Luk 1 - DAWAN BÎLA AISKA

Tâura bîla nani ulbanka

^1-3 Kulkanka tara brisma Teófilo: Upla ailal wilin takan diara nani wan tilara takan ba sturka aitani kat ulbaia. Baha nani ulban, tâ pali piua wina upla nani ai nakra ni kaiki banhwan ba bara sturi yamni wan smalkan ba dukiara. Bamna yang sin kulkanka tara pali ni, tâ pali wina naha diara nani na tânka pain pliki kaikri, bara aitani lukisna naha diara takan na man ra ulbaia,

⁴ baku mika diara kasak mai smalkan ba tânka aiska pain kaikma.

Insal kum Jan Tatahbra aisubi takbia dukiara maisa pakan ba

⁵ Herod Judia kingka aimaki kan ba ra, prîs kum bâra kan nina Sakaraya, witinka Abías kiamka kata. Ai maya nina lika Elisabet, witin sin prîs Eran kiamka kan.

⁶ Witin nani wâlsut Gâd mawanra upla kasakkira kan, Dawan lâka nani bara ai adarka nani sut ba bîla wali dauki kan; baha mita upla kumi sin witin nani ra diara aihka kumi sin sip sakras kan.

⁷ Witin nani luhpa âpu kan, Elisabet lika biarapara kan bamna; bara baha purkara, witin wâlsut pat almuk pali takan kata.

⁸ Yu kumi, Sakaraya daknika ba, Gâd mawanra prîs warkka daukaia piua balan kan,

⁹ prîs nani natka kan ba baku. Baku kan ba ra, lat lulkan ba ra, Sakaraya ba sakan kan Dawan tempelka holikira pliska ra dimi, sîka kîa yamni ba angkaia.

¹⁰ Sîka kîa yamni ba angki kan ba ra, upla sut latara ai pura suni kata.

¹¹ Dawan insalka kumi Sakaraya ra latan takan, bara baha altarka aihkika tani ra bûi kan.

¹² Sakaraya insal ba kaikan, bara dîa daukaia sapa tânka briras kan, bara sirang pali iwan kan.

¹³ Sakuna insal ba bila: —Si bripara, Sakaraya. Gâd mita puram sunra ba walan, bamna mayam Elisabet luhpa waitna kum baikbia, bara ai nina ba Jan mâkma.

¹⁴ Aisubi takbia ba dukiara man liliam tara bara âmyapah kama, bara upla manis sin lilia pali kabia.

¹⁵ Luhpiam waitna ba lika Dawan mawanra tara pali kabia. Witin wain dibia apia, laya saura sâtka kumi sin apia, bara witin kau aisubi takras piua ba wina, Spirit Holikira ni aibanhwan kabia.

¹⁶ Witin mita Israel luhpia nani manis kli ai Dawan Gâdka ra laki bri balbia.

¹⁷ Witin lika Dawan kainara wabia, bara witin ai spiritka ra, ai karnika ra sin Ilayas kata ba baku kabia. Aisa nani ai luhpia nani wal yaka kupia kumi takbia, bara kiama karnira nani ba yaka bîla wali dadaukra takbia. Baku mika, witin mita upla nani ridi daukbia Dawan briaia dukiara.

¹⁸ Sakaraya mita insalka ra makabi walan: —¿Nahki kaikamna naha na kasak baku kabia sa? Kan yang mayi wal lika pat almuk pali takri sa.

¹⁹ Insal ba pana witin ra win: —Yang lika Gabriel, Gâd dukia dadaukra ba; witin mita ai blikan naha sturka man ra maisam paki mai wiaia.

²⁰ Sakuna diara mai wîri ba kat man kasak lukras kapram bamna, naiwa wina bîlas kama, mai wîri na takbia ai piua aimakbia ba kat.

²¹ Baku kan ba ra, upla nani latara Sakaraya bîla kaiki kan ba aihka naku lukan: “¿Nahki kan witin ban piua wihka tempel ra takaskisa?”

²² Baku bamna, Sakaraya bal takan, sakuna upla nani ra sip diara aisaras, ai mihta baman wauhi sain baman dauki kan. Bara baha nani kaikan witin ba tempel holi pali pliska ra diara aihka kum kaikan.

²³ Bamna Sakaraya tempel ra wark daukaia piua nani tnata alkan ba ra, mahka ai watla ra wan.

