Libait Lâka 13 - DAWAN BÎLA AISKA

Lipar sikniska ba nahki daukaia

¹ Dawan bui Moses bara Eran ra aisin, bara naku win:

² “Upla kum taya sukwisa, yukri baku puskisa kaka, lipar talia sa kaka, prîs ra brih wan kabia, Eran ra, apia kaka prîs wala ra sin.

³ Prîs bui sukwanka ba pain pali laki kaikan kabia, tamaya taya purara ba pihni kabia kaka, sukwanka ba kau pakni kabia sa kaka, baha ba kasak pali lipar sa. Baha ningkara, baha kaikan prîska ba uplika ba ra param wiaia sa, bara tâski kulkan kabia.

⁴ “Sakuna taya markka ba pihni sa kaka, sakuna pakni apia sa kaka, taya tamaya sin pihni takras sa kaka, prîs mita uplika ba yu 7 durka praki swin kabia.

⁵ Baha ningkara kli pain pali laki kaikbia, sukwanka ba ban sa kaka, kli yu 7 durka praki swin kabia.

⁶ Bara yu 7 kli aima kum laki kaikan kabia, sukwanka ba tiwisa sapa. Taya ba pain takisa kaka, bara prîs mita sikniska tânka ba wibia, baha ba taya purara insauhkan sirpi baman kan. Baku bamna, sikniskira ba ai kwalka nani tuski bara klin takan kabia.

⁷ “Ban sakuna, prîs ba laki kaiki sukwanka ba pain takan win ba ningkara, uplika ba kli prîs ra waia sa, bara witin kli laki kaikbia.

⁸ Bara prîs ba kli sikniska ba laki kaikbia, sukwanka ba kau ban taya aiska ra auya kaka, bara witin param aisi wibia witinka ba lipar alkan bara tâski sa.

⁹ “Upla kum taya sukwan sikniska nani brisa kaka lipar baku, prîs ra brih waia sa.

¹⁰ Prîs laki kaikbia, puskanka taya purara ba pihni takan sa kaka, tamaya ba sin pihni takan sa kaka, puskanka bara wîna pauni raya kaikisa kaka,

¹¹ tânka lika lipar ba rait saura alkan sa taya purara. Bara prîs ba param witin ra wibia witin ba tâski sa, kau durka praki swiaia apia sa.

¹² “Liparka ba isti pali ban alkan kaka mina wina lal kat taya aiska ra, prîs ba baha kaikaia sa.

¹³ Prîs bal sikniska ba aman kaikaia sa, lipar ba pat taya aiska ra pihni takan sa kaka, prîs ba mita param wibia klin takan sa, kan taya ba aiska pihnika takan bamna.

¹⁴ Sakuna ani piua ra taya ba kli sukwisa kaka, tâski kulkan sa.

¹⁵ Bara prîs mita laki kaikan kabia sikniska kli rawan ba, bara tâski kulkan kabia, kan wîna ba sukwisa bara tâski kulkisa: baha lika lipar sikniska sa.

¹⁶ “Ban kra taya pain takan ba kli pihni takisa kaka, sikniskira ba prîs ra waia sa,

¹⁷ bara laki kaikan kaia sa. Prîs ba laki kaikbia bara sukwanka ba kli pihni takisa kaka, sikniska tânka ba param wiaia sa, kan pat klin takan sa bamna.

¹⁸ “Upla kum taya purara sukwan brisa kaka, bara pain takbia,

¹⁹ sakuna sukwanka pliska ba ra puskanka pihni kum, apia kaka insauhkan pauni bâra sa kaka, prîs ra waia sa.

²⁰ Bara prîs ba laki kaikbia, bara sukwanka pliska ba pakni sa kaka, tamaya ba kli pihni takan sa kaka, tânka aisabia bara wibia uplika ba tâski pali sa, lipar sukwanka brisa bamna.

²¹ Sukwanka pliska kaikbia, tamaya kau pihni âpu sa kaka sukwanka ba pakni apia sa, bara sukwan ba tiwi auya sa kaka, uplika ba yu 7 yukuki bri kabia.

²² Sakuna sukwanka kau ai tâura auya kaka taya purara, prîs aisabia tâski saura pali sa, kan lipar sukwanka bri bamna.

²³ Sakuna sukwanka ba kau ai tâura waras kabia kaka, bara sukwanka markka ban kabia kaka, prîs ba wibia witin ba klin sa.

²⁴ “Upla kum taya ba aman sa kaka, amanka wîna ba kau raya sa bara pauni pali sa kaka,

²⁵ prîs ba baha laki kaikan kabia. Sukwanka ra tamaya ba pihni sa kaka bara sukwanka ba pakni sa, taya pîska wala baku apia, lipar sikniska wîna aman ba wina, prîs baha ba param aisabia baha ba tâski sa, lipar sikniska alkan sa.

²⁶ Sakuna prîs ba laki kaikbia ba ra, sukwanka ba tamaya pihni kumi sin âpu sa bara sukwanka ba kau pakni apia sakuna tiwisa kaka, kau yu 7 utla ra yukuki bri kabia.

²⁷ Bara prîs ba yu 7 ningkara, uplika ba laki kaikan kabia, bara taya pura tani ba kau sukwisa kaka, param wibia, uplika ba tâski kulkan kabia, lipar sikniska bri bamna.

²⁸ Sakuna sukwanka ba pruisa kaka, taya purara ba tiwi auya sa kaka, bara baha ba sukwan baku wibia apia, prîs mita wibia sikniskira ba klin sa, bara aman markka baman sa.

