Kolosi 4 - DAWAN BÎLA AISKA

¹ Bamna man nani, alba dawanka nani, albikam nani ra diara yaia sma ba, pain bara kasakka lâka ra yas. Man nani sin kasbrika purara Dawankam brisma ba dukiara, kupiam krauki bas.

² Piua bani puram suni ban bas, aihwaki Gâd ra tingki wi bas.

³ Yang nani dukira sin puram suni bas, Dawan mita yang nani ra dur kum saki aikbia sturi yamni ba smalkaia; bara Kraist tânka prakan ba sin aisaia, kan naha sin dahra prakan tânka na dukiara silak ra ai brisa.

⁴ Puram suni bas, baku mika yang sip sna ba kat baha tânka ba param pali saki yamna.

⁵ Pain tauki bas, kristian apia nani ba wal, bara piua brisma bani ba pain man nani yus muni bas.

⁶ Sturi nani aisisma ba sut sin pain bara auhni kabia, bara kaiki banhwi kaia sma, dîa upla ra pana aisaia sma ba.

Prakaia lakula nani

⁷ Bamna wan muihni latwankira Tíquico, witinka lika wark dadaukra painkira kan, bara yang wal Dawan dukia daukan ba mita yang tâinka nani sut pali witin mita man nani ra mai wibia.

⁸ Diara nani sut yang nani dukira mai wibia mata, Tíquico ba man nani ra blikuna, hilp mai munaia bara maisam nihkaia.

⁹ Witin ba wal wan muihni latwankira bara kasakkira Onésimo sin auya; witinka lika man nani tilam pali wina sa. Dîa dîa nahara taki ba sut witin nani mita mai wibia.

¹⁰ Aristarco, yang wal silak ra ba, man nani ra ai lakula blikisa, Bernabé tubankika Mark ba sin. Witin dukiara dîa mai smalkatna ba, man nani kaikisma: Man nani mai kaikaia wabia kaka, pain bri bas.

¹¹ Jisas, witinka nina Justo wi ba sin man nani ra ai lakula blikisa. Ju takan nani tila wina naha nani baman, yang wal Gâd King aimaki ba lâka dukiara wark takan, bara baha ba yang maipa ra maisa nihkra tara kum sa.

¹² Epafras, Jisas Kraist napakanka kum man nani tilam wina ba, ai lakula blikisa. Witin ai pura sunra bâk upla sut dukiara uya makabisa, man nani ba pain bapi bûi kama, bara Gâd kupia lâka daukaia wilin pali nani kama.

¹³ Epafras man nani dukiamra uya luki ba witniska lika yang sna, bara yang baman apia, sakuna Leodisia bara Hierápolis tawanka ra iwi banhwi ba sut dukiara sin.

¹⁴ Wan latwankira daktar Luk bara Dimas sin ai lakula blikisa.

¹⁵ Laikula wis, wan muihni nani Leodisia ra nani ba sut ra, bara Ninfa ra, bara witin watla ra serts uplika nani asla taki nani ba ra sin.

¹⁶ Naha wauhkataya man nani tilamra aisi kaikan kabia ningkara, Leodisia sertska ra blîks witin nani mita sin aisi kaikbia; bara Leodisia wina wauhkataya brima ba ra sin, aisi kaiki bas.

¹⁷ Naha na Arquipo ra wis: “Dawan napakan warkka ra mangkan ba trai muni lâ kat tauki kabia.”

¹⁸ Yang Pal, naha lakula mihti pali ni ulbisna. Silak ra sna ba dukiara, kupiam krauki bas. Gâd mita yamni mai munbia.