Kli Smalkanka 22 - DAWAN BÎLA AISKA

¹ “Man nani kaikram uplikam kum bîpka, apia kaka sîpka kra tiwan sa kaka, tânka briras sma wiaia apia, sakuna uplikam ra bri si yas.

² Sakuna uplika ba lamara iwras, man kakaira sin apia sma kaka, bara sip sma daiwra ba wamtla ra bri kaia bara dawanka pliki balbia taim laki kli yas.

³ Biriku kum kra tiwbia kaka, kwala tiwbia kaka, upla dukia dîa dîa tiwbia kaka bara man nani wina tânka bri si, tânka briras baku kaia apia.

⁴ “Man nani tilam wina uplikam kum daiwra, biriku, bîpka kum kra kauhan sa kaka, witin dukiara aihka lukpara, sakuna hilp muns bukaia.

⁵ “Mairin ba waitna kwalka dimaia apia, waitna sin mairin kwalka dimaia apia, kan ani uplika baku dauki ba Dawan mita saura kaikisa.

⁶ “Upla kum yabal ra auya sa bara daiwan tnawira kum dus ra, apia kaka tasba ra ai mahbra alki bawisa kaka, yaptika bara luhpia ba sut alkaia apia;

⁷ sakuna luhpia ba baman alkaia, kuna yaptika ba lika swika wabia, baku yamni kama tasba ra bara piuam sin yari kabia.

⁸ “Upla kum kra utla raya kum paskaisa kaka, barandika mawan ba kutbi lakbia, baku lika sip sa tamya ba pâtkas kaia upla kum baha kauhi prubia kaka.

⁹ “Man nani wainkam mangkaia nasla ra saumuk wala nani sin mangkpara, kan mâ krikaia piua ra mâ pain maikbia apia, wainkam mâ nani ba sauhkbia.

¹⁰ “Tasba baikaia taim bîp biriku wal twilkaika mangki yarka baikbiara.

¹¹ “Prâk maman ba sîp taya bara linin ni kwala daukan ba wal praki sippara.

¹² “Prâka mahta yarika tani walhwal ra, kwalka awa yari pitban nani ni wilki banhs.

Waitna ai maya tiara aihwa bri nina sauhki lâka ba

¹³ “Waitna kum bui mairin kum ra ai maya kaia brisa, bara wal asla takan ningkara sip latwan kaikras kaka,

¹⁴ bara unsabi witin sturka saura aisi wisa: ‘Yang naha mairka wal briri, kuna bri wal asla taki kaikri taim pat yabal ra takan kan.’

¹⁵ Baku kaka tiarika aisika bara yaptika ba bui sunuka lâka tânka ba tawan almukka nani lâka mawanra brih wabia,

¹⁶ bara tiara aisika ba bui almuk nani ra wibia: ‘Yang bui naha waitnika ra luhpi ba maya yabri, kuna nanara want apia wisi swisa.

¹⁷ Bara luhpi na sunu apia wisi unsabi dahra sakisa. Ban sakuna, witin nahki kan ba tânka nâra sa.’ Bara krikri ra palkaia kwalka ba almuk nani mawanra palkbia.

¹⁸ Bara witin nani mita waitnika ra alki klala yabia,

¹⁹ kan Israel ra tuktan mairin kum sunu kan nina sauhkan ba tâwan pâtka ra laki yabia silbar mâ 100 aisika ra aibapbia. Bara swiaia wauhkataya daukras kira ai rayaka aiska ra ai maya bri kabia.

²⁰ “Sakuna tiarika tânka ba laki kaikka sunu apia kaka,

²¹ saura lâka tara pali dauki Israel purara ai aisa watla bilara sin swira lâka bri balan ba ra, aisika watla bîla wina saki latara bri si, tawan waitnika nani mita walpa ni sabi ikbia. Baku lika saurka lâka man nani tilamra âpu kabia.

²² “Waitna kum mairin kum ai maya bri kaka wal prawbia kaka, wâlsut pruaia pâtka ra tawbia. Baku lika man nani saurka lâka Israel ra sâkma ba âpu daukaia sip kama.

²³ “Tiara sunu kum waitna kum wal pramis daukan, bara tiarika ba tawan waitnika wala wal prawbia sa kaka,

²⁴ tawan lâka watla mawanra wâlsut brih wabia, bahara pât ra laki walpa ni sabi ikbia. Tiarika ba tawan bîla kat kan bara hilp makabras kan ba tâwan, waitnika ba ai uplika maya takaia kan ba kulkras kan ba dukiara. Baku lika saurka lâka man nani tilamra âpu daukma.

²⁵ “Sakuna waitna kum tiara sunu kum insla ra prawbia bara waitna wala wal pramis takan sa ai maya briaia, bara taiban lâka ra wal prawbia kaka, mairka wal prawan waitnika ba baman pruaia pâtka ra lakbia.

²⁶ Tiara ba ra lika saura takras, kan witin pruaia pâtka kumi sin daukras sa bamna; waitna kum mita waitna wala ra aiklabi ikbia ba, sim natka ra sa;

²⁷ kan tiara ba insla ra yakan kan wal prawan, bara witin wini kisban kaka, upla wali bal dakbi sakaia apia kan ba mita.

²⁸ “Waitna tiara kum ba kaikka sunu sa, kau pramis daukras ai maya briaia, bara taiban lâka ra witin wal yapbia bara param takbia kaka,

²⁹ baku kaka waitnika ba tiarika aisika ra silbar mâ 50 aibapbia; bara swira daukan tâwan ai maya bribia, swiaia wauhkataya sip daukbia apia ai rayaka aiska ra.

³⁰ “Upla kumi sip ai aisa maya wal prawaia apia sa, baku sa kaka witin wal lâ krikisa.