Kolosi 2 - DAWAN BÎLA AISKA

¹ Bamna brinki sa, aiklabanka tara brisna ba tânka brima, kan baha ba man nani dukiamra bara Leodisia ra iwi nani ba sin, bara yang wîni tara latan kaikras nani ba sut dukiara sin.

² Aiklabisni baha nani sut ai kupia nani ra tâ baikanka bribia, aikuki asla latwan lâka ra kabia, bara diara tânka kaikaia kasak ba bribia, bara Gâd tânka yukukan ra ba bribia, baha sika Kraist witinka pali ba;

³ bamna Kraist ra sika sins lâka bara diara tânka briaia nani yuyaka aiska sut kuki swin ba.

⁴ Naha yang bui man nani ra mai wisna, upla kumi mita sin yarka ai bîla damni aisi ba ni, kunin mai munbia apia dukiara.

⁵ Bamna yang lika man nani tilamra upla baku natka ra âpu sna, sakuna spirit baku lika man nani tilamra sna, bara yang âiyapah ai daukisa kaikaia, man nani sut lika diara wapni kat daukisma, bara aikuki asla kasak lukankam lâka ba Kraist ra bri banhwisma.

Rayaka raya Kraist ra

⁶ Baha mita, man nani nahki Dawan Jisas Kraist ra briram ba baku, witin ra asla taki iwi bas,

⁷ witinka ra wamkia nani karna dauki brih, witinka kat spirit karnika mita nikras kira bapi bûi bas, dîa mai smalkan ba baku, piua bani Gâd ra tingki wi bas.

⁸ Man nani aman kaiki bas: Upla nani kunin baman diara bahki aisi ba mita yarka kunin mai muni mai brih wabiara; kan baha nani ba Kraist ra ai tâ baikras sa, sakuna upla iwanka lâka kat bara naha tasba lâka karnika baman ra wataukisa.

⁹ Bamna Gâd tânka aiska ba, Kraist upla takan ba mita wan marikisa,

¹⁰ bara man nani lika Gâd ni mai banhkan sa, kan Kraist wal asla sma ba mita. Spirit bri nani sut lalka sa, karnika bara pura aimakaia karnika brisa.

¹¹ Bamna Kraist wal asla takram ba mita, pat Aisa sainka mai daukan sa; wan wîna pali ra Aisa sainka dauki ba sâtka lika apia, sakuna wan wîna saurka nani wina swaki wan sakan ba. Naha sika Aisa sainka lâka Kraist wina aula ba.

¹² Bara man nani sut tahbi mai daukan ba ra, Kraist wal raiti ra mai bikan kan, baku sin witin wal kli pruan wina mai bukan, kan man nani kasak lukram, Gâd karnika mita Kraist ba pruan nani tila wina kli bukan.

¹³ Piua luan ra, man nani sut lika spiritkam mapa ra pruram nani katma saurkam nani ba tâka mita, bara Aisa sainka briras kapram ba mita sin; sakuna nanara, Gâd mita Kraist ra mai praki raya kaia lâka asla ba maikan, bara saurkam nani sut sin swin tiwan sa.

¹⁴ Tras kum wan mapara bâra kan ba, pât ra sin wan brih wi kan ba, Gâd mita aibapan. Baha traska ba sut pali âpu daukan, silak ra saban ba mita.

¹⁵ Kraist dus prihni ra pruan ba mita, tasba wihtka nani spirit lâka mapara karnika bri nani ra pura luan, ban sin baha nani ra swira tara pali daukan, bara witin baha nani ba alki priski baku, ai pura luan daknika tilara dingki brih auya kan.

Kasbrika purara diara nani ba pliki bas

¹⁶ Bamna, upla kumi mita sin yarka lâmka aisi daukbiara, plun pisma, apia kaka diara disma ba dukiara, lilia yua nani kulkaia dukiara kra, kati raya, apia kaka ris yua nani sin dukiara.

¹⁷ Naha diara nani sut na lika, Kraist balaia ba tukinka nani sa, bamna diara kasak pali ba lika Kraist sika.

¹⁸ Swirka pât ra mai lakbiara baha nani bawikira lâka bri baku, insal nani ra mayuni ba; yarka prisantkam mihtam wina mai dakbi bribiara. Witin nani lika ai nakra ni kaikras dukia ba ra dimi auya, bara ai lukanka ni praut taki puskisa upla lukra ni.

¹⁹ Witin nani lika lal pali Kraist ba wal asla apia sa; witinka mita sika wan dakaki, wan paki ba; bara wan wîna tara pîska bani asla dauki ba, Gâd ai kupia ra luki ba kat.

²⁰ Man nani lika Kraist wal pruram, bara wan wîna brinka karnika nani ba mahka swiram sa. Ban kaka, ¿dîa muni kau lukras uplika nani lâka ra iwisma, bara adarka nani daukisma ba,

²¹ naku natka ra: “Naha dukia na kangpara, baha pata ba pipara, mihtam ni sin alki bripara”?

²² Naha lâka sut lika diara bahki tiwi ba baku sa, upla adarka brih smalkanka baman sa.

²³ Kasak pali bahmuna sât dukia bâra sa, sins lâka wankaia talia sa, kan insal nani ra mayuni kulki ba mita, bara kunin tânka wal bawaia lâka bri ba mita sin, wan wîna rausauhkaia ba; sakuna wan wîna brinka pura luaia nani sut ba diara bahki nani sa.