Luk 12 - DAWAN BÎLA AISKA

Kunin lâka mapara Jisas smalkisa

¹ Baha piua ra upla tausin ailal bal asla taki kan, bara ban upla ailal mita pana pana taibi kan. Baku bamna, Jisas ai disaipilka nani ra naku smalki win: “Man nani aman kaiki bas parisi nani kuninka ba dukiara, kan baha ba îs baku sa.

² Diara pura bikan ba âpu sa sip param sakras kabia ba; diara yukukan ba sin âpu, upla kaikras kabia ba.

³ Baku bamna, dîa dîa tihmia ra aisaram ba, kakna ingnika ra walan kabia; bara utla ra dur praki dîa dîa yukuwi aisaram ba, utla nani bahna wina karna wini aisin kabia.

Yaura sibrin lukaia ba

⁴ “Man nani, yang upliki nani sma ba, naha mai wisni: Sibrin lukpara baha nani wînam tara ikbia, sakuna ningkara diara wala kumi sin sip mai munras ba.

⁵ Sakuna yang mai wimna yaura lika sibrin briaia ba: Wînam tara ikan ba ningkara sulkam ba sin hil pauta ra lulkaia karnika bri ba ra lika, sibrin luks. Âu, witin ra sibrin luki bas.

⁶ “¿Tnawira lupia matsip ba lalah mâ sirpi wâl mana atkisa apia? Sakuna Gâd mita baha nani kumi dukiara sin ai âuya tikras sa.

⁷ Bamna Gâd mita man nani lamla ra tâwa mina bani ba sut kulki brisa. Baku bamna, man nani si bripara, kan man nani ba kau mana tara sma tnawira nani ba wal.

Upla nani mawanra Jisas ra kakaira nani ba

⁸ “Yang bui man nani ra mai wisna, ani uplika mita upla wala nani mawanra yang ra lukisa dukiara param aisabia ba, Upla Luhpia Waitna mita Gâd insalka nani mawanra witin ra lukisna dukiara param aisamna.

⁹ Sakuna ani uplika mita upla wala nani mawanra ai kulkras wisi aisi ba, yang sin Gâd insalka nani mawanra witin ra kulkras sna wimna.

¹⁰ “Ani uplika mita Upla Luhpia Waitna mapara aisabia kaka, witin saurka ba ban swih tikan kabia; sakuna ya Spirit Holikira ba mapara bîla saura nani aisabia kaka, sip baha saurka ba swih tikan kabia apia.

¹¹ “Ju nani priaska watla nani ra mai priski brih wabia kaka, wihta nani kra, apia kaka pura karnika alki nani mawanra sin, trabil taki luki banhpara dîa pana wima, apia kaka dîa aisama ba,

¹² kan mahka aisaia kama ba ra, Spirit Holikira mita mai smalkbia dîa wiaia kama ba.”

Yuyaka nani trabilka ba

¹³ Upla nani tila ba wina kum Jisas ra naku win: —Smasmalkra, muihki ra wis, aisiki dukia kan ba wina dîa aikaia kan ba aikbia.

¹⁴ Sakuna Jisas bila: —Waitna, ¿ya mita man nani tilamra wihta, apia kaka diara yuaia ai mangkan ki?

¹⁵ Jisas naha sin wisata: —Upla diara bri ba tumisma ba aman kaiki damra wali bas man nani, kan upla rayaka ba lika diara ailal bri ba mita raya apia.

¹⁶ Bamna Jisas naha maprika sturka na baha nani ra wisata: “Waitna yuyakira kum bâra kan, ai tasbaya nani ba plun mâ manis pali yaban.

¹⁷ Waitnika ba mahka ai kupia wal naku aisin: ‘¿Yang dîa daukamna? Pati mâ nani auhbaia pliska yang âpu.’

¹⁸ Bamna naku lukan: ‘Yang pat kaikisna dîa daukamna ba. Pati mâ nani auhbaia watla nani ba slingbamna bara watla nani kau tara daukamna, bara bahara pati mâ nani bara dîa dîa brisna ba sut auhbamna.