²⁹ “Waitna kum, apia kaka mairin kum kra, lal ra sukwan brisa, apia kaka krusa ra kra,

³⁰ baha sukwanka ba prîs mita laki kaikbia. Sukwanka ba kau pakni sa kaka, tamaya ba lalahni pali kaka, bara prîs ba param aisabia, uplika na lal ra lipar siknis brisa, krusa ra sin.

³¹ Prîs ba mita laki kaikaia sa, liparka sikniska ba kau ai tâura waras sapa taya aiska ra, tâwa siksa âpu sa kaka, kau yu 7 durka praki swin kabia.

³² Bara yu 7 lubia ba ra prîs ba laki kaikan kabia, kau sukras sapa, pakni sin takras sapa, tâwa sin lalahni apia sapa;

³³ baku kaka, prîs ba mita sikniskira ba ra wibia, ai unmaya irbaia, sakuna sukwanka pura ba lika apia. Bara kau yu 7 yukuwan ra durka praki swibia.

³⁴ Kli yu 7 ningkara, prîs ba kli laki kaikbia sukwanka ba kau tara takras sapa, bara prîs ba param aisi witin ra wibia, bara sikniskira ba ai kwalka tuski, klin takbia.

³⁵ Sakuna klin takan win ba ningkara, siknis ba kli rawisa kaka,

³⁶ prîs ba sikniskira ba kli laki kaikan kabia, sukwanka ba kau ban auya kaka, tâwa ba kau lalahni pali kabia kaka, taya sin baku kaka, baha uplika ba tâski kulkan kabia.

³⁷ Sakuna prîs ba kaikbia bara tâwa siksa pâwisa kaka, sikniska ba rawisa, uplika ba klin takan. Bara prîs ba witin ra param wiaia sa, witin ba klin sa.

³⁸ “Waitna kum bara mairin kum taya ra diara pihni bâra sa kaka,

³⁹ prîs ba laki kaikbia, pihni nani ailal sa bara siksa sin, sakuna taya purak baman baku sa kaka, witin mita wibia uplika ba klin sa.

⁴⁰ “Waitna kum tâwa sut daiwan bara lal lipni takan sa kaka, witin ba klin sa.

⁴¹ Lal mawan tâwa baman daiwan lipni sa kaka, baha sin klin sa.

⁴² Sakuna sukwan kum bâra kabia kaka, pihni, pauni, baha tâwa daiwan bara nina tani apia sakuna mawan tani ba ra, baha sika lipar bâra sa.

⁴³ Baku bamna prîs ba laki kaikan kabia sukwanka pîska ba pihni bara pauni kaka, lipar ba taya ra sa,

⁴⁴ baha waitnika lipar sikniska brisa, lal ra sukwan manis brisa. Waitna kum tâski sa, bamna prîs ba mita param wibia witin siknis sa.

⁴⁵ “Lipar sukwanka bri uplika ba ai prâka kalkbia, ai lal pura prakbia apia, bara wini aisabia: ¡Tâski!, ¡Tâski!

⁴⁶ Sukwan brisa kaka, tâski kulkan kabia bara yakan iwi kabia, tawan lata tani ra.

⁴⁷ “Kwala ra tâski kum bâra kabia kaka,

⁴⁸ kwala maman ra, daiwan tâwa, apia kaka dus taya ra, daiwan taya kabia kra,

⁴⁹ tâski baha dukia nani ra alkan ba, mapla siakni, paura sa kaka, baha, lipar takisa, baha prîs ra marikan kabia.

⁵⁰ Prîs bui tâski ba laki kaikan kabia, diara nani ra tâski alkan ba dukia ba, yu 7 durka praki swin kabia.

⁵¹ Bara yu 7 alkbia ba ra diara nani ra tâski alkan ba laki kaikan kabia; prâka ba, kwala ba, daiwan taya ba, tâski ba ban bâra sa kaka, lipar saura bâra sa bara diara nani ba tâski sa.

⁵² Baku bamna, diara nani ra tâski alkan ba baha dukia nani sut ba angkaia sa, baha lipar saura bâra sa;

⁵³ sakuna prîs ba laki kaiki si bara tâski ba ban saura apia sa wibia kaka,

⁵⁴ wibia dukia nani bri kan ba sikbi klin daukbia bara baku diara nani ba yu 7 yukukan kabia.

⁵⁵ “Tâskika alkan ba sikbi sâkbia ningkara, prîs ba laki kaikbia bara tâskika ba takras sa kaka, baha ba tâski pali sa. Bara dukia nani sut angkbia; kan tâskika ba ailal takras ba ra, dukia nani ba âpu daukaia.

⁵⁶ Prîs ba laki kaikbia ba ra, siknis ba klin daukan sa kaka, prâka ba kalkan kabia, daiwan taya ni daukan kwalka ba.

⁵⁷ Sakuna kli siknis ba takbia kaka, diara nani yus muni ba sut angkan kabia.

⁵⁸ Baku sin, kwala sâtka nani ba ra tâski ba lubia sa kaka, aima kum klin daukan bara pat klin takan sa.”

⁵⁹ Naha sika lipar bri nani lâka ba, prâka anira linin ra tâski alki ba, daiwan taya ni daukan prâka ra kwala mawan nani ra sin tâski alkisa kaka, baha nani ra param wiaia sa klin takan sa, apia kaka tâski sa sapa.