Kli Smalkanka 12 - DAWAN BÎLA AISKA

Holikira kulkan pliska

¹ “Naha lâka nani sika man nani rayakam aiska ra trai kaiki kaia sma ba Dawan, damikam nani Gâdka mita tasba maikaia ba brima ba ra.

² “Man nani baha uplika nani pura luaia auma ba, witin nani ai gâdka nani ra ai pura sunaia pliska nani bri sut sauhki âpu dauks: il nani ra, kiuhsi nani ra bara dus tara nani distika ra.

³ Ai altarka nani ba slingbi tiki, walpaya nani ba sin pîs ra baman dauks, bara playka nani bapi ba ra mayuni nani ba sut angks lubia. Gâd bahki lilka nani ba sut sauhki tiks, nina ulban pliska nani ba sin diki sâks.

⁴ “Baku natka ra man nani Dawan Gâdkam ra mayunaia apia sma.

⁵ Man nani kiamkam ra, Dawan bui plis kum saki maikbia witin ai nina bâra kaia pliska, bara man nani baha pliska ra wih mayuni kama.

⁶ Bahara witin ai nina ra luki daiwan nani angki sakripais dauki kama, bara matawalsip mânka nani, mihtam warkka, wan kupia wina prisantka nani brih wama, baku sin daiwram tawahkia nani wina sin.

⁷ Warkkam nani ra patam mâ ra, Dawan Gâdkam yamni munan ba, bahara witin lamara kaiki ba ra, pih tamya nani aikuki lilia takma.

⁸ “Nahara yawan dauki ba baku, bahara daukaia apia, yawan kumi bani wan lukanka ra pain daukisa luki dauki ba.

⁹ Kasak sika naha piua kat man nani âmyapah kaia pliska ra kau dimras sma, Dawan Gâdkam man nani ra prapati baku maikaia win tasbaya ba.

¹⁰ Sakuna piua kum man nani Jordan lui, bara baha kuntrika witin maikaia win ba ra iwma, bara waihlam nani mai kutbi ba wina pri kama, bara sibrin sin mai daukbia apia,

¹¹ bara Dawan Gâdkam witin ai nina bâra kaia pliska kum bâk saki maikbia ba, bahara diara sut yang mai wîri ba baku man nani sakripais daukma: witin ai nina ra daiwan angkan sakripaiska daukma, matawalsip mânka nani, prisantka nani, bara diara sut wahbi saki Dawan ra yabaia pramis daukan ba sin witin ra yama.

¹² Dawan Gâdkam mawanra luhpiam albikam nani aikuki lilia daukma, bara Libait uplika man nani tilamra iwi kabia ba aikuki sin, kan witin nani ba man nani tilamra tasbaya ba wina ai dukia briras bamna.

¹³ “Aman kaiki bas ani ani pliska ra man nani bui Dawan ra daiwan angki yabi kaia apia sma;

¹⁴ Dawan bui man nani kiamkam bani tila wina wahbi mai sâkbia ba pliska ra baman man nani baha dauki kama. Bahara yang bui man nani ra adar maikri ba baku daukma.

¹⁵ “Ban sakuna, man nani sip sma ani piua ra kabia daiwan iki piaia uplikam nani tilara, Dawan Gâdkam ai yamnika nani maikan ba wina. Man nani puram suni klin takras kama sakuna, man nani sut piaia sip kama.

¹⁶ Sakuna tâlia ba piaia apia sma, kuna lî baku tasba ra laiks.

¹⁷ “Man nani tawankam bilara, plawarkam matawalsipka ba wina piaia apia, wainkam wina sin apia, batankam laya wina sin apia, daiwram nani tawahkia sin apia, Dawan ra prisant yabaia pramis daukram ba wina sin apia, prisant nani kupiam wina daukram ba sin apia.

¹⁸ Dawan Gâdkam ani pliska witin aihka saki maikbia ba ra baman daukaia sip kama; bahara, man nani Dawan Gâdkam mawanra bara luhpiam nani wihki albikam nani aikuki asla, bara Libait nani man nani tilamra iwbia ba aikuki, man nani mihtam warkka nani daukisma mâ nani ba wal lilia kama.

¹⁹ Man nani baha kuntrika ra iwma ba ra, Libait nani ra ban lulki swipara.

²⁰ “Dawan Gâdkam man nani ra tasbayam kau tara maikaia win ba maikbia ba piua ra, dîa wîna pin mai daukbia ba, man nani ani ani piua ra piaia sip kama.

²¹ Sakuna Dawan Gâdkam bui ai nina bâra kaia dukiara plis kum aihka sakan ba, man nani iwisma ba wina laihura sa kaka, yang mai wîri ba baku bîpkam bara sîpkam nani Dawan wina maikan ba, sip sma man nani bahara iwma ba ra iki piaia.

²² Snapuka bara sula wîna piaia lâka ba sin baku kulkan sa, man nani sut sip sma baha piaia, puram suni klin takram, apia kaka klin takras kama sin.

²³ Sakuna natka kumi ra sin tâlia ba piaia sma, kan tala ba rayaka sa; baku bamna rayaka wihki wîna aikuki asla piaia apia sma.

²⁴ Man nani daukaia sma ba lika, tasba ra lî baku laikaia.

²⁵ Pipara, bara man nani lika Dawan nakra ra wapni baman daukisma tâwan, man nani bara luhpiam nani ra yamni baman wabia.

²⁶ Sakuna prisant nani yamni munan ba, pramis daukan dukia nani ba, Dawan bui aihka sakan ba pliska ra brih was,

²⁷ bamna bahara Dawan Gâd altarka purara sakripais dauki yas. Daiwan man nani sakripais daukma tâlia ba, Dawan altarka purara laiks, sakuna wîna ba lika sip sma piaia.

²⁸ “Yang dîa man nani ra mai wîri ba alki dauks, bamna man nani bara luhpiam nani ra sin, ban yamni baman waia dukiara, Dawan nakra ra wapni baman dauki kapram ba mita.

Aidul mapara smalkan ba

^29-30 “Dawan mita nisan nani man nani bui pura luaisma ba, sauhki tikbia, bara sauhki tikbia ningkara, tasbaya ba man nani brih bâra iws. Sakuna aman kaiks, baha nisanka nani daukanka ninara lika wapara, ai aidulka ninara tauki, mayunaia lukanka sin bripara.

³¹ Baku Dawan Gâdkam ra daukpara, kan bahki kulkan dukia nani ba sika, baha nisanka nani ai gâdka ra mayuni ba, Dawan pain kaikras ban ai luhpia nani sin, pauta ra sakripais daukisa.

³² “Ban main kaiki bri, yang dîa mai wîri ba alki brih trai kaiks daukaia, pura prakaia apia, dakbi sin sakaia apia.