²⁴ Piu wiria ningkara, ai maya Elisabet ba kwihra tiwan, bara witin kati matsip lata takras yukuwi kan. Baha dukiara sin ai kupia ra naku luki kan:

²⁵ “Dawan mita nanara naha diara nani yang ra daukan sa, upla kli bahki ai kulkbia apia dukiara.”

Insal kum Jisas aisubi takbia dukiara maisa pakisa

²⁶ Kati 6 alkan ba ra, Gâd mita insal Gabriel ba saki blikan, Galili tawanka kumi nina Nasaret wi ba ra,

²⁷ mairin tiara kumi ra, nina Meri. Witin ba sin waitna kumi Debit kiamka wina nina Josep wal marit takaia lâ daukan kata.

²⁸ Witin bâra kan ba pliska ra insal ba bal dimi, naku win: —¡Lamkula maikisna, mairin yamnikira sma ba! Dawan ba man wal sa.

²⁹ Sakuna Meri insal ba kaikan ba ra, ai aisinka nani ba dukiara tâ iwan, bara ai kupia wal aisi kan, nahki baku pali witin ra ai lakula daukan ba.

³⁰ Bara insal ba bila: —Si bripara, Meri, Gâd mita man ra yamni pali mai kaikan sa bamna.

³¹ Man kwihra tiwma, bara luhpa waitna kumi brima, ai nina Jisas mâkma.

³² Witin lika tara pali kabia; Gâd Laih Purara iwi ba Luhpia mâkan kabia, bara Dawan Gâd ai damika Debit baku king mangkbia,

³³ Israel nisanka kingka ban kaia ra aimaki kabia, bara ai kingka lâka ba sin tnata âpu kabia.

³⁴ Bara Meri insal ra makabi walan: —¿Nahki naha diara na takbia, kan yang kau mayi âpu sna na?

³⁵ Pana insal ba bila: —Spirit Holikira ba man puramra balbia, bara Gâd Laih Purara ba karnika kasbrika baku mamdiskbia. Baha mita, man wina tukta holikira aisubi takaia ba lika Gâd Luhpia mâkan kabia.

³⁶ Bara man tamya mairin Elisabet sin luhpa waitna kum baikbia, witin almuk pali sa kuna. Upla biarapara wi kata ba, kaiks nanara pat kwihra tiwan kati 6 brisa.

³⁷ Gâd mapara sip apia dukia âpu sa.

³⁸ Bara Meri bila: —Yang na Gâd napakanka mairin sni; bamna man ai wiram ba kat Gâd bui yang ra daukbia. Naha ningkara, insal ba mahka wan.

Meri Elisabet kaikaia wan ba

³⁹ Baha piua nani ra, Meri lika mahka aihni pali impakan Judia ilka nani ra, tawan kumi ra.

⁴⁰ Bara Sakaraya watla ra diman, bara Elisabet ra lakula win.

⁴¹ Baku mika, Elisabet Meri ai lakula nan daukan ba ra, ai biara ra ai luhpia ba pulan, witin sin Spirit Holikira ni aibanhwan.

⁴² Bamna ai bîla baikra karna aisi, naku win: —¡Gâd yamni pali mai munan sa mairin wala nani sut tilara, man luhpiam biamra ra brisma ba ra sin!

⁴³ ¿Yang na ya kapri kan, Dawanki yaptika ai kaikaia balan na?

⁴⁴ Kan lamkula nan walri wal baku, luhpi biaira ra lilia pâlan.

⁴⁵ ¡Liliam bas, man kasak lukram ba, kan Dawan bui man ra dîa mai win ba kasak kat daukbia!

⁴⁶ Baku kan ba ra, Meri bila: “Yang sulki bui Dawan ra mayunisa,

⁴⁷ yang kupi sin lilia sa Gâdki Sasakra ra.

⁴⁸ Kan Gâd mita ai albika mairin dukiara lukan bamna, bara nanara wina piu sut ra witin nani ai wibia: liliam bas.

⁴⁹ Kan Gâd, karnika sut bri ba mita diara tara nani yang ra daukan; ¡ai nina sin holikira sa!

⁵⁰ Bara piu bani baha nani witin ra sibrin luki nani ra umpira kaiki kabia.

⁵¹ Ai karnika sut wal daukan, prautkira nani lukanka ba âpu daukan.

⁵² King nani ra ai iwaika wina yaban mâyara iwan bara bawikira nani ba lika purara bukan.

