Kli Smalkanka 31 - DAWAN BÎLA AISKA

Moses watlika ra Jasua mangkan ba

¹ Moses bui Israel luhpia nani sut ra kli aisin, bara naku win:

² “Yang 120 mani brisna, bara yang karnika âpu sna kau namhpa namhpa taukaia. Ba purkara Dawan mita ai win, yang Jordan awalka ba luamna apia.

³ Sakuna Dawan Gâdkam man nani kainamra wapbia, minam taibanka ra naha nisanka nani ra sauhki âpu daukma, ai tasbaika nani briaia dukiara. Jasua man nani tâm bri baku kainamra wabia, Dawan win ba baku.

⁴ Dawan mita Sihón bara Og, amorreo kingka nani ra daukan ba baku, sim natka ra naha nisan nani ra sauhki tikbia.

⁵ Bara Dawan mita naha nisanka nani na man nani mihtam ra mangkbia piua ra, yang dîa man nani ra mai wîri ba kat daukma.

⁶ Kupiam karna bri ban bapi bûi bas. Si bripara, sirang sin iwpara witin nani aikuki prawma taim, kan Dawan Gâdkam ba man nani wal kabia bara mai swibia apia, lulki sin mai swibia apia.”

⁷ Ningkara Moses bui Jasua ra winan, bara Israel luhpia nani sut mawanra win: “Kupiam karna bri bapi bûi bas, kan man sika naha uplika nani ra brih waia sma, Dawan Gâd mita damikam nani ra yabaia win yaba kuntrika ra, bara man mita sin pliska nani yama.

⁸ Baha sim Dawanka man kainamra wabia bara man wal kabia, lulki yakan mai swibia apia; baha mita ban sibri kapara.”

Lâ aisi kaikaia traska nani ban swih tikaia manka ra

⁹ Moses naha lâka ulbi mangkan, bara Libait nani, prîs nani kan ba ra yaban, witin nani ai warkka kan Dawan lâka nani auhbaika ba twilki waia. Bara Israel almukka sut ra sin,

¹⁰ naha lâka nani sin yaban: “Mani 7 bani, traska ban swih tikaia lâka daukbia, baha piua ra Utla Papakni liliaka dauki piua ra,

¹¹ Israel uplika sut asla taki kabia piua ra, Dawan mita pliska bâk sakan ba ra, witin nani sut pali mawanra aisi kaikbia.

¹² Upla sut asla takan kaia sa, waitna, mairin bara tuktan sin, tringsar nani tawankam ra iwi ba sin lâka na aisi kaikan kabia, bara wali muni Dawan Gâdkam ra kulkaia ba lan takbia, bara ai ulbanka bilara dîa ulban ba kat sin trai kaikbia.

¹³ Baku man nani luhpiam nani, baha tânka briras ba sip kabia walaia, bara ai rayaka aiska ra Dawan Gâdkam ra kulkaia ba lan takbia, Jordan lui ningkara kuntrika pliskam briaisma ba ra.”

Dawan mita Moses ra lâ smalkanka yaban

¹⁴ Baha ningkara Dawan bui Moses ra win: “Kaiks, man prurikam ba pat baila sa; bara man Jasua ra wis man wal Dawan tintka watla ra balbia, bara yang bui witin purara warkka kahbaisna.” Bamna Moses lika Jasua wal Dawan wal aisaia watla ra wan.

¹⁵ Bahara Dawan ba witin nani ra kasbrika playka ra param takan bara kiamp durka kat buan.

¹⁶ Bara Dawan mita Moses ra win: “Man pat pruaisma, bara naha uplika nani na tringsar nani kuntrika ra dimbia ba ra aidulka nani wal aiblakwi, yang ra lulki ai swibia, bara witin nani wal lâ daukri ba slingwi tiwbia.

¹⁷ Sakuna yang kupi baiwanka witin nani purara klauhan kabia, bara yang bui witin nani ra lulki swimni. Witin nani dukiara sin lukamna apia, bara saura sari lâka nani baman balbia ai purara, bara wibia: ‘¿Yawan naha pâtka bri na, wan Gâdka yawan nani wal apia ba mita apia ki?’

¹⁸ Sakuna baha piua balbia ba ra, yang lika witin nani lama wina kau kitwi takamna, saura nani dauki kabia ba mita bara aidul wala nani ra mayunan ba mita sin.

¹⁹ “Bara nanara naha lawana ulbi Israel luhpia nani ra smalks aiwanaia dukiara, bara naha na witnis kaia witin nani ai mapara.

²⁰ Yang mita baha tasbaya tialka laya bara nasma wal lî aubi baku ai damika nani ra yabaia wîri ba ra yarka dimbia piua ra, witin nani plun pih aibanhbia, bara batanbia, bara gâd wala nani ninara wih mayunbia, bara yang ra bahki ai kulkbia, bara yang lâika ba wina dakwi takbia.

²¹ Sakuna pât saura nani bara sari lâka ai purara balbia piua ra, bara naha lawana na ai mapara witnis baku aiwanbia, kan ai kiamka nani ba kupia krawbia bara aiwanbia. Kan kau naha kuntrika yabaia wîri ba ra dimras kainara, pat kaikri ai lukanka nani anira tniwi ba.”

²² Baha pali yua ra Moses lâwanka ba ulban, bara Israel luhpia nani ra yaban lan takaia.

²³ Jasua, Nun luhpia ra lika, naha adarka yaban: “Kupiam karna bri bapi bûi bas. Kan man sika Israel luhpia nani tâ brih waia sma kuntrika yabaia wîri ba ra, yang lika man tnamya ra kamna.”

²⁴ Moses naha lâka wauhkataya kum ra ulban ba ra,

²⁵ Libait nani Dawan lâka nani auhbaika twilki waia adarka bri kan nani ba ra win:

²⁶ “Naha lâka wauhkataya na man nani bris, bara Dawan Gâd kum lâka auhbaia watla lamara swis, witnis baku kabia man nani mampa ra.

²⁷ Kan yang lika man nani kiamam karnika bara kupiam karnika ba sin kaikisni; naiwa bâra ban man nani tilamra raya sni, bara Dawan mapara buram, ¿nahki banhwi kama yang pruamna ningkara?

²⁸ Almuk nani ba bara kiamkam wihtka nani sin nâra bri bal; bara yang bui witin nani ra aisamni baha dukiara, bara kasbrika purara ba, tasba sin witin nani ai mapara witnis baku swimni.

²⁹ Kan kaikisni yang pruamna ningkara man nani saura yabaisma ba, yang yabal mamrikri ba wina tnaya ra tawaisma, bara baku sin nu sna naha ningkara man nani puramra pât saura nani balbia, Dawan nakra ra saura dauki kama ba mita; baha wal sin ai kupia baiwanka ba brima.”

Moses lawana

³⁰ Baku bamna, Moses naha lawana na dukiara aisin, tâ wina tnata kat Israel uplika sut asla takan kan ba mawanra: