Kli Smalkanka 7 - DAWAN BÎLA AISKA

Aidul lâka dukiara smalkan ba

¹ “Dawan man nani Gâdkam bui maikka dimi kuntrika ba ra pliskam brima, bara nisan 7 kau tara karnakira ba man nani taima bara mamwan wina saki lulkma: hitita nani, gergeseo nani, amorreo nani, Kenan uplika nani, ferezeo nani, heveo nani bara Jebús uplika nani.

² Dawan Gâdkam mita naha nisan nani ba mana ni mihtam ra mangkbia bara man nani pura lui sauhki tikma ba ra, witin nani wal lâ daukpara, umpira sin kaikpara.

³ Witin nani wal bripara, baha uplika luhpia man nani luhpiam wal maya baikpara,

⁴ witin nani mita munka luhpiam nani Dawan wina tnaya ra tawi, gâd wala nani ra mayunbia, bara nakra klipan kumi ra Dawan ai kupia baiwanka man nani puramra bliki âpu mai daukbia.

⁵ Man nani daukaia sma ba sika idan nani altarka sut batakaia, walpaya nani sut sauhki tikma, walpaya lal nani witin nani mayuni ba, aidulka nani sut angkma.

⁶ Man nani ba tawan kum aihka mai sakan sa, Dawan Gâd dukiara. Tawan nani tasba ra ba wina Dawan bui bâk mai sakan, man nani ba tawan kum bâk sakan kaia.

Israel ra kulki yabi taibi munan

⁷ “Dawan mita man nani ra mai kulki aihka mai sakan ba, man nani ba nisan nani tilara kau tara apia sma, sakuna kasak pali witin nani wal man nani kau sirpi sma.

⁸ Dawan Idsip wina mai sakan, man nani alba kapram, karnika tara ni king fero karnika wina pri mai sakan. Latwan mai kaikisa bara man nani almukkam nani ra pramis daukan ba daukaia want sa.

⁹ Bamna tânkam bri banhs, Dawan ba Gâdkam sa, Gâd kasak sa, kiamka nani ra ai lâka kasak ba daukisa, witin ra latwan kaiki ai lâka ban bri ba,

¹⁰ sakuna witin ra misbara kaiki nani ra sauhki tikisa, pitka kat mana aitani yabisa. ¡Takaskras pitka kat yabisa witin ra misbara kaiki nani ra!

¹¹ Bamna lâka nani ba dauks, lâ nani naiwa maikisna ba trai kaiks daukaia.

Bîla walan wina yamnika nani

¹² “Naha lâ man nani walma ningkara, trai kaiki dauki banhs bara Dawan Gâd bui man nani damikam nani wal ai lâka wal aisi daukan ba kasak daukbia.

¹³ Man nani ra latwan mai kaikbia, yamni mai munbia bara man nani ailal sahwi kama; luhpiam nani ra, plawarkam mâ ra, wainkam ra, namsla ra mâ krikaia ra, plawarkam mâ, wainkam bara batankam laya, bîpkam bara sîpkam luhpia nani ra yamni munbia, kuntrikam almukka nani ra yabaia win ba ra sin yamni munbia.

¹⁴ Tawan wala nani ba wal man nani ra kau yamni mai munan kabia: man nani tilamra mairin luhpa sip briras ba âpu kabia, waitna kwihra yabaia sip apia ba baku kabia, bîpkam mairin bara wainhka biarapara âpu kabia.

¹⁵ Dawan bui siknis nani man nani tilam wina laihura sâkbia, siknis yula sibrinkira man nani kaikram Idsip purara blikan ba, baha ni waihlam nani ra klala yabia.

¹⁶ Dawan Gâdkam man nani mihtam ra mangkuya tawanka ba âpu daukma. umpira kaiki witin nani gâdka ra mayunpara, kan baha ba man nani âpu daukras kama kaka, man nani ra ni âpu mai daukbia.

¹⁷ “Ban kra man nani lukma: ‘Yawan nani wal naha nisanka ailal sa; ¿nahki sip kabia yawan kangbi sakaia?’

¹⁸ Bamna si bripara. Kupiam krauki bas Dawan Gâdkam king fero ra bara Idsip uplika ra sin dîa daukan ba.

¹⁹ Luki banhs traika kaikan tara nani ra man nani ba witnis kapram, sain tara aihka karnakira nani Dawan Gâdkam bui sakbi Idsip wina mai sakan. Man nani sîa brima tawanka nani ra, Dawan baku daukbia.

²⁰ Dawan mita witin nani purara sirang tara blîkbia, kau raya takaski yukuwan nani ba âpu daukbia.

²¹ Witin nani mawanra tatatpara, kan Dawan Gâdkam, Gâd tara sibrinkira ba man nani wal sa.

²² Tawa tawa Dawan mita naha nisanka nani ra kangbi sâkbia; man nani mita lika danh daukma apia, daiwan wail numbika kau ailal sahwi âpu mai daukbia.

²³ Dawan Gâdkam naha nisanka mihtam ra âpu dauki wabia, sauhki tikma ba kat.

²⁴ Ai kingka nani ba man nani karnikam mununhtara brima, bara man nani bui munrika tasba ra upla kumi sin witin nani dukiara ai kupia kraukbia apia. Man nani aiklabankam mapara kumi sin bubia apia, man nani mita âpu daukma.

²⁵ Man nani bui ai gâdka lilka nani ba angkma, kuna gul nani ba silbar dukiam briaia daukma baha wal takaskaia; baha traika kaikanka ra kauhpara, kan warkkam Dawan bui bahki kulkbia.

²⁶ Baha mita lulkan dukia kumi sin man nani wamtla ra bri wapara, man nani ra sin sauhki mai tikan kaia apia ba mata. Baha ba sauhki tikaia lâka sa, baha mita saura kulki banhwaia sma.