Joel 2 - DAWAN BÎLA AISKA

¹ Saion ilka purara man nani trumpit ba puhbi bas; Dawan ilka holikira ba purara, man nani bin tara dauks, Juda ra iwi nani ba sut tatatwi kabia, kan Dawan yua aula ba, pat baila sa bamna:

² tihmia tara bara mukus nani yua, kasbrika nani bara dista yua. Suldiar karnakira daknika tara kum unta nani purara bal iwan sa, lalma kahbi ingnika ba baku sa. Baha sât dukia takan upla kau kaikras kan, kli baku sin takka kaikbia apia, diara kum talika baku sin apia.

Kruhkru nani bui sauhki tikanka

³ Witin nani ba pauta klauhan baku sa, diara sut angki âpu daukisa; kau bal lui waras ba ra, kainara diara sut angkisa, bal lui wan ba ningkara, kau ban angkisa. Witin kau balras ba ra, tasba ba insla disang painkira kum baku sa, witin nani bal lui wan ba ra, tasba kum bîla man ba baku dauki swin sa. ¡Bahara diara kumi sin swak takras, sut âpu daukan!

⁴ Wan nakra kaiki ba ra, suldiar araska nani plapi war aiklabi ba talika sa,

⁵ unta ra, il nani purara, witin nani pâli ba binka lika, war aiklabaia waginka nani binka taki ba baku sa, dus wahia lâwan nani ami kan binka taki ba baku. Witin nani suldiar ailal karnakira, daknika kum war aiklabaia bal taki buan ba baku sa.

⁶ Upla witin nani ra kaiki ba ra tatatwisa, ai mawan tâlia sin âpu takisa.

⁷ War uplika kupia karnakira nani ba baku, ai tâ kat plapisa ban tawan kutbanka nani pura bâk sin uli auya, ai yabalka ba wina wiria pan tnaya ra tawras.

⁸ Pana pana ai walka mina ra sin taibi platukbras; kumi bani ai yabalka bîla kat auya, trisba kauhi ba mapara, insauhkras, turwi aihka sin takras dimi wisa.

⁹ Witin nani bui tawan ba dahra walras alkisa; kutbanka nani pura bâk uli plapisa, utla nani ra sin ulisa, âimplikra baku windar nani bâk bilara dimisa.

¹⁰ Tasba ba witin nani ai mawanra nikwisa, purara kasbrika ba sin tatatwisa, lapta bara kati sin ai ingnika ingras, slilma nani ba sin ingnika âpu takisa.

¹¹ Dawan ba, ai uplika kwâra tara ba kainara aimaki, ai bîla baikra ba alwani binka baku yaban walisa. Ai karnika ba tara pali sa, witin ai adarka bîla nani wali dauki nani ba, sip kulki sakras sa. ¡Dawan yua ba nahki tara sa, sibrin tara yua sa! ¿Ya sip sa witin ai mapara buaia?

Dawan kupia pihni ba tânka

¹² “Sakuna nanara —Dawan naku param pali aisisa—, man nani kupiam brinka aiska kira, kli yang ra tawi bal. ¡Kaiki plun wahwi banhs, kisbi wini banhs, bara sin namkra laya sarikira bal!”

¹³ Man nani, Dawan Gâdkam ra kli tawi bal, bara kupiam brinka saura ba kalki sâks, prâmka kalkaia watlika ra, Dawan ba kupia lukra swapni lupia sa, umpira kaikan lâka sin brisa, ai kupia alki takaskisa, latwan kaikan lâka sin marikisa, wilin sa klala maiki ba, mahka takaskaia sin.

¹⁴ Ban kra witin, man nani ra kli lukbia ba ra, kau ban klala maiki kabia apia, sakuna ai yamnika ni, puramra blîkbia: plun mâ nani, wain sin blîkbia, Dawan Gâdkam ra prisant nani dauki yabaia dukiara.

¹⁵ ¡Man nani trumpit ba, Saion ilka ra puhbi bas! Upla nani ba paiws balbia, witin nani ra wis, kaiki plun wahwi banhbia;

¹⁶ Dawan uplika nani ba, asla kuki bris, bara sunu dauki banhs; tawan tâ uplika, lâ dadaukra almuk nani ba, asla dauki banhs, tuktan nani, tuktan swap nani tiala di ba sin sut asla dauks. ¡Bisi pali marit takan nani ba sin, ai watla wina taki balbia wis!

