Libait Lâka 26 - DAWAN BÎLA AISKA

Bîla wali dadaukra nani ra yamnika nani

¹ “Aidul nani bara upla lilka nani paskpara, man nani kuntrikam ra bahmuna walpaya bripara bara baha nani ra puram sunpara, kan yang sika man nani Dawan Gâdkam.

² Sabat yui nani ba kulkanka yabi bas, kan yang yui bamna, bara pura sunra watla ba sin kulki kama: yang sika Dawan.

³ “Yang lâika ba man nani dauki kama, kulki banhma sin lâka nani sut ba alki daukma ba ra,

⁴ lî nani ba, yang ai piua kat blikamni, bara tasba ba, dus nani unta ra ba, ai mâ maikbia;

⁵ plawar mâ nani, wain mâ nani piua kat dâkaia brima; wain mâ nani sin ban bri kama, dus mâ wala nani sin ban brih pi kama biamra banhki takma ba kat, bara kuntrikam ra âmyapah iwi kama.

⁶ Tasbayam ra yamni mai bri kamna, sibrin âpu pain yapi kama, tasbayam ba pri daukamna daiwan wail, daiwan praut bara war nani sut wina sin.

⁷ Man nani mita waihlam nani ba munrika plapbia, witin nani sordkam malika ra kauhan kabia;

⁸ man nani matsip mita 100 waitna munrika plapi kabia, man nani handat kumi mita 10,000 ra munrika plapan kabia; waihlam nani sut sordka kainamra kauhan kabia.

⁹ Yang bui man nani ra pain mai kaikamni, ailal sahwaia mai daukamna, man wal lâika ba ban alki bri kamna.

¹⁰ Plawar auhbi brisma ba wina pi kama, mani nani lubia ba plawar almuk ba sut sakan kabia, bara kli mangki saki auhbi brima ba kat.

¹¹ “Yang lika man nani tilamra bâra kamna, kli mai lulki mai swimna apia;

¹² aima bani man nani tilamra watauki ban kamna, yang lika man Gâdkam sna, man nani lika yang upliki nani kama.

¹³ Yang sika man nani Dawan Gâdkam, Idsip wina mai sakri ba. Witin nani albika kaia apia, man nani wirha tara twilki kapram ba puram wina yang kalki sakri bara pri mai daukri kainam kat wapi kaia.

Bîla wali daukras nani ba

¹⁴ “Sakuna man nani naha lâka nani daukras kama, yang lâika nani ba alki dauki lan takras kama kaka,

¹⁵ ban bahki kulki swima, lâ nani ban alki daukras lâika nani ba sut kaikma kaka,

¹⁶ man nani wal yang naku daukamni, sibrin man nani puramra blikamna, pruaia sikniska, rihka, nakra siknis saura nani, biawaia; kupiam kriwan takaia; insla warkka daukaia sip apia kama, kan waihlam nani bal namsla mâ mangkram ba pi kabia.

¹⁷ Yang lika man nani mampara takamna, bara waihlam nani ba mita puram lubia, misbara mai kaiki nani ba mita mai taibi kabia, upla ninam blikras man yakan plapi kama.

¹⁸ “Naha pâtka nani sut brima kat, kau bîli walras kama kaka, kau 7 taim klala maikamna saurkam mana.

¹⁹ Man nani silp mamyuni kaia lâka brima kaka, pîs lupia nani ra mai krikamna, kasbrika lî maikbia apia, tasba sin mâ maikbia apia.

²⁰ Karnikam bahki pali tikma, kan tasba ba mâ nani maikras bara dus nani sin mâ alkras kabia bamna.

²¹ “Man nani kau ban saura dauki bîli walras kama, upla kum maipara bubia kaka, yang kli 7 taim klala maikamna, saura daukisma ba praiska kat.

²² Daiwan wail nani man nani tilamra blikamni, luhpiam nani âpu daukbia, daiwram nani ba pibia, upla maura mai daukbia, yabal nani ba bîla baman kabia.

²³ “Naha sut daukrika man nani wapni takras, yang maipara kau saura daukisma kaka;

²⁴ yang sin man nani mampara lawamna, bara kli kau 7 taim klala maikamna saura daukisma mana.

²⁵ Man nani puramra war bri balamna pana mai munaia lâka ba, yawan wal lâ daukan lâka ba krikisma bamna. Man nani plapi banhma yukuwaia pliska ra tawankam nani ra, sakuna yang siknis nani blikuna bara man nani waihlam mihta ra kauhma.

