Joel 1 - DAWAN BÎLA AISKA

Plun mâ nani ba, kruhkru nani bal sut pin

¹ Naha bîla nani sika, Dawan mita Petuel luhpia waitna Joel ra aisin ba.

² Tawan almukka nani, naha na pain wali banhs, naha tasbaya ra iwi banhwisma nani sin sut. ¿Naha sut pâtka tara na, man nani piuam ra pat takan kaikram ki? ¿Aisikam nani yua ra sin, naha sât pâtka nani takan kaikan kata ki?

³ Naha pâtka tara takan sturka na, luhpiam nani ra aisi smalks; bara witin nani sin ai luhpia nani ra sturka na wibia, bara baha luhpia nani mita sin ai kiamka nani ra aisi kabia.

⁴ Kruhkru nani ba kli bal plun mâ nani ba pih danh daukan, bara dîa kau piras swin kan ba wala nani balan baha nani mita pih âpu daukan.

⁵ ¡Bla tatakra nani, man nani bla lâka wina rawi bus! ¡Wain dadira nani, iwi ini banhs, kan bîlam wina, wain laya ba sin sakuya bamna!

⁶ Kan kruhkru nani ba, aiklaklabra karnakira nani daknika tara baku, ai napa nani ba layan napa baku, