Kli Smalkanka 8 - DAWAN BÎLA AISKA

Brit wina baman upla raya apia

¹ “Naiwa lâ nani maikisna ba, man nani daukaia trai kaiks, bara baku sip kama man nani raya kaia, bara ailal sin sahwi naha kuntrika Dawan bui damikam nani ra yabaia win ba dakbi brima.

² Kupiam krauks 40 mani Dawan Gâdkam maikan upla iwras tasbaya ra taukram, traikam kaikan, lukankam nani kaikaia, lâ nani ba daukma sapa.

³ Pât maikan plun wauhram, sakuna ningkara manâ maikan, man nani kaikras sma ba damikam nani sin kaikras kan ba. Mamrikaia want sa upla ba plun wina baman raya apia ba, sakuna bîla bani Dawan bîla wina taki ba mita raya sa.

⁴ Baha mani 40 bilara witin nani kwala atkras, mina nani sin puskras kata.

⁵ Luki kaiks, Dawan Gâdkam lawi smalkan, sim aisa kum ai luhpia ra lawi smalki ba baku.

⁶ Dawan Gâdkam lâka kat dauks, bara smalkanka nani maikan ba bîla wals.

⁷ Kan Dawan tasba disang ra mai bri waisa, tingni, lî kârma aubra nani, il nani langnika nani kuntrika ra;

⁸ baha tasbaya ra lika plawar, barli mâ, wain nasla, kwah damni dusa, drap, oliv nasma laya sin bâra sa.

⁹ Baha kuntrika ra man nani plun dukiara trabil taki lukaia apia kama, diara wala dukiara sin apia. Baha walpaya nani ra ayan sâkma, ilka nani ra bras sâkma.

¹⁰ Pih âmyapah kama ningkara, Dawan Gâdkam ra tasba disang maikan ba dukiara mayuns.

Gâd ra âuya tiwaia apia smalkanka

¹¹ “Aman kaiks Dawan Gâdkam ra âmya lap tikpara. Ai lâka nani ba daukras kapara, lâka nani aisi naiwa adar maikri ba.

¹² Pih âmyapah kama taim, utla pain paskan ra iwi bas,

¹³ bara bîpkam, sîpkam, gulkam, silbarkam, dukiam wala nani sut ailal sahwi ba kaikma.

¹⁴ Tara pulan lâka ni aibanhwi, Dawan Gâdkam âmya tikpara, alba kapram Idsip wina mai sakan ba.

¹⁵ Upla iwras tasbaya saura, sibrinkira bâk maikan wapram, piuta puisinkira bara misri ailal, lî âpu kan ba, witin walpa karna wina lî diaia yaban.

¹⁶ Upla iwras tasbaya ra manâ mai dakakan, plun kum damikam nani sin kaikras kan ba, mâyara bawrika traikam kaikaia, baha sut ba painkam ra daukan.

¹⁷ “Kupiam ra lukpara: ‘Naha kukanka sut na, yawan wan karnika ni sakan.’

¹⁸ Dawan Gâd ra kupiam krauks, briaia dukiara witin karnikam maikan, damikam nani wal lâ aisi daukan ba man nani baku daukaia.

¹⁹ “Kuna Dawan Gâdkam ra âmya tiki, gâd wala nani ra mayunma kaka, kasak pali lukisni baha piua wina man nani ba aiska pali sauhki mai tikan kabia.

²⁰ Baku natka ra sauhki tikbia, nisan nani man nani mina taibanka ra waram ba, man nani ra sin mai sauhki tikbia, Dawan Gâdkam bîla lulkram kaka.