¹⁹ Baku bamna, yang kupi ra wimna: Upliki, diara manis pali suni swiram sa mani ailal praiska; bamna ris pain bris, plun pis, diara dis bara liliam bas.’

²⁰ Sakuna Gâd mita win: ‘Waitna sinskas, naha sim tihmika pruma; ¿bara diara suni swiram ba ya dukia kabia ki?’

²¹ Upla ra baku takisa, ya ai wîna dukiara baman luki diara suni ba ra, sakuna Gâd mawanra diara âpu pali ba.”

Gâd ai luhpia nani ba main kaikisa

²² Baha ningkara, Jisas ai disaipilka nani ra win: “Bamna yang bui man nani ra mai wisna: Trabil taki lukpara raya kaia sma dukiara dîa pima, dîa kwalka dimma.

²³ Rayaka ba kau mana tara sa plun ba wal, bara wîna tara ba kwala purkara sa.

²⁴ Kuskuspiram nani ba dukiara luki kaiks, witin nani lika plun mangkras, krikras, ai pata mâ auhbaia rumka, apia kaka watla sin âpu, ban sakuna baha nani ba Gâd mita plun dakakisa. ¡Bamna man nani ba lika tnawira nani purkara kau mana tara sma!

²⁵ ¿Ya man nani tilamra trabil taki luki ba mita witin yar bakriki pan pâwbia?

²⁶ Diara wiria lupia ba sin sip daukras kaka, ¿dîa muni diara wala nani ba dukiara trabil taki lukisma?

²⁷ “Kaiks tangni nani ba nahki pâwi ba, witin nani wark takras bara ai prâka sin sipras, ban sakuna man nani ra mai wisna, king Salaman ai aiskahkaia dukia nani sut bri kan ba ni sip baha nani wal baku aiskahkras kata.

²⁸ Bamna inma naiwa bâra sa yauhka lika pauta ra lulkuya ba ra Gâd mita baku skahkisa kaka, ¡witin lika man nani ba kau kan mapara mai skahkbia, sip kasak lukras uplika nani sma ba!

²⁹ Baku bamna, man nani sarikira taukpara, dîa piaia bara dîa diaia ba pliki.

³⁰ Kan tasba uplika nani lika naha diara nani sut na nina bliki taukisa, sakuna man nani lika Aisa kum brisma, bara witin pain kaikisa naha diara nani sut want sma ba.

³¹ Kau yamni sa, man nani bui Gâd king aimaki lâka ba plikma, bamna naha diara nani sut na brima.

Kasbrika purara ba yuyaka

³² “Sîpki nani, si bripara; man nani ba wiria sma, sakuna Aisa ba mita pain lukisa king lâka ba maikaia.

³³ Dîa brisma ba sut wauhi atks, bara umpira nani ra diara yas. Lalahkam watla nani dauki bris sip almuk takras ba, bara kasbrika purara yuyakam sip luras ban kaia ra ba suni bris, bahara sika âimplikra sip dimras, bara yula nani sin sip sauhkras ba.

³⁴ Bamna anira yuyakam bâra sa kaka, kupiam sin bâra kabia.

Ridi pali kaia

³⁵ “Man nani ridi bas, lampkam nani sin klauhi kabia.

³⁶ Man nani lika sim alba nani ai dawanka marit pata wina kli balaia kan bîla kaiki baku bas, bara ai durka ra bal kingbuya ba ra pat pali wih sâkbia.

³⁷ Lilia pali sa baha alba nani yapras raya ban ai dawanka mita bal sakuya ba; yang mai wisna, witin ba ai maisa pain wilki, yaka witin nani ba tibil ra iwbia plun piaia.

³⁸ Ban kra balbia tihmia wâl bakriki, apia kaka yu baiwan ra sapa, sakuna yamni pali sa baha albika nani yapras raya ban sâkbia ba.

³⁹ Bamna naha kaiki banhwi bas: Utla kum dawanka dîa piua âimplikra balaia ba kaikbia kaka, swika ai watla ra dimi implikbia apia.

⁴⁰ Man nani sin ridi bas, kan lukras kaprika piua ra Upla Luhpia Waitna ba balbia.”

