Joel 3 - DAWAN BÎLA AISKA

¹ Dawan aisisa: “Baha piua nani bal aimakbia ba ra, yang daukamna, upla nani Juda bara Jerusalem wina saki alba briaia priski brih wan nani ba kli balaia.

² Nisan nani ba sut asla kukamna, bara Josafat ilka bîla ra brih wamna; bara yang bui witin nani lâka daukamna, witin nani, yang upliki Israel luhpia nani ra munan ba tâwan. Witin nani mita, Israel luhpia nani ba munan, ai tasbaya wina taki tasba wala nani ra plapan, bara tasbaya ba witin ai mânka taki yui ai dukia brin.

³ Lat lulki kaiki, yang upliki nani ba yui brin, tuktan waitna nani bara tuktan mairin nani ba atkan, ningkara lalahka nani ba rug mairin nani wal yapaia mana brin, bara wain diaia nani ra yus munan.

Dawan lâ daukuya nisan nani mapara

⁴ “Tiro, Sidón bara Filistea, ¿man nani ba yang wina dîa brin mai daukisa ki? ¿Man nani pana diara ai munaia lukisma ki? ¿Diara kum mana, yang wina sakaia lukisma ki? Man nani pana ai munaia lukisma kaka, ¡man nani dîa daukram ba nanara pali lamla purara blikamna!

⁵ Man nani bui yang silbarki, gulki impliki brih waram; duki kukanka nani ba brih man nani gâdkam paskram nani ba watla ra suni swiram.

⁶ Juda wina bara Jerusalem uplika nani ba, man nani mita Grik uplika nani ra atkram, witin nani ba ai tasbaya wina laih pali ra blikaia dukiara.

⁷ Sakuna baha tasbaya ba wina, yang bui kli witin nani ba saki bri balamna, bara man nani dîa witin nani ra munram ba mana, yang sin man nani ra mai kulkamna.

⁸ Luhpiam waitna nani, luhpiam mairin nani ba sin Ju nani ra atkamna, witin nani kli tawi sabeo nani ra atkaia, laih tasba wala ra brih waia. Yang, Dawan, baku daukaia aisari.”

⁹ Man nani naha dahra na nisan nani sut ra maisa paks: ¡War holikira ba mahka dauks! ¡Kupia karna nani ba paiws balbia! Bali banhbia bara war aiklaklabra nani ba ai tâura wabia.

¹⁰ Tasba tukbaika nani ba ni, sord nani paski bris, mâ klakaia sord nani ba sin, langsa nani dauki bris, bara swapni ba witin aisabia: “¡Nanara yang karna sna!”

¹¹ Nisan nani, wals, man nani wan lama kir iwi banhwi nani sma ba sin, ¡man nani aihni muni taks! ¡Dawan, nanara aiklaklabra kum karnakira nani ba blîkka balbia!

¹² Nisan nani sut ridi taks, upla sut Josafat ilka bîla ra man nani was; Dawan aula nisan nani sut wan lama kir iwi nani ba, lâka bahara daukaia.

¹³ Witin nani ba watawikira pali aihwa sa bamna, plawar mâ pihwan klaki baku, witin nani ba klaks. Kan dâkaia piua ba pat aimakan sa, witin nani ba minam ra tais wain mâ ra taibi ba baku; kan pat ridi pali sa wain laya ba paskaia.

¹⁴ Upla ailal bâra sa Dawan ai kupia wal lâ daukan ba ilka bîla ra, kan pat baila sa Dawan yua ba.

¹⁵ Lapta bara kati sin, tihmia tara pali takuya, slilma nani ingnika ba sin tiwuya.

¹⁶ Jerusalem Saion ilka ba wina Dawan aisabia bîla baikra ba alwani binka baku walbia, bara kasbrika tasba sin mahka tatatwi kabia. Sakuna Dawan ba ai uplika nani, Israel luhpia nani ba, yukuwaika kan kahbaika ban kabia.

Juda ai prana briaia yua ba kli aula

¹⁷ “Baha yua ra man nani kaikma, yang Dawan, man nani Gâdkam sna ba, yang Saion ra iwisna, ilki holikira ba ra. Jerusalem ba tawan holikira kum kabia; nisan nani bal kli pura lui dakbi bribia apia.

¹⁸ Baha yua ra wain, bîp tialka laya ba sin il nani, kiuhsi nani wina lî laiwi baku laiwi kabia, Juda tingnika nani ba, lî banhki pura laiwi kabia. Bara tempelka wina lî kârma kum taki Sitim ilka bîla kat laiwi kabia.

¹⁹ Idsip slingban ba baku ban kabia, Edom sin twi saura tasbaya upla bâra iwras ba baha ban kabia, witin nani mita sika Juda uplika nani ba pâtkas kan, mapara aiklabi tala laiki ikan bamna.

^20-21 Pruan nani ba tâwan yang pana witin nani ra munamni, pâtkira pâtka ba, ban swih tikamna apia. Sakuna Juda bara Jerusalem ra upla bâra iwi ban kabia, bara yang, Dawan, Saion ilka ra iwi kamna.”