Kli Smalkanka 30 - DAWAN BÎLA AISKA

Nahki dauki Dawan ra kli tawi balaia yamnika ba

¹ “Bara yang sturi aisari ba sut man nani puramra balbia, yamnika bara lahtubanka wal maikri ba, ani ba brima. Dawan Gâdkam mita nisan nani tilara mai lulkan kabia, baha dukiara luki kaikma.

² Bara Dawan ra kli tawi balma kupiam wina, sulkam wina. Ai kupia lâka nani ba daukma, man nani bara man nani luhpiam nani sin, naiwa yang adar maikisna baku.

³ Baku bamna, Dawan mita man nani ra umpira mai kaiki alba ra kapram ba wina kli mai bri balbia. Dawan mita upla nani tilara lulki mai swin kan ba,

⁴ bara man nani uplikam tasbaya wina alki tasba wala laihura bri si yakaban tauki ba, Dawan Gâdkam bui baha kat wih pliki kli bri balbia.

⁵ Dawan mita daukbia man nani kli tawi damikam nani kuntrika ra balaia, witin nani iwi kan ba ra man nani mita yus munma; bahara witin mai daukbia luhpiam nani kau ailal sahwaia damikam nani sahwan ba wal.

⁶ Man nani kupiam ra lâ aisi daukan sainka ba mangkbia bara kiamkam nani ra sin, bara kupiam wina bara sulkam aiska ni latwan kaikma raya kaia dukiara.

⁷ Dawan mita naha lahtubanka nani man nani waihlam nani purara blîkbia, bara misbara mai kaiki bliki nani ra sin.

⁸ Bara man nani lika Dawan ra kli tawi bal ai bîla walma, bara ai lâka bîla nani naiwa yang maikisna na trai kaikma.

⁹ Baku bamna, man nani sut daukma ba Dawan mita ailal maikbia, luhpiam nani ra, daiwram luhpia nani ra, patam mâ, Dawan Gâd bui man nani ra pain lukbia, damikam nani ra lukan ba baku.

¹⁰ Dawan man nani Gâdkam lâka naha wauhkataya ra ulban yana man nani ai bîla wali baha kat daukma kaka, bara kli kupiam wina, sulkam wina witin ra tawi balma.

¹¹ “Naha lâka naiwa yang maikisna na, ban pali karna apia sa; man nani mampa ra, man nani wina laihura apia sa.

¹² Kasbrika purara apia sa, man wiaia: ‘¿Ya sip sa yawan wan watlika ra kasbrika purara uli waia, bara yawan ra bri balaia bara wan marikaia bara yawan daukaia?’

¹³ Kabu baila wala ra sin apia sa, bara wiaia: ‘¿Ya wabia kabu baila wala ra, yawan wan watlika ra wabia, bara yawan ra bri balaia, wan marikaia bara yawan daukaia?’

¹⁴ Baku daukaia watlika ra lâ nani ba man nani lamam pali kat sa. Man nani unam nani ra bara lukankam nani ra sa, man nani baha daukaia sip sma ba kat.

¹⁵ “Bara kaiks naiwa man nani mamwanra rayaka bara yamnika ba swisna, prura bara saurka ba, bara ani ba brima.

¹⁶ Naiwa adar maikisna na bîla walma kaka, bara Dawan Gâdkam ra latwan kaiki bara ai yabalka nina bliki, bara ai lâka bîla nani ba kat daukma sa kaka, raya kama, luhpa sin ailal brima, bara Dawan Gâdkam bui yamni mai munbia kuntrika pliskam briaisma ba ra.

¹⁷ Sakuna naha sut man nani walras swi si, gâd wala nani mawanra lulam kriki bawi mayunpara,

¹⁸ kan yang bui man nani ra nanara mahka mai wisna, man nani pruma, baha kuntrika pura lui dukiam briaisma ba ra. Piu wihka raya kama apia, Jordan baila wala ra luma ba ningkara.

¹⁹ Naiwa yua ra, kasbrika pura ba bara tasba ba wal man nani mamwanra witniskam bris. Raya kaia bara prura ba wal, mamwanra swisatna ani ba brima dukiara, yamnika bara lahtubanka sin. Bamna bris rayaka ba man nani raya kaia dukiara bara kiamkam nani sin.

²⁰ Dawan Gâdkam ra man nani latwan kaiki bas, bîla wali dauki kasak bas, kan man nani rayakam ba witin wina sa bamna. Bara mani ailal baha kuntrika ra iwma, damikam nani ra Dawan Ebraham ra, Aisak ra bara Jekob ra yabaia win ba.”