Libait Lâka 23 - DAWAN BÎLA AISKA

Dawan uplika nani liliaka ba

¹ Dawan ba Moses ra aisi, naku win:

² “Israel luhpia nani ra naku wis: Naha yua nani piua mangki maikuna na, Dawan ra baman mayunaia yua sa, man nani baha yua nani ba holikira kulki kama.

³ “Man nani yu 6 wark taki bas, sakuna yu 7 yua ba wark sâtka kumi sin daukma apia; baha yua ba ris yua bâk sakan bamna, holi man nani aidrubi asla takaia sma. Ani anira iwi kama kra, baha yua ba holikira Dawan ra baman kulkanka yabaia yua sa.

⁴ “Naha yua nani ra piua ba kat asla aidrubi lilia dauki kama, Dawan nina holi kulki kaia.

⁵ “Kati pas 14 yua tutni ra, Insal luan Yua Liliaka ba dauki kabia, Dawan ra pain kulkaia dukiara.

⁶ “Bara yua 15 ba, brit îs âpu daukaia yua tara ba liliaka daukan kabia, Dawan ra pain kulkaia dukiara, yu 7 brit îs âpu dauki pi kabia.

⁷ Pas yua upla sut aidrubi balbia ba, ai pura sunaia baman kabia, baha yua wark karna kumi sin daukaia apia.

⁸ Man nani yu bani plun mâ nani sakripaiska daukma yu 7 ba kat, bara baha yu 7 aimakuya yua ba aidrubi lilia tara daukma, baha yua ra wark sâtka kumi sin daukma apia, yua ba holi kulkan sa bamna.”

Insla disang mâ yua liliaka

⁹ Dawan ba Moses ra aisi, naku win:

¹⁰ “Israel luhpia nani ra wis: Man nani ra tasba kum maikaia wîri ba tasbaya ra dimma ba ra, plawar dâkma ba ra, baha mâ nani kiaubi wilkanka pas wilkma ba, prîs ra yama.

¹¹ Ris yua wina yapra wala ba, prîs baha ba brih Dawan ra prisant pain ba yabia, man nani ra pain mai kulkaia mata kulkan kabia.

¹² Baha yua mâ nani kiaubi wilkan brih aula ba ra, sîp mani kum alkan wîna pain ba kum bri balan kabia, aiska angki Dawan ra yabaia dukiara.

¹³ Baha purkara, plawar kau pain ba paun walhwal pura, batana laya ra akbi daukan ba, Dawan ra prisant yan kabia, angki kîa pain daukaia dukiara, laikaia prisantka kum sin wain batil kum bri balan kabia.

¹⁴ Disang mâ nani brisma ba wina, diara kumi sin pima apia, Dawan ra pas prisantkam ba brih wama ba kat, brit, plawar kâkan nani ba sin. Lâka na baku dauki kaia, bamna aisikam nani wina luhpiam nani ra smalki kama, ani anira iwi kama sin.

¹⁵ “Man nani namsla dâkaia yua, plawar kluban pas ba wilki prîs ra yabuma ba yua ba wina mahka kulkma, wibia kaka ris yua ba yapra wala yua ba wina 7 wik kulkma.

¹⁶ Bara baha lâs yu 7 aimaki ningkara yua wala ba sika yua 50 alkisa. Baha yua ra plawar prisantka raya ba kli Dawan ra bri balma.

¹⁷ Wamtla wina plawar brit dauki angkan kau pain ba, îs mangki daukan britka ba wâl brih wabia. Britka kumi bani ba 8 paun bri kabia, baha britka ba sika plun disang mâ nani sakan ba wina prisantka Dawan ra yaia.

¹⁸ Britka nani ba aikuki sîp 7 sunu taya sauhkan âpu ba, bîp luhpia kum, sîp wainhka wâl, baha nani ba aiska angki Dawan ra prisant kum kîa pain ba dauki yaia dukiara brih wabia, baku sin ai prisantka nani ba tilara plun mâ nani bara wain sin bri balaia.

¹⁹ “Guts wainhka kum sin brih balbia, saurka swin tikaia sakripaiska daukaia, sîp luhpia sin wâl mani kum bri ba, kli wal uplika takaia sakripaiska daukaia.

²⁰ Prîs ba baha daiwan nani ba, britka ba, insla pata mâ nani pas bara sîp luhpia wâl ba bribia, bara prisant painkira dauki Dawan ra yabia. Dawan ra holikira daukan kabia prîs ba dukiara.

²¹ “Man nani baha yua ba lilia daukma, aidrubanka ba sunu, wark sâtka wala sin daukma apia. Naha lâka na baku dauki ban kama, aisa nani luhpiam nani ra smalki kama, baku ani anira iwi kama ba ra naku dauki kama.

