lalah tikaia ba pas kulki kaikuya, ai mihta ra dîa bri ba wal aitani takbia sapa.

²⁹ Apia kaka, witin playa nani bapan ningkara sip paski sakras sa kaka, upla witin ra kaikbia ba sut ai lawaska kikbia,

³⁰ bara naku wibia: ‘Naha waitnika utla kum mâkaia munan, sakuna sip paski sakras.’

³¹ Baku sin, king kumi king wala mapara war aiklabaia sa kaka, witin mahka iwi luki kaikuya suldiar 10,000 ni sip kabia sapa wala 20,000 brih aula ba mapara wih aiklabaia.

³² Witin sip apia kaka, king wala ba kau laihura sa ba ra, upla nani bliki makabuya wal kupia kumi takaia.

³³ Baku sin, ya man nani tilam wina witin dîa bri ba sut swiras kaka, yang disaipilki kaia sip apia sa.

Sâl ai damnika tikbia kaka

³⁴ “Saúl ba pain sika; sakuna ai damnika ba tikbia kaka, ¿nahki baha ba kli sâl daukaia sip kabia ki?

³⁵ Tasba mapa ra bara dipasta ba mapa ra sin saura sa, bamna upla mita baha lulkuya kli yus munaia apia dukiara. Kiamam brisma nani ba, wali bas.”