Alba yamni alba saura ba wal

⁴¹ Bamna Pita mita makabi walan: —Dawan, ¿man naha maprika sturka aisaram na yang nani dukira baman sa, apia kaka, upla sut dukiara sa ki?

⁴² Pana Dawan bila: “Bamna, ¿ya ba alba kasak sins aitani sin kat bri ba? Baha ba lika ai dawanka mita ai watla dukia aiska ba ai mihta ra mangkuya ba, suliar nani utla ra ba ra piua kat plun yabi kaia dukiara.

⁴³ Lilia pali sa baha albika ai dawanka balbia ba ra, dîa daukaia ai mihta ra swin ba kat dauki kaka sâkbia ba.

⁴⁴ Kasak pali mai wisna, dawanka ba mita dîa dîa witin bri ba sut wihtka mangkbia.

⁴⁵ Sakuna baha albika ba lukbia kaka ai dawanka balaia kata ba kau takaskisa, bara witin mahka alba waitna nani bara alba mairin nani ba pruki rausauhkuya, bara plun pih, diara dih, bla sin takbia kaka,

⁴⁶ alba dawanka ba balbia bîla kaikras ba piua ra, bara ai dahra walras kabia awarka ra sin; bamna pât tara pali witinka ra yabia, bara lukras kira nani wal baku pât ra lulkan kabia.

⁴⁷ “Ani albika ai dawanka dîa want ba pain kaikras, kuna ridi taki bîla kat wali daukras ba, witin ra kasak prukan kabia.

⁴⁸ Sakuna ani albika ai dawanka dîa brin dauki ba tânka briras, bara witin diara nani daukan ba tâwan prukaia aitani kabia, sakuna wiria baman klala yan kabia. Ani uplika ra uya yan ba, baku sin witin wina kasak makaban kabia; bara ani uplika mihta ra diara kasak mangkan ba, witin wina sin kau diara ailal makaban kabia.

Jisas ba aihka aihka takaia lâka ba

⁴⁹ “Naha tasba ra yarka pauta klauhbia dukiara balri; ¡bara pat pauta klauhi kaka kaikan pali ai daukisa!

⁵⁰ Pât wahwanka saura bâk luaisna ba ra, nahki pât wahwisna ba lika tnata kat brih wabia.

⁵¹ ¿Man nani kra lukisma, yang balri na tasba ra kupia kumi lâka bri balaia? Yang mai wisna, apia, sakuna aihka aihka takaia lâka lika bri balri.

⁵² Bamna naiwa wina, utla kumi ra upla matsip iwi ba, aihka aihka dakwi takbia, yumhpa mita wâl ba mapara, bara wâl ba mita yumhpa ba mapara.

⁵³ Aisa ba ai luhpia mapara kabia, bara pana luhpia ba mita ai aisa mapara; yapti ba ai luhpia mairin mapara, bara luhpia mairin mita ai yapti mapara; dapnika mairin mita ai mula yapti mapara, bara mula yapti mita ai dapna mairin mapara.”

Piua nani sainka nani ba

⁵⁴ Jisas sin upla nani ra win: “Man nani muna ra kasbrika siksa sunan kaikuma ba ra, man nani wisma lî auhaia sa, bara baku takisa.

⁵⁵ Bara waupasa wina pâsa krawi ba ra, man nani wisma lapta karna kabia, bara baku takisa.

⁵⁶ ¡Kuninkira nani! Man nani kasbrika bara tasba mawan tânka pliki sakaia lan pali sma, ¿bamna nahki kan man nani naha piua nani tânka ba sakaia sip apia sma?

Trai kaiks waihlam wal kupia kumi takaia

⁵⁷ “¿Dîa kan man nani mânkam lâ kasak ba dukiara aisaras?

⁵⁸ Upla kum man wal lâ dimaia wisi wihta ra auma kaka, trai muns yabal ra wal mahka wapni takaia, wihta ra mai brih wabiara sîa; kan wihta ba mita suldiar mihta ra mai mangkbia, bara suldiar ba mita silak ra mai mangkbia.

⁵⁹ Yang mai wisna, man baha wina takma apia, dîa lupia brisma ba ni ba aibapma kat.”