Kli Smalkanka 2 - DAWAN BÎLA AISKA

Upla iwras tasbaya ra taukan piua nani ba

¹ “Baha ningkara yang nani Kabu Pauni ra waia yabalka bâk upla iwras tasbaya ra wari, Dawan bui yang ra ai win adarka ba baku, bara piu wihka Seír ilka lama bâk wapi tauki katna.

² Bamna Dawan bui ai win:

³ ‘Pat piua wihka naha ilka nani tilara taukisma; nanara man nani yahbra tani ra was.

⁴ Nahara upla nani ra naku wis: Man nani Israel kiamka nani tasbaya bâk lui waia sma, witin nani Seír tasbaya ra iwi ba Isau kiamka, man nani tamya nani sa. Witin nani lika man nani sîam sa; ban sakuna man nani kasak kainam kaiki bas,

⁵ bara man nani lika witin wal unsapara, kan baha tasbaya wina yang pîs kum sin maikaia apia sna, kan Seír ilka tasbaya nani ba Isau kiamka nani tasbaya yang yabri.

⁶ Man nani patam witin nani wina atki bris, dîa want sma ba sut, lî dima mana ba sin aibaps.’

⁷ Dawan bara man nani Gâdkam man nani diara sut daukram ba purara, ai yamnika maikan. Mani 40 witin ba man nani wal kan, main mai kaikan, upla iwras tasbaya tara ra, sakuna bahara man nani diara kumi sin luha apia kapram.

⁸ “Baha wina yang nani Arabá ra Elat ra Esión-guéber ra waia yabalka ba swiri, bara wan taya Isau kiamka nani Seír ra iwi ba tasbaya bâk lui wari, bara baha wina wapi tawi wari Moab ra waia yabalka ra, upla iwras tasbaya ra.

⁹ Bamna Dawan bui ai win: ‘Moab uplika nani ra trabil munpara, saura sin munpara, kan witin nani ba Lot kiamka nani sa. Baha kuntrika wina man nani tasba pîs lupia sin brima apia, yang bui Ar tasbaya ba witin nani ai dukia yabri bamna.’

¹⁰ (Ar tasbaya ba, blasi pali piua ra emita nani bâra kan, upla ailal kan, upla tarka tara nani, nana yari, Anac masraka talia uplika nani bâra iwi kan.

¹¹ Upla nani mita kulkanka yabi pali kan ba lika, baha nani ba refaíta nani, sakuna Moab uplika nani bui lika kulkanka yabi kan emita nani ra.

¹² Seír tasbaya ba, blasi piua ra, Hor uplika nani bâra iwi kan. Sakuna Isau kiamka nani bal dimi, witin nani ba iki âpu daukan. Witin nani baha tasbaya ra iwan ba ra, Dawan ba Israel ra tasba yaban tawanka ra witin nani daukata ba baku, naha nani ra sin daukan.)

¹³ ‘Bara nanara —Dawan bîla ai win—, man nani impaki Zéred tingnika baila wala ra lus.’ Bara yang nani tingnika ba baila wala ra luri.

¹⁴ “Yang nani Cadés-barnea wina taki, Zéred tingnika lui banhri ba kat, 38 mani alkan, Dawan swer taki aisin ba baku, waitna nani war aiklabi tauki kan ba sut prui tiwan ba kat.

¹⁵ Dawan karnika ba witin nani mapara kan bamna, baku sut prui luan.

¹⁶ “War aiklabi waitnika nani kan ba, kumi sin takaskras kan, sut pruan. Bara

¹⁷ ba kat Dawan bui yang ra aisi, naku ai win:

¹⁸ ‘Naiwa pali man nani Moab tasbaya piarkika ba lui dims, bara mahka Ar ra waia impaks.

¹⁹ Sakuna Amón uplika nani wal prawma kaka, baha nani sin Lot kiamka nani sa; witin nani ra watawi munpara, wal aiklapara, baha nani tasbaya wina sin tasba pîs lupia pan maikamna apia, tasbaya ba yang pat yabri witin nani ai dukia.’

²⁰ (Naha kuntrika na sin refaíta nani tasbaya kata, kan blasi pali piua ra refaíta nani bahara iwi kan, Amón uplika nani mita baha nani ra Sumsum uplika nani win.

²¹ Witin nani tawan tara, upla ailal pali kan, tarka tara, braka yari, nana sin yari, Anac masraka baku kan. Sakuna Dawan bui Amón uplika nani mihta ra swin âpu daukan, bara witin nani baha tasbaya ra takaskan.

²² Baha uplika nani trabil brin ba, Isau kiamka bui Hor uplika nani Seír tasbaya ra iwi kan âpu dauki witin nani baha tasbaya brih iwan ba wal baku sa.

²³ Heveo nani ra sin baku takan, witin nani Gaza tawanka lupia nani ra iwi kan ba, bara filisteo nani, Creta wina bal âpu dauki, bara witin nani baha tasbaya ra iwan.)

²⁴ Baha ningkara, Dawan bui yang ra ai win: ‘¡Man nani kainamra was bara Arnón awala baila wala ra lus! Sihón amorreo ba, Hesbón kingka ba tasbaya sin yang bui man nani mihtam ra mangkaisna. Bamna tasbaya ra dims bara mapara aiklas.

²⁵ Naiwa yua wina, yang bui man nani mamwanra Hesbón uplika nani lukanka ra sibrin dingkamna. Bara man nani sturkam aisi kaka walbia ba ra, sibrin tara witin nani ra alkbia bara tatatwi kabia.’

Israel luhpia nani bui Sihón pura luan

²⁶ “Cademot upla iwras tasbaya saura ba wina, upla nani blikri, Sihón, Hesbón kingka ra wiaia, wan uplika pali takaia natka ra naha lukanka na kahbaia

²⁷ ‘Yang lukisni yabal tara ba nina bliki ban man tasbayam bâk lui waia, tasbayam yabalka wala nani ra dimras kira.

²⁸ Yang nani plun want sna bara lî want sna ba mana ba lalah ni aibapamna. Baman mamkabisni wan swima bahak lui waia.

²⁹ Isau kiamka nani Seír ra iwi ba ra, Moab uplika nani Ar ra iwi ba, yang nani wal pramis daukan ba baku, yang nani Jordan awala ba lui bara Dawan yang nani Gâdki mita kuntri kum aikaia win ya ba ra wamna ba kat.’

³⁰ “Sakuna king Sihón ba baku brin daukras sa yawan ai tasbaya lila bâk lui wabia, Dawan, man nani Gâdkam mita, witin ba apia mai wiaia, lal karna daukan, man nani mihtam ra mangkaia, naiwa yua param taki ba.

³¹ “Bamna Dawan bui ai win: ‘Nanara Sihón bara ai kuntrika ba sut man mihtam ra mangkisa, bara mahka tasbaya ba dimi bris.’

³² “Sihón ai suliarka aikuki, Jahas kat bal takan wan mapara aiklabaia.

³³ Sakuna Dawan wan Gâdka mita wan mihta ra mangkan bara yang nani mita pura luri, ai luhpia nani bara ai suliarka nani ra sin.

³⁴ Tawanka tara nani sut yang nani karniki munhtara kauhan, bara dîa witin nani ra takaia kan ba yang nani yabri. Waitna nani, mairin nani, tuktan nani sut iki banhri, upla raya kumi sin swiras.

³⁵ Yang nani dakbi briri tawanka nani wina alkri ba daiwan nani, diara mana tara dukia nani baman bri banhri.

³⁶ Aroer tawanka tara Arnón awala un ra bâra ba, bara tawan tara il bîla ra bâra ba wina ba Galaad kat, tawan kumi sin karnika âpu kan wan mapara bûi aiklabaia. Dawan wan Gâdka mita baha nani sut ba yawan mihta ra kauhaia daukan.

³⁷ Yawan naha tawanka nani baman sauhkras swin, Dawan adar wankras kan bamna: Amón uplika nani tawanka, Jaboc awala tasbaya nani, il tasbaya tawanka nani ba, bara tawan wala nani baha lamara iwi ba sin.