Libait Lâka 10 - DAWAN BÎLA AISKA

Nadab bara Abihú daukan saurka ba

¹ Eran luhpia nani Nadab bara Abihú wal pauta aswan watlika ba brin bara diara aihka daukan, pauta aswan ra mangkan, awas mâka kîa yamni prisantka sin brin, bara angki Gâd ra yan. Sakuna Gâd mita wiras kan, witin nani silp baku daukan.

² Bara pauta klauhan Gâd wina blikan, witin nani aiska aman. Bara baku witin nani prui banhwan, Gâd kaiki ba ra.

³ Baha ningkara Moses naku win Eran ra: —Naha sika Gâd mai wiaia ai win kan ba, naku win ba ra: ‘Yang laimara aula ba uplika nani ra marikamni holiki lâka ba, bara Israel luhpia nani sut ra yang praina ba marikamni.’ Bara Eran diara aisaras sâp kan.

⁴ Baha ningkara Moses bui Misael bara Elsafán wal winan balan, baha nani ba Uziel luhpia nani, witin lika Eran tahtika ba. Bara witin nani ra naku win: —Man nani bal, holi pliska wina tamya nani ba saki, tawan lata tani ra brih was.

⁵ Taika nani baha nani lamara wan, bara ai prâka dimi kan ba kat tawan ba wina saki latara brih wan, Moses aisin ba baku daukan.

Prîs nani ai raitka bara ai bisniska

⁶ Baha ningkara Moses bal Eran ra, ai luhpia nani Eleazar bara Itamar ra sin win: —Man nani kumi sin, tâmwa slingwan kabia apia, prâmka sin kalkma apia sari mai dauki baku; man nani baku daukma kaka pruma, bara Gâd kupia baiwanka upla nani purara balbia. Sakuna sari pali takan kabia ba lika, kiamkam nani ba, Israel luhpia nani sut, baha pauta klauhan Gâd blikan, witin nani angkan ba dukia.

⁷ Tint watla lama wina sin laihura wapara pruma ra sîa, man nani ba Dawan yamnika maikaia batana mai laikan bamna. Moses dîa aisin baku witin nani daukan.

⁸ Baha purkara, Gâd bui Eran ra aisi, naku win:

⁹ “Man, apia kaka luhpiam nani, Dawan wal aisaia tintka watla ra dimbia ba ra damra walma, kli wain dih dimbia apia. Wain bara bahmuna sâtka wala sut sin dima apia, pruma ra sîa. Naha lâka baku kulki ban kabia, bara aisa nani ai luhpia nani sut ra wibia naha lâka na.

¹⁰ Baku man nani tânka brima, holi lâka ba bara saura daukaia lâka ba wal.

¹¹ Bara man nani tawi, Israel luhpia nani sut ra naha lâka smalkma, Gâd bui Moses ra lâ nani yan ba lâka tilara naha brima.”

¹² Baha ningkara Eran luhpia nani, Eleazar bara Itamar, ai aisika watla ra kan, bara Moses bui naku win: —Barli mâ sâtka prisantka angkan nani ba wina, kau bâra ba man nani bris, sakuna îs mangkaia apia, bara altar lamara piaia sma, kan baha ba pat holi pali daukan bamna.

¹³ Holi daukan pliska kum ra iwi pis, naha na man ra maikan sa, luhpiam nani sin baha prisantka Gâd pain kulki ba, yang ra ai win baku daukamna.

¹⁴ Bara lama dusa ba, baha sika prisantka kau pain ba, bara kuhma ba sin Israel luhpia nani kli wal uplika takaia sakripaiska yan ba wina maikan ba, man luhpiam waitna nani luhpiam mairin nani ba aikuki baha bri si holi daukan pliska kum ra piaia sma.

¹⁵ Kuhma ba aima bani prisantka yabisa, lama dusa ba sin, kau pain ba sin, Gâd mawanra bri si marikan kabia, prisant painkira baku. Batanka ba man luhpiam nani aikuki brima, baku piu sut baha bri kama, Dawan aisin ba baku; luhpiam waitna bara luhpiam mairin nani aikuki, kan baha sika kli wal uplika takaia sakripaiska, Israel luhpia nani dauki si swin bamna.

¹⁶ Bamna Moses, Eran luhpia wâl ba ra walan, guts luhpia kum saurka daukan mana sakripaiska ba dukiara bara pat angkan kata. Bamna witin Eleazar bara Itamar wal ra saura lawi dauki, win:

¹⁷ —¿Dîa kan man nani saura daukan sakripaiska ba, holi daukan pliska kum ra dimi iwi pih banhras kapram? Baha ba holi pali daukan sa, bara Dawan bui baha man nani ra maikan, baku dauki upla nani saurka daukan ba, man nani twilkaia, bara Dawan wina witin nani ai saurka swin tikan lâka ba bribia.

¹⁸ Holi pliska bara tâlia ba brih waras kata, bara baha pliska ra sika plun ba piaia kapram, yang mai wîri ba baku.

¹⁹ Bara Eran pana witin ra win: —Man nani wals, witin nani bui saura daukan ba sakripaiska bara wîna aiska angki sakripaiska sin naiwa dauki Dawan ra yaban, bara baha takan baku yang ra sin takan. Baha saurka daukan mana sakripaiska yang piri kata kaka, ¿Dawan baha yamni kaikaia kan ki?

²⁰ Moses baha walan ba ra ai lilia pali takan.