Jona 2 - DAWAN BÎLA AISKA

Jona ai pura sunan ba

¹ Bara Jona inska tara klungka ba wina Dawan ai Gâdka ra ai pura suni,

² naku aisin: “Yang pâtki tara tila wina, Dawan, man ra winri, bara man pana yang ra aisaram. Prura tihuka tara nani ba wina man ra winri, bara man bui yang ra walram.

³ Kabu tihuka pali ba ra ai lulkram, lî aubra warbrika nani tila kat. Kabu tilrika tara nani blikram ba yang purik lui kan.

⁴ Yang lukri man lamam wina ai saki ai lulkram; tempelkam holikira ba kli kaikamna apia wîri.

⁵ Lî nani ba kir ai kutban; tihuka tara ba yang purira ai bikan; inska pata tâiwa ra blaki kan.

⁶ Tihuka tara pali mununhtara ai rungkram; baha kat yang daira walri, silak watla ra ban bâra kaia ai mangkram ba. Sakuna man, Dawan, yang Gâdki, prura wina swaki ai sakram.

⁷ Daira walri bara pat prui kapri ba ra, Dawan, man ra kupi tanh krawan; bara puri sunra ba man kat ulan, tempelkam watla holikira ba kat.

⁸ Gâd bahki nani nina bliki banhwi ba, man ra kasak lukaia lâka ba mahka swisa;

⁹ sakuna yang lika, tingki mai wiaia sakripaiska ba dauki maikamni; dîa dauki maikaia mai wîri ba daukamna. ¡Dawan, man baman upla swaki sakaia sip sma!”

¹⁰ Bara Dawan mita ban baku daukan, inska tara ba Jona bri si ai bîlak aikabi sakaia kabu un ra.