Kli Smalkanka 6 - DAWAN BÎLA AISKA

Lâ kau tara ba

¹ “Naha sika lâ nani ba, lâ nani bara diara daukaia lâka nani ba, Dawan Gâdkam mita man nani ra mai smalkaia ai win ba, baha kuntrika ba man nani pliskam brima ba ra lâka nani na daukaia.

² Baku natka ra Dawan Gâdkam ra mayunma, baku lâ bîla man nani ra maikuna ba rayakam aiska ra dauki waia, luhpiam bara mulam nani ra sut ba mani ailal raya kabia.

³ Baku bamna, Israel luhpia nani, trai kaiks bara baku lika yamni wama bara upla ailal takma, baha tasbaya nasma bara tialka laya lî baku aubi ba, almukkam nani ra Dawan Gâdkam pramis munan ba.

⁴ “Wals, Israel: Dawan wan Gâdka ba Dawan kumi sa.

⁵ “Dawan Gâdkam ra latwan kaikma kupiam aiska kira, sulkam aiska kira bara karnikam aiska kira sin.

⁶ “Diara sut yang aisari ba sinskam ra ulbi mangkma,

⁷ bara luhpiam nani ra ban smalki bas, wamtla ra kama, yabal ra kama sin baha dukiara aisi bas, aitnikisma piua ra, krikrikam wina kli buisma piua ra sin.

⁸ Naha lâka na sain kum baku, mihtam ra wilki brih was bara lamla purara sin,

⁹ bara wamtla playa nani ra uls, wamtla durka nani ra sin.

Moses bui Israel luhpia nani ra makabisa bîla wawalra kaia

¹⁰ “Man nani Dawan Gâdkam mita almukkam nani, Ebraham, Aisak bara Jekob ra pramis muni yabaia win ba kuntrika ra dimma. Kuntri kum tawan tara pranakira nani brisa, man nani paskras kapram ba;

¹¹ bara utla diara pain nani baman ni banhkan ba, man nani banhkras kapram ba; liwanhta man nani salhkras sma ba, insla, oliv dusa man nani mangkras sma ba, baha wina âmyapah pima.

¹² Baku kabia kra sin Dawan ra âmya tikpara, Idsip ra alba kapram wina mai sakan ba.

¹³ Dawan Gâdkam ra mayuns bara witin warkka baman dauki bas, bara swer takaia kaka, Dawan nina ra baman dauki banhwi bas.

¹⁴ Tawan lamamra iwi nani ba Gâd wala nani ra mayuni kaka, baha nani ninara wapara.

¹⁵ Dawan Gâdkam man nani aikuki ba, Gâd kum lalawra sa, man nani mampara ai kupia sauhki, sip sa aiska mai sauhki tikaia.

¹⁶ “Dawan Gâdkam traika kaikpara, Masá ra daukram ba baku.

¹⁷ Dawan Gâdkam lâka ba kasak kat dauki banhwi bas, witin ai lâka nani adarka ba sin.

¹⁸ Dawan nakra ra kasak wapni kat dauki banhwi bas, Dawan mita almukkam nani ra yabaia swer takan ba tasbaya ra yamni waia pliskam briaia.

¹⁹ Waihlam man nani mampara bubia ba, Dawan bui munka plapbia, swer takan ba baku.

²⁰ “Luhpiam nani yu kum mamkabi walbia taim: ‘¿Dîa tânka sa naha lâka bara lâ adarka nani Dawan wan Gâdka wankan ba?’

²¹ Man nani pana wima: ‘Yang nani na king fero albika kapri Idsip ra, Dawan ai karnika tara ni baha wina wan sakan.

²² Yang nani kaikri sain tara aihka sibrinkira Dawan mita Idsip ra, king fero mapara bara watla bilara sin daukan ba.

²³ Sakuna baha wina yang nani ai sakan, bara wan almukka nani ra swer takan kuntrika ra wan brih wan.

²⁴ Dawan wan Gâdka wan blikan naha lâka nani ra sut yawan trai kaikaia bara tara kulkaia, yamni waia wan rayaka sin main kaiki bri kaia nanara baku.

²⁵ Yawan ra adar wankan baku, yawan ai lâka nani ba dauki kaia Dawan wan Gâdka mawanra.’