Libait Lâka 1 - DAWAN BÎLA AISKA

Daiwan wîna aiska angkaia natka ba

¹ Dawan wal aisaia tintka watla ba wina, Dawan bui Moses ra aisin, bara naha bîla nani na witin ra win:

² “Israel luhpia nani aikuki aisi, witin nani ra wis, upla kum daiwan nani prisant aikaia bri balbia ba, witin ai daiwra nani daknika ba tila wina saki bri balbia.

³ “Baha daiwra aiska angkaia ba, witin ai daiwra tila wina brih aula kaka, bîp wainhka kum, taya sauhkan âpu ba bri balbia. Baha yamni kulki bribia dukiara, daiwra ba tint watla dimaika ba kat dawanka mita bri balbia, upla nani mawanra witin ai prisantka ba Dawan lamara, altar ra bri balbia, witin kaiki ba ra,

⁴ witin ai mihta ba, daiwan lal purara kahbia. Baku daukbia ba ra, Dawan baha prisantka ba yamni kulki bribia, ai saurka nani ban swih tikan kabia.

⁵ Dawan mawanra bri sal bîp wainhka ba skiru ni ikbia; baha ningkara Eran luhpia prîs nani ba bal, tâlia prisantka ba Dawan ra yabia, bara baha ningkara, tâlia ba ni, altarka pura tnaya nani ba sin kir srikbia, upla nani tint watla ra bal, Dawan wal prawbia dimaia durka lama lata tani ra ba ra.

⁶ Uplika witin baha daiwra wîna aiska angkaia bri balan ba taya ba takbi sâkbia, bara wîna ba sin pîs sirpi ra klakbia,

⁷ bara prîs nani ba pauta klauhan bri sal altar ba purara pauta paski mukbia,

⁸ daiwan wîna sirpi klakan nani ba, lal, batanka, biara sirpika nani sut pauta klauhan ba purara kahbaia dukiara.

⁹ Witin wîna ba kau angkras ba ra, tâura biara bara kuhma nani ba sut sikbaia sa. Baha ningkara lika prîs ba baha brih, altar ba purara suni angki, kîa pain dauki, Dawan pain kiawali ba dauki yabia.

¹⁰ “Daiwan wîna aiska angki prisant yabaia daiwra ba, waitnika ba witin ai sîpka bara ai gutska daknika ba tila wina, daiwan wainhka kum sunu ba bri balaia sa,

¹¹ bara Dawan kaiki ba ra, altarka tnaya yahbra tani ra daiwra ba skiru ni sabi ikbia. Bara Eran luhpia prîs nani ba bal, tâlia ba brih altar purara, tnaya nani kir ba ra srikbia.

¹² Baha ningkara sakripais dauki waitnika ba, daiwra wîna ba pîs sirpi nani ra klakbia, bara prîs ba bal, wîna klakan ba, lal batanka ba, biara nani ba sut brih, altar purara pauta paski swin ba purara kahbia.

¹³ Baha ningkara ai sakripaiska dauki waitnika ba, kli baha wîna nani ba, kuhma nani, biara nani ba sut sikbia, bara prîs bui baha nani ba brih altar purara angki, kîa pain dauki Dawan pain kiawali ba, prisantka dauki yabia.

¹⁴ “Baha wîna aiska angki Dawan ra sakripais dauki yabaia ba daiwan tnawira kum sa kaka, butku tara kum, apia kaka butku sirpi kum kaia sa.

¹⁵ Daiwan tnawira ba, prîs ba brih altar ba purara angkbia: lal ba pas warbi dakbia bara altar tnaya ra tala ba sut wîna ba wina taibi sâkbia ningkara, angkbia.

¹⁶ Krukmaika ba bilara diara bâra ba sin sut sâkbia, bara altar lalma tani ra yamhpus auhbaika ba ra auhbi swibia.

¹⁷ Baha ningkara daiwra wîna ba, pîs wâl ra daukbia, tnawa kum ba wâl ra klahbia, sakuna tnawa wala ba lika kalkras kabia, bara baha ningkara wîna ba aiska altar purara angkbia, Dawan ra prisantka kum, kîa witin pain kiawali kaiki ba kat dauki yabia.