²² “Dâkaia piua balbia ba ra, sut pali wahbi bripara, pliki sin taukpara kau takaskan ba. Swima upla umpira nani bribia bara tringsar nani sin. Yang sika man nani Dawan Gâdkam.”

Trumpit puhbaia yua ba

²³ Dawan ba Moses ra aisi, naku win:

²⁴ “Israel luhpia nani ra naku wis: Kati 7 yua pas ba ris yua liliaka daukma, trumpit nani puhbi aidrubi balma.

²⁵ Dawan ra pain kulkaia prisantka ba man nani angki yama, baha yua sin wark wala daukma apia.”

Pâtka swih tikaia yua ba

²⁶ Dawan ba Moses ra aisi, naku win:

²⁷ “Kati 7 yua matawalsip ba, pâtka swih tikaia yua kabia. Aidrubanka yua lilia holikira dauki kama, baha yua plun piras kabia, prisant ba angkan kabia, Dawan ra pain kulkanka yabia.

²⁸ Baha yua ra wark wala kumi sin daukbia apia, kan yua ba pâtka swi tikaia yua bamna, man nani pâtkam swih tikan lâka brima Dawan wina.

²⁹ Ya baha yua ba plun pibia kaka, ya kabia kra, upla nani tila wina sakamna.

³⁰ Baha yua ya wark takbia kaka, ya kabia ya, upla nani tila wina lap tikamna.

³¹ “Baha yua man nani wark kumi sin daukpara, baha ba lâ kum baku dauki ban kaia, aisa nani wina ai luhpia ra smalki kaia, ani anira witin nani iwi kabia sin.

³² Man nani mampa ra ris yua baman kulkaia sa, plun piaia apia, baha katka yua 9 tutnika ba wina, kulkaia ban yua wala tutnika ba kat, tutni kum wina tutni wala kat.”

Utla Papakni liliaka

³³ Dawan ba Moses ra aisi, naku win:

³⁴ “Israel luhpia nani ra naha wis: Kli baha katka ra, yua 15 ba wina yu 7 ra lilia tara daukan kabia Utla Papakni liliaka, Dawan ra kulkanka yabaia dukiara.

³⁵ Baha pas yua ba man nani aidrubaia yua ba, sunu kulkaia. Baha yua ba sunu wark sât wala daukaia apia.

³⁶ Baha yua 7 nani ra Dawan ra pain kulkaia sakripaiska nani angkaia, bara 8 yua aimakbia man nani aidrubi bal lilia tara daukma, Dawan ra prisantka yaia, baha yua ba sin sunu kulki kama. Baha lilia daukaia yua bamna, baha yua ra wark sât wala bara wark karna daukma apia.

³⁷ “Naha yua nani na, Dawan mayunaia warkka baman daukaia yua kulki kama, baha yua nani ba sin sunu kulkbia. Man nani aidrubi balma ba ra, prisantkam nani sin bri balma Dawan ra yaia, sakripais daukaia daiwan aiska angkaia, plun nani prisantka nani, wain prisantka sin, yu bani dîa prisantka nani bri balaia ba tânka kat.

³⁸ Baha purkara ris yua nani Dawan ra pain kulkaia ba, prisantkam nani ba, bara Dawan wal pramis takaia man nani brinkam wina daukaia ba sut daukaia sma.

³⁹ “Man nani namsla mâ nani sut dâki brima ba ra, baha yua liliaka ba, kati 7 yua 15 aimakuya ba wina yu 7 lilia daukaia kama, Dawan ra pain kulki, yu 7 aimakuya ba wina yapra wala yu 8 aimakuya yua ba sin ris briaia yua daukma.

⁴⁰ Baha pas yua ba dusam mâ kau pain ba bri balma, kûku wahia sâtka wahia nani, dus tnawa pain wahia manis ba, awala un ra wahia pain pâwi nani ba bri bal, bara yu 7 Dawan ra lilia dauki kama.

⁴¹ Mani bani man nani bui Dawan ra lilia dauki kaia, yu 7 lilia daukma, kati 7 aimaki bani. Naha lâka man nani kulki ban kama, aisika nani ai luhpia nani ra smalki kabia lâka na.

⁴² Baha yu 7 nani ba, man nani Israel luhpia nani sut baha utla papakni nani ra dimi kama.

⁴³ Bara baku man nani kiamkam wala nani ba sut tânka bribia, Idsip wina man nani mai sakri ba ra, yang daukri man nani utla papakni nani dimi kaia, Yang sika man nani Dawan Gâdkam.”

⁴⁴ Bamna baku Moses naha sturka Israel luhpia nani ra win, baha yua nani mani bani piua aimaki ba kat lilia dauki kaia lâka nani ba, Dawan liliaka baman daukaia ba.