²⁶ “Yang bui man nani patam ba sauhkamna, bara mairin matawalsip bal brit angkaika kumi ra brit angkbia, plun ba wiria baman kabia bara man nani pi banhma, kuna âmyapah pima apia.

²⁷ “Naku taki kabia bara kau ban bîli walras kama, kuna ban saura dauki kama kaka,

²⁸ yang sin man nani mampara kamna bara kupi baiwanka ra kli klala 7 wala maikamni saura daukisma ba luki.

²⁹ Bara man nani lika luhpiam waitna bara luhpiam mairin nani ba pima.

³⁰ Lukras nani tempelka ba sauhki tikamni, lilka nani ba slingbamni, altarka nani wâl ba sin baiki pura paski swimna; upla pruan nani ba paski swimna, bahki ai kulkaia lâka bri ba yang tâinka marikamni;

³¹ tawankam ba slingbi swimna, aidulka tempelka nani ba yuyaka baman, kîa pain nani bri balma ba kiawalamna apia.

³² “Tawankam tara nani ba sauhkamna, man nani waihlam nani bal bahara insla irbia bara tâ iwan takbia.

³³ Man nani ra yakabrira mai daukamni, nisan wala nani tilara, sord ba taya wina saki ninam blikamni; tawankam ba upla iwras tasbaya daukamni, bara tawankam nani ba kriwi tiwan kabia.

³⁴ Bara tasba ba pri takbia, ai riska piua aiska bribia man nani âpu sma ba piua ra. Tasba ba ris bribia, man nani bui ris yaras kapram ba, sans bribia waihlam nani tasbaya ra kama ba ra.

³⁵ Piua sut ba tasba ba bîla baman kabia, tasba na ris bri kabia, upla nani bâra iwi kan piua ra ris briras kan ba.

³⁶ “Man nani an kra waihlam nani tasbaya ra kau raya bâra kama ba, siarangkira mai daukamni bara dus wahia kauhi ba wali plapi kama. Man nani lukma waihlam ninam blikisa, kuna upla ninam blikras kabia;

³⁷ pana pana mina pruki plapi kama war sîa plapi baku, sakuna upla kumi sin ninam blikras kabia; ¡man nani wina kumi sin waihlam mapara buaia sip apia kama!

³⁸ Nisan nani tasbaya ra mai sauhki tikan kabia, waihlam nani kuntrika ba mita man nani âpu mai daukbia.

³⁹ Waihlam tasbaya ra saurkam nani daukram ba tâwan prui banhma, aisikam nani aikuki witin nani sin ai saurka daukan ba tâwan.

⁴⁰ “Man nani saurkam daukram dukiara tânkam bri kama kuna, bara aisikam nani saura daukan ba sin, baku sin man nani lilia lâka âpu sma ba, yang maipara buram ba sin,

⁴¹ baku yang bui man nani mampara lukuna bara mai brih wamna waihlam nani tasbaya ra; bahara wama bara idan tasbaya ra bawan lâka brima, saurkam mana aibapi kama.

⁴² Bara yang kupi kraukamni, Jekob, Aisak bara Ebraham sin aikuki lâ daukri ba, baku sin kupi kraukamni tasba ba dukiara.

⁴³ Baku tasba ba pri kabia, ris bribia yua tara dukiara lilia pali kaia, kan man nani tasbaya ra iwras kama ba mita man nani saurkam mana aibapma. Yang lâika nani ra bahki kulkisma, lâ nani maikri ba want apia wisma bamna.

⁴⁴ “Baha mai wîri ba sut tilara, waihlam nani tasbaya ra kama ba ra, aiska pali saura mai kaiki, ban pali mai kulki swimna apia. Âpu pali mai daukamna apia, damikam nani wal lâ daukri, Jekob wal lâ daukri ba luki kamna, kan yang sika ai Dawan Gâdka.

⁴⁵ Ban sakuna, kupi krauki kamni lâ nani witin nani aikuki daukri ba, Idsip wina sakri piua ra nisan nani mawanra witin nani Gâdka kaia. Yang sika Dawan.”

⁴⁶ Naha lâka nani adarka nani na sika Gâd lâka nani ba, lâ wala nani sin Moses ra smalki yan ba Dawan mita Sainai ilka ra, witin bara Israel luhpia nani aikuki lâka ba.