¹⁷ Prîs nani, Dawan dukia dadaukra nani, ini banhs, bara tempel ra dimi waia bîla bara altar ba wal lila kat bûi, naku wis: “Dawan, uplikam nani pâtka na ban kulkpara; swirka upla wala nani mita uplikam nani ra ban lawaska kiki kabiara; swirka nisan wala nani ba mita, pura wihtka aimaki kabiara, upla idan nani ba sin aisabiara: ‘¿Man nani Dawankam ba anira sa?’ ”

¹⁸ Baha daukan ba kat, Dawan ai tasbaya dukiara latwan kaiki ba marikan; ai uplika nani dukiara ai kupia swapni taki ba tânka sin marikan,

¹⁹ bara Dawan bui witin nani ra win: “Yang bui man nani ra plawar mâ, wain mâ, oliv mâ batanka laya sin blikamna, man nani âmyapah takma ba kat; bara idan nani ba, swirka kli man nani lamwaska kiki kabia apia.

²⁰ Kruhkru nani yahbra wina man ra aula ba, man wina laihura sakamna bara upla iwras tasbaya ra man lulkamni. Kabu Pruan ra tâura daknika ba, yarka sut kwapi prubia, bara ninara aula daknika ba sin, Kabu Mediterráneo ra rungkamna, bahara wîna ba sukwi, bisbaya takbia. ¡Yang diara tara nani daukaisna!”

²¹ Tasba, man si bripara, âmyapah liliam pali bas; Dawan diara tara nani daukaia sa bamna.

²² ¡Daiwan wail nani, man nani si bripara! Twi lâwan nani ba, kli sangni takbia, dus nani ba kli ai mâ sâkbia, kwah damni nani bara wain mâ nani ailal pali kabia.

²³ ¡Saion ra iwi uplika nani, man nani sin liliam bas, Dawan Gâdkam ra liliam pali bas! Lî ailal ai piua kat witin mita yaban auhisa, kauhla piua ra bara baku sin lî piua ra yaban auhisa, blasi lî ai piua kat auhi kata ba, nanara sin kli baku yan auhisa.

²⁴ Bara plawar mâ ailal krikan kabia, wain mâ sin ailal pali takbia, batana laya sin pura laiwi kabia.

²⁵ “Yang bui man nani mampara kruhkru nani blikri rau mai sauhki banhwaia dukiara, kruhkru daknika tara, klala maikaia blikri ba tâka, man nani namsla bîla wina mâ nani sakras kapram ba, baha mana aiska sut yang kli mai aibapamna.

²⁶ Man nani pi âmyapah pali takaia praiska kat pima, bara Dawan Gâdkam ra mayunma, man nani dukiamra yang diara tara aihkakira nani daukri bamna. Yang upliki nani swira daukan ba yabrika ban kabia apia,

²⁷ bara man nani, Israel luhpia nani, yang lika man nani Dawankam, man nani wal ban sna ba tânka kaikma, yang lika man nani Gâdkam sna, man nani lika gâd wala âpu. ¡Yang upliki nani swira daukan ba, swira lâka ba munhtara ban kabia apia!

Gâd spiritka ba aula

²⁸ “Naha diara nani ba sut ba bal taki lubia ba ningkara, spiritki ba tasba uplika nani sut purara iwaia blikamna; luhpiam waitna nani bara luhpiam mairin nani sin Gâd dahra aisi kabia, almuk nani yaprisauhkan kaikbia, wahma bara tiara nani sin, naika diara aihka kaikbia.

²⁹ Baha yua ra yang spiritki ba alba waitna nani, alba mairin nani purara sin iwaia blikamna;

³⁰ diara tara aihkakira nani kasbrika purara tasba ra kaikaia sip ba marikamna; tala, pauta klauhan, kasbrika, mukus tasba wina taki ba.

³¹ Dawan yua tara sibrinkira aula ba, kau balras ba kainara lapta ingnika ba tihmia tara man takbia, bara kati ba sin, pauni tala baku takbia.”

³² Sakuna ya ya Dawan ra makabi ai pura sunbia ba, baha nani pruras swak takbia. Saion ilka Jerusalem ra swaki sakan lâka ba bâra kabia bamna, Dawan pramiska baku takbia win ba baha bîla kat aimakbia. Witin mita bâk sakan uplika nani baman, pruras raya kabia.”