⁵³ Plun dauki uplika nani ra diara pain nani ni banhkan, bara yuyakira nani ba lika mihta bîla baman blikan wan.

⁵⁴ Ai napakanka Israel ba hilp munan; ai kupia swapni lâka sin ai âuya tikras kan,

⁵⁵ ai pramiska wan damika nani wal daukan ba kat, Ebraham ra bara ai taya nani ra sin ban kaia ra.”

⁵⁶ Baku bamna, Meri ba Elisabet wal takaskan kati yumhpa prais. Baha ningkara, witin kli ai watla ra wan.

Jan Tatahbra aisuban ba

⁵⁷ Baha ningkara, Elisabet luhpa baikaia piua ba aimakan, bara witin luhpa waitna kum briaia kan.

⁵⁸ Ai watla lamara iwi nani bara ai taya nani sut lilia lakula daukaia wan, bara baha nani kaikan nahki Gâd mita Elisabet ra yamni munan ba.

⁵⁹ Yu 8 alkan piua, witin nani aidrubi balan tukta luhpia wîna ra Aisa sainka daukan, bara nina ba sin Sakaraya mâkaia luki kan.

⁶⁰ Sakuna yaptika bila: —Apia. Kau pain kabia ai nina Jan mâkaia.

⁶¹ Baku mika, witin nani bila: —¿Dîa muni baha nina yaia? Kan man tamya nani tilara baha nina bri uplika ba âpu sa.

⁶² Baku bamna, witin nani aisika ra sain dauki makabi walan, nina ba dîa mâkaia lukisa sapa.

⁶³ Sakaraya ba wauhtaya pîs kum makaban, bara baha ra naku ulban: “Ai nina ba Jan.” Baku mika upla sut ba tâ iwan.

⁶⁴ Bamna baha sim piua ra, Sakaraya lika sturi aisan bara Gâd ra sin mahka mayunan.

⁶⁵ Baha mita, ai watla lamara iwi uplika nani tâ iwan pali takan, bara naha sturka na ban sin Judia ilka kuntrika aiska ra brih wan.

⁶⁶ Bamna naha sturka walan nani sut ba, bahara luki pana pana aisi makabi wali kan: “¿Naha tuktika na dîa kabia ki?” Kan Dawan karnika witin wal param kata.

Sakaraya lawana ba

⁶⁷ Ai aisika Sakaraya ba Spirit Holikira ni aibanhwan, bara Gâd diara aisaia yan ba, naku aisin:

⁶⁸ “¡Dawan ba yamni pali kabia, witinka Israel Gâdka ba, ai uplika nani ra swaki sakaia dukiara balan bamna!

⁶⁹ Witin Sasakra karnakira kum wankan, ai napakanka Debit kiamka ba tila wina.

⁷⁰ Patitara piua wina witin baku pramis daukan, ai prapitka holikira nani bâk:

⁷¹ witin wan waihla nani ba wina swaki wan sâkbia, bara misbara wan kaiki nani ba wina sin;

⁷² wan damika nani ra sin umpira kaikbia, bara ai pramiska holikira witin nani wal daukan ba sin ai âuya tikbia apia.

⁷³ Naha pramiska sika Gâd wan damika Ebraham wal swer taki daukan ba:

⁷⁴ witin wan waihla nani wina swaki wan sâkbia, bara sibrin âpu kira yawan ai dukia daukbia,

⁷⁵ wan rayaka piua nani sut ra, bara witin mawanra holikira, kasakkira tauki kabia.

⁷⁶ Bamna man, luhpi lupia, Gâd Laih Purara iwi ba prapitka mai mâkan kabia, kan Gâd kainara yabalka nani ba man mita ridi dauki wama,

⁷⁷ bara yaka ai uplika nani swaki sakan lâka ba kaikbia, ai saurka nani swih tikaia lâka ba sin.

⁷⁸ Wan Gâdka, ai kupia swapni lâka ra umpira wan kaikan bamna, witin yu raya baiwan baku pura wina lapta ba wan blîkbia,

⁷⁹ baha nani tihmia bara prura mununhtara iwi nani ra ingni yaia, bara wan mina nani ba kupia kumi yabalka ra yaka wapaia.”

⁸⁰ Baku kan ba ra, tukta ba pâwi karna sin taki kan, ai wîna tara mapa ra, ai spiritka mapa ra sin. Witin lika upla iwras tasbaya ra takaski kan, Israel luhpia nani ra param takan piua ba kat.