Kli Smalkanka 4 - DAWAN BÎLA AISKA

Moses bui Israel luhpia nani ra smalkan bîla wawalra kaia

¹ “Israel luhpia nani, nanara wals lâ nani mai smalkatna ba. Bara trai kaiks, kuntrika ba yus munaia, man nani damikam ra win Dawan Gâdkam wina maikaia win ba.

² Yang mai wîri ba, pura prakpara, dakbi sin sâkpara, Dawan Gâdkam dîa mai win ba kat dauks. Yang mai wîri ba kat,

³ man nani namkra ni kaikram Dawan nahki Baal-peor ra âpu daukata, man nani tilamra baha pliska ra aidulka ra mayuni kan ba.

⁴ Sakuna man nani sut, Dawan Gâd ra kasak kapram ba, kau raya banhwisma.

⁵ Yang lâ nani bara lâ daukaia ba mai smalkri Dawan Gâdki wina aikan ba. Ani kuntrika ra dimma ba, bahara smalki kaia.

⁶ Trai kaiki bara dauks, baku lika man nani tilamra sinskira bara diara tânka brabrira nani bâra ba, upla mai kaikbia. Baku mai kaiki bara mai wibia: ‘Naha nisanka na sinskira sa bara diara tânka sin brisa mai wibia.’

⁷ Kan, ¿nisan tara bâra sa ki ai gâdka nani ai lamara bri ba, yawan wan Dawan Gâdka wan lamara bri ba baku yawan bui witin ra winisa piua ra?

⁸ ¿Nisan tara pali aihwa bâra sa ki, naha lâka nani diara daukaia lâka nani kasak pali ba, naiwa yang bui man nani ra mai smalki mamrikisna na lâka bri ba?

⁹ Baku bamna aman kaiks, diara nani kaikram ba âmya tiki banhpara. Ban kaia ra, sinskam wina sin sâkpara. Man ra yamni kabia luhpiam nani ra bara mulam nani ra sin smalkma.

Gâd Horeb ilka wina aisin

¹⁰ “Man nani Horeb ilka ra, Dawan Gâd lamara kapram ba piua ra, Dawan bui ai win: ‘Upla nani ba asla dauks bara yang bîli aisari ba wali, yang ra maiyuni kaia lan takbia, ai yua nani sut ra; ai luhpia nani ra sin smalkbia baha dauki kaia ba.’

¹¹ Man nani il munhta lamara waram, pauta kiasma taki purara uli, mukus siksa taki aipaswi kan.

¹² Baku kan ba ra, Dawan baha pauta lilapas wina aisin. Man nani lika witin aisi ba walram, kuna aisin walram ba tilara lilka kum kaikras kapram.

¹³ Dawan wal aisi daukan lâka ba mamrikan, baha sika lâ nani matawalsip ulban kata ba walpa ulbanka wâl ra, bara aisi wiaia dîa win ba daukaia.

¹⁴ Yang ra ai win lâ nani ba smalkaia, bara ban kasak ba kat dauki kaia tasba ra.

Aidul lâka dukiara kupia kraukan

¹⁵ “Horeb ilka ra Dawan pauta klauhan lilapas wina man nani wal aisin piua ra, lilka kumi sin man nani kaikras kapram. Bamna aman kaiks,

¹⁶ waitna, apia kaka mairin kra lilka bri paski baha wal kauhpara,

¹⁷ daiwan nani lilka, tnawira nani sin apia,

¹⁸ kwasi daiwra nani, inska nani sin apia.

¹⁹ Bara kasbrika ra, lapta, kati, slilma nani, slilma tara nani kaikma piua ra baha nani ra mayuni traika kaikan ra kauhpara, kan Dawan Gâdkam paskan sa tasba aiska uplika nani sut dukia.

²⁰ Ayan angkaia kubuska wina Dawan mai brih mai sakan, baha sika Idsip, nanara lika witin uplika ai dukia sa.

²¹ Ban sakuna, Dawan lika man nani pâtkam dukiara yang ra ai kupia sauhkan. Swer takan yang Jordan awala luamna apia, tasba man nani dukiam maikaia win ba ra sin dimamna apia.

²² Baku bamna yang Jordan ra luras, naha kuntrika ra pruamna. Man nani lika luma, tasbaya painkira ba ra pliskam brima.

²³ Sakuna aman kaiks, Dawan Gâd bui man nani wal ai lâka aisi daukan yaba âmya tikpara. Aidul lilka kumi sin daukpara, Dawan Gâd mita waihlam mai kulkan ba,

²⁴ kan Dawan Gâd lika lalawra Gâdka sa, pauta ami âpu taki ba baku.

