Jona 3 - DAWAN BÎLA AISKA

Ninibi uplika nani kasak lukan ba

¹ Dawan bui kli Jona ra aisin, bara naku win:

² “Bus, Ninibi tawanka tara ra was, yang mai wimna dîa smalkaia sma ba.”

^3-4 Jona buan bara mahka Ninibi ra wan, bara witin dîa daukaia Dawan win ba kat daukan. Ninibi sika tawan tara pali kan, tawan aiska ra waia kaka yu yumhpa wapaia kan. Tawan ra dimi yu kum wapan bara ai bîla baikra tara wini aisin: “¡Yu yawanaiska wâl bilka ra, Ninibi tawanka na sauhki tikan kabia!”

⁵ Tawan ra iwi uplika nani sut, tara nani sirpi nani Gâd ra kasak lukan; witin nani lâ daukan plun piaia apia, ai kupia lakan sari tara alkan tânka marikaia upla sut kwala siksa diman.

⁶ Bara Ninibi kingka sturi ba walan, witin ai iwaika ba wina bûi si ai kwalka painkira ba daikan bara witin sin kwala siksa dimi tasba kat iwan.

⁷ Baha wina wihta tara nani ba aikuki sin tawan aiska ra naku lâ daukan: “Upla kumi sin plun pibiara. Baku sin daiwan nani sut ra plun lî dakakbia apia.

⁸ Sakuna upla sut ba ai kwalka siksa dimaia sa sari tukinka ba, bara upla sut ai karnika aiska Gâd ra ai pura sunaia sa. Bara upla kumi bani ai tânka saura bri bara lâ krikanka nani dauki ba, nanara mahka swibia;

⁹ yawan baku daukbia kaka, ban kra Gâd wan lawbia apia, bara yawan raya kabia.”

¹⁰ Ninibi uplika nani dîa dauki ba Gâd kaikan, nahki witin nani ai tânka saura swin ba; bara witin ai kupia wal lâ daukan bara saura munaia wisata ba kli swin.