Luk 13 - DAWAN BÎLA AISKA

Saurka wina wan kupia lakaia yamnika ba

¹ Baha sim piua ra, upla tila nani Jisas ra bal maisa pakan, nahki Pailat mita Galili wina uplika nani ra alki iki, tâlia ba sakripais daukan daiwra nani tâlia wal miks munan.

² Bara Jisas mita win: “¿Man nani lukisma, Galili tasbaya tilara baha waitnika nani baman upla saura banhwi kan ba mita baku takan sa?

³ Yang mai wisni, apia; man nani sin saurkam nani wina Gâd ra kupiam lakras sma kaka, sut tanis tiwma.

⁴ Apia kaka Siloé tawerka kauhi upla 18 ikan ba, ¿man nani lukisma baha uplika nani ba kau upla saura nani kata Jerusalem tawanka tilara?

⁵ Yang mai wisni, apia; man nani saurkam wina Gâd ra kupiam lakras kaka, sim baku tanis tiwma.”

Kwah damni dusa mâ âpu ba

⁶ Jisas naha maprika sturka aisin: “Waitna kum ai tasbaya ra kwah damni dusa kum mangki bri kata, bara witin wih kaikan mâ bri sapa, sakuna diara kumi sin sakras kan.

⁷ Bara tasbaya main kaiki uplika ra win: ‘Kaiks, pat mani yumhpa yang taki balisna naha dusa ra kwah damni mâ pliki, bara sip mâ sakras sna. Bamna klaks; ¿dîa muni tasba na bahki yus munisa ki?’

⁸ Sakuna tasbaya main kakaira ba pana wisata: ‘Dawan, kau naha mani pan ban swis, bara yang tasbaya ba baiki muni, dipasta sin playa ra yakabamna.

⁹ Baha wal ban kra ai mâ sâkbia; baku apia kaka, man baha ba klaks.’

Mairin kum pahpaya kruswan sikniska bri kan ba, Jisas mita ris yua ra rakisa

¹⁰ Ris yua kum ra, Jisas Ju nani priaska watla ra upla smalki kata.

¹¹ Bahara mairin kum kata pat 18 mani siknis bri kan; pirit saura kum mita mairka pahpaya ba kruskan, bara witin sip wapni buras kata.

¹² Jisas mairin ba kaikan bara wini naku wisata: —Mairin, man pat pri sma sikniskam ba wina.

¹³ Bara ai mihta nani mairka ba purara kahban, bara baha sim piua ra mairin ba wapni buan, mahka sin Gâd ra mayunan.

¹⁴ Sakuna Ju nani priaska watla wihtka ba ai kupia baikan, ris yua ra Jisas mita mairin ba rakan bamna; bara upla nani ra win: —Yu 6 bâra sa upla nani wark takaia; baha piua nani ra balaia sma rawaia want kaka, sakuna ris yua ra lika apia.

¹⁵ Bara Dawan bila: —Kuninkira nani, ¿man nani ris yua ra bîpkam, birikukam sapa lanhki lî dakakaia brih waras sma ki?

¹⁶ Bara naha mairka na lika Ebraham kiamka, kuna Sitan mita naha sikniska wal priski bri kan 18 mani; ¿bara ris yua ra ai sikniska ba wina lanhkaia sip apia kan ki?

¹⁷ Jisas naha aisin ba ra, ai waihla nani sut ai swira takan; sakuna upla sut lika lilia pali kata, Jisas diara tara pali dauki kan ai nakra ni kaikan kan ba mita.

Mostard mâ maprika lilka ba

¹⁸ Jisas naku sin win: “¿Gâd King aimaki lâka ba dîa wal talia sa, yang dîa wal sin prakamna ki?

¹⁹ Bamna mostard mâ kumi wal baku sa, waitna kum ai nasla ra mangkan ba, bara baha ba pâwi ban dus tara kum takuya, bara tnawira nani ba ai tnawa nani ra ai watla mâkisa.”

Îs maprika lilka ba

²⁰ Jisas naha sin aisin: “¿Gâd king aimaki lâka ba dîa wal prakamna ki?

²¹ Baha lika îs wal baku sa mairin kum plawar bîk kum ra mangkan ba ra, krauhni aiska ba puskisa.”

Dur bîla sirpi ba

²² Jisas ban impaki wan Jerusalem ra bara witin lika tawan tara nani bara tawan sirpi nani bâk dimi upla smalki auya kata.

²³ Bara upla kum mita makabi walan: —Dawan, ¿upla kulki baman swaki sakan sa ki? Witin bila:

²⁴ —Man nani trai muni, dur bîla sirpi bâk mahka dims; kan yang mai wisni, upla manis dimaia want kabia, sakuna sip dimbia apia.

²⁵ Utla dawanka ba dur ba prakbia ba ra, man nani latara banhwi kama ba, dur ra kingbi, wima: ‘Dawan, yang nani ra sin dur sâks.’ Sakuna witin mai wibia: ‘Man nani ba ani wina sma sapa yang mai kaikras.’

²⁶ Bara man nani ban aisi, wima: ‘Yang nani sika man wal plun piri bara diara diri, bara man sin wan yabalka nani ra upla smalkram.’

²⁷ Sakuna witin pana mai wibia: ‘Pat mai wîri, man nani ba ani wina sma sapa yang mai kaikras. ¡Yang maiwan wina taki was, man nani saurakira nani!’

²⁸ Baha piua ra Ebraham, Aisak, Jekob bara prapit nani sut Gâd king aimaki tasbaya ra kabia ba kaikma ba ra, sakuna man nani lika latara mai lulkan kabia, bara bahara ini ban man kama, nampa nani sin arkbi kama.

²⁹ Kan upla nani balbia lalma wina, muna wina, yahbra wina bara waupasa wina sin, Gâd king aimaki tasbaya ra iwi plun piaia dukiara.

³⁰ Bamna naiwa ninara uplika tila nani ba tâura tawbia, bara kum kum naiwa tâura yaba, ninara tawan kabia.

Jisas Jerusalem pura mata inan ba

³¹ Baha sim piua, parisi tila nani Jisas ra wih, naku win: —Man naha wina mahka was, kan Herod ba mai ikaia lukisa.

³² Kuna pana witin mita wisata: —Man nani baha sikiski ba ra wih wis: ‘Kaiks naiwa na yauhka pirit saura nani ba kangbi sakuna, sikniskira nani sin rakuna, bara yahwanka tnata alkamna.’

³³ Sakuna yang ban impaki kaia sna naiwa, yauhka bara yahwanka sin, kan aitani apia sa prapit kum ba Jerusalem wina plis wala ra ikan kaia.

³⁴ “¡Jerusalem, Jerusalem, man mita Gâd prapitka nani ikisma, bara Gâd mita ai bîla twatwilkra nani blikan ba ra walpa ni sabisma! ¡Aima an yang bui man luhpiam nani ba asla brin ai daukan, sim kalila mairin ai luhpia nani ai tnawa mununhtara bri ba baku, sakuna man mita apia wiram!

³⁵ Bamna kaiki bas, wamtla ba bîla baman swin kabia; bara man nani ra mai wisni, kli ai kaikma apia, naku aisama piua ba kat: ‘¡Yamni pali sa witinka Dawan nina mâki aula ba!’