²⁵ “Man nani luhpiam bara mulam nani brima piua ra, bara naha kuntrika ra almuk kama ba ra, lilka bahki nani paski dauki baha ra ai pura sunbia kaka baku saura dauki, Dawan Gâdkam kupia sauhki kama.

²⁶ Yang naiwa kasbrika purara bara tasba ra sin witniski brisni, Jordan baila wala kuntrika ra dimma ba ra man nani pat pali pruma. Baha tasbaya ra piua wihka raya kama apia, sakuna âpu pali mai daukbia.

²⁷ Dawan mita kiamka wala nani tilara mai yakabia, bara man tilam wina kulki baman raya kabia.

²⁸ Dus, walpa aidulka, gâd bahki upla mita daukan ba, sip kaikras sa, walaia sin walras sa, piaia sin piras sa, ai wingka puhbras ba, bahara man nani baha warkka daukma.

²⁹ Sakuna baha tilara Dawan Gâdkam ra pliks, kupiam aiska kira bara sulkam aiska kira, bara sâkma.

³⁰ Man nani naha pâtka inanka wina luma, bara Dawan ra tawi bal ai bîla wals.

³¹ Witin kupia yamni sa, lulki mai swibia apia, man nani damikam nani wal aisi yan lâka ba ai âuya lap tikbia apia.

³² “Blasi piua nani ra man nani pliki kaiks, Gâd upla ba tasba ra paskan. Tasba aiska ra makabi wals aima kum ra tânka brin bara naku diara tara kum takan.

³³ ¿Plis bâra sa ki man nani baku pauta ami kan tila wina Gâd aisin bîla baikra pat walan ba, bara uplika nani pruras kan ba?

³⁴ ¿Gâd wala bâk sakan ba ra kangbi, upla wala nani tilara tânka tara kaiki, sain nani wark aihkakira dauki, war aiklabi kira tasba ra ai karnika marikan, Dawan Gâdkam Idsip ra man nani mamta daukan kaikram ba?

³⁵ Baku marikan tânka briaia, Dawan Gâd ba aihwakira sa, witin wina wala âpu.

³⁶ Witin kasbrika pura wina aisin, kli wapni daukaia dukiara. Witin pauta klauhan tara marikan tasba ra, baha pata klauhan lilapas wina ai bîla baikra saki aisin.

³⁷ Witin bui man nani damikam nani ra latwan kaiki witin nani kiamka ra bâk sakan bara Idsip wina ai karnika tara ni pri sakan.

³⁸ Man nani mawan wina nisan kau ailal karnakira kan ba lulkan, nanara baku, tasbaya kuntrika aiska sut man nani dawanka kaia.

³⁹ “Baku ba mita, sinskam ra pain ulbi mangks Dawan ba Gâd sa, kasbrika pura bara tasba ra sin witin baku wala âpu sa.

⁴⁰ Ai lâka bîla nani naiwa maikisna na, man nani dauks, bara yamni kama, kiamkam nani ra sin. Dawan Gâd bui kuntrikam ban kaia ra maikuya ba ra pruras mani ailal raya banhwi kama.”

Jordan awala lalma tani ra yukuwi swakwaia tawanka nani ba

⁴¹ Baku bamna Moses lika tawan yumhpa bâk sakan, Jordan awala lalma ra,

⁴² upla kum kainara wal blauhras kan, sakuna ban ikbia kaka, baha tawanka kum ra yukuwi swakwaia dukiara.

⁴³ Tawanka nani ba naha nani kata: Béser, upla iwras tasbaya langnika ra, Ruben kiamka dukiara; Ramot, Galaad ra, Gad kiamka dukiara; bara Golán, Basán ra ba, Manasés kiamka bakriki ba dukiara.

Tâura pas aisinka bîla wal Lâ nani Matawalsip ba yaban

⁴⁴ Naha smalkanka nani sika Moses bui Israel luhpia nani ra yaban ba,

⁴⁵ bara ai lâka bîla nani kan smalkan ba, Idsip wina takan piua ra,

⁴⁶ witin nani Jordan lalma ra kan piua ra, Bet-peor mawan langnika ra, Sihón amorreo nani kingka tasbaya ra. Sihón lika Hesbón ra iwi kan, sakuna Moses bara Israel luhpia nani Idsip wina takan piua ra pura luan.

⁴⁷ Israel luhpia nani witin nani tasbaya ba yus munan, Og Basán kingka tasbaya ba, bara amorreo nani kingka wâl Jordan lalma tani ra iwi kan ba tasbaya ba sin.

⁴⁸ Witin nani tasbaya bîla yahpika ba Aroer kat kan, Arnón awalka pura kat, Sirión ilka ra, nina wala Hermón mâki ba,

⁴⁹ bara Arabá aiska, Jordan lalma ra, Kabu Pruan kat Pisgá ilka mununhta kat.