Kli Smalkanka 11 - DAWAN BÎLA AISKA

Dawan ba tara sa

¹ “Man nani bui Dawan Gâdkam ra latwan kaiks, bara ai lâka nani ba kat dauks piu bani ra, ai lâka nani maikan ba ban bri bas.

² Dawan Gâdkam mita kli wapni mai sâkbia kakaira bas, man nani luhpiam nani tânka briras kan, kaikras kan sin. Witin tara sa bara ai mihta sin karnakira ba kakaira bas,

³ Idsip ra king fero mapara bara ai kuntrika sut purara sain tara nani daukan.

⁴ Idsip aiklaklabrika man nani ninam bliki kan piua ra, Dawan mita ai araska, war aiklabaia wagin nani ra nahki Kabu Pauni laya ra rungki ban kaia ra sauhki âpu tikan.

⁵ Upla iwras tasbaya ra man nani dukiamra diara sut daukan ba kupiam krauki bas, nâra balram na baha dukiara kupiam krauki bas;

⁶ bamna Datán bara Abiram, Eliab luhpia nani Ruben kiamka nani, ai taya nani bara kiampka ra diara sut bri kan ba, tasba kwâki langkan, bara Israel luhpia nani sut kaikan.

⁷ Man nani sika Dawan diara tara nani daukan ba witniska nani.

Pramis tasbaya yamnika nani ba

⁸ “Man nani lâ nani naiwa maikri ba kat dauks, bara man nani kuntri dakbi pliskam briaisma ba ra karna kama,

⁹ bara Dawan bui man nani damikam bara ai kiamka nani ra yabaia pramis munan tasbaya ra, mani ailal raya kama; nasma bara tialka laya lî aubi baku tasbaya ra.

¹⁰ Man nani tasba dakbi briaisma ba, Idsip wina takram tasbaya ba baku apia sa; bahara plun mâ man nani minam ni mangki kapram, kaupin bilara baku,

¹¹ kuna kuntri man nani pliskam briaisma ba, il nani kuntrika bara langni ra, kasbrika pura wina laya srikban sa.

¹² Tasba kum sa Dawan mita main kaiki ba, mani aiska ai nakra baha tasbaya ra kaikisa.

¹³ “Kupiam aiska kira, sulkam aiska kira Dawan Gâdkam ra latwan kaiki mayuni, bara ai lâka nani mamrikan ba ban dauki kama.

¹⁴ Witin mita daukbia mani piua lî auhaia piua ba sin piua kat brih balaia, bara man nani plawarkam dâki wainkam bara batana laya sin brima.

¹⁵ Baku sin man nani daiwram nani pata twi sin yaka pâwbia, bara man nani plun ailal bri kama.

¹⁶ Sakuna aman kaiks, kunin mai munbiara gâd wala nani ra mayuni, witin nani mawan ra bawi Dawankam wina tnaya ra tawpara.

¹⁷ Kan Dawan bui man nani ra ai kupia sauhki lî blîkbia apia, bara tasba ba plun mâ nani takras kaka, man nani baha tasbaya disang Dawan maikaia ba ra prui tiwma.

¹⁸ “Naha bîla nani na kupiam ra bara sinskam ra alki bris; mihtam ra bara lamla purara sin sain baku mangks.

¹⁹ Baha nani dukiara luhpiam nani ra aisi smalki bas, wamtla ra kama, yabal ra kama sin, bara aitnikisma piua ra, krikrikam wina kli buisma piua ra sin.

²⁰ Wamtla playa nani ra bara durkam nani ra sin ulbi mangks,

²¹ Dawan mita damikam nani ra tasba yabaia pramis daukan ba ra man nani rayakam, luhpiam nani rayaka sin yari daukbia, tasba purara kasbrika bâra ba baku.

²² “Naiwa naha lâka maikisna, man nani sut kasak alki brih trai kaiki, bara Dawan Gâdkam ra latwan kaiki ai yabalka sut ra kasak nina blîkma kaka,

²³ Dawan bui man nani mamwan wina baha nisanka sut saki lulkbia, bara man nani tawan kau tara karnakira ba dakbi brima.

²⁴ Man nani anira minam taima ba, bahara man nani takaskma. Tasbayam piarkika ba, upla iwras tasbaya wina Líbano kat kabia, kli Éufrates awala wina Mediterráneo kabuka ba kat kabia.

²⁵ Upla kumi sin mampara bubia apia. Sibrin bara ai sringka mai bribia tasbaya sut ra luma ba ra, Dawan Gâdkam pramis mai munan baku, witin tâm bribia.

²⁶ “Yang naha yua man nani ra maikisna: yamni ba bara saura ba wal, man nani kaikma ani ba briaia.

²⁷ Yamni ba brima, Dawan Gâd bîla wali ai lâka nani naiwa maikri ba kat daukma kaka.

²⁸ Saura mai kulkbia, gâd kum man nani kakaira apia sma ba ninara wama kaka, Dawan Gâdkam lâka nani lulki swi, ai lâka nani naiwa maikisna na wina tnaya ra tawma kaka.

²⁹ “Dawan Gâd bui kuntri kum man nani dakbi briaia maiki ba ra dimma taim, Guerizim ilka ra yamnika ba swibia, Ebal ilka ra saura kulkan ba swibia.

³⁰ Naha ilka nani na Kenan uplika nani il âpu tasbaya ra sa, Jordan baila wala muna tani ba sait ra sa, Guilgal mawan kat bara Moré wal lamara sa.

³¹ Man nani ba Jordan luaia pat baila sma ba ra, Dawan Gâd mita kuntrika maikuya ba dakbi briaia. Dakbi brima piua ra bâra iwi kama,

³² naiwa lâ nani sut man nani mihtam ra maikri ba trai kaiki dauks.