Jona 4 - DAWAN BÎLA AISKA

Jona ai kupia baikan ba

¹ Gâd baku daukan ba Jona laik apia takan, bara kasak ai kupia baikan.

² Bara Dawan ra ai pura suni, naku win: —Kaiks, Dawan, naha naku takaia ba yang pat aisari kan kau waitla ra katna ba ra. Baha mita sika Tarsis ra aihni plapaia lukatna ba, kan yang kaikisna man kupiam lukra ba swapni sa, upla ra kupiam baiki si kli pat umpira kaikisma, upla ra latwan pali kaikisma ba mita rausauhkaia pâli si, kli pat kupiam lakisma.

³ Dawan, baha mita sika mamkabisna, yang rayaki na sâkma. Pruamna ba kanra yamni sa ban raya kaia ba wal.

⁴ Sakuna Dawan pana witin ra win: —¿Man baku kupiam baikisma ba aitani lukisma ki?

⁵ Jona tawan wina taki lalma tani ra wih, dus wahia kahbi baha distika ra iwi kan, baha wina tawan ba ra dîa takbia sapa kaiki kan.

⁶ Dawan Gâd mita daukan pispis kiwka sâtka kum saki muni Jona lal pura tani ra mangkan, kau dista yabi kupia lilia daukaia mata. Baha distika ba wal Jona ai âuyapah pali takan.

⁷ Bara yapra wala titan, Gâd mita liwa kum blikan pispiska wahia kata ba pin.

⁸ Yu ulan ba ra, Gâd daukan lalma payaska lapta krawaia, bara yu laptika ba Jona lal kat angkan; bara mahka sinska tiwi kan, bara witin pruaia kat lukan. Witin naku aisin: —Yang pruaia kanra yamni, raya kamna ba wal.

⁹ Sakuna Gâd pana witin ra aisin: —¿Man aitani lukisma ki naha pispiska pruan ba dukiara kupiam baikaia? —¡Âu, yang aitani lukisna! —Jona pana win—. ¡Yang pruamna kat sin aitani lukisna!

¹⁰ Dawan kli pana witin ra aisin: —Pispiska mâ na man mangkras, man sin pakras kapram; tihmia kumi pâwi tihmia wala pruan, ban sakuna baha dukiara man kupiam swapni takisa.

¹¹ Bamna yang kau pali Ninibi dukiara kupi swapni takaia sa, baha tawanka tara ra 120,000 upla nani tuktan baku ai tânka briras banhwi ba bâra sa, daiwan sin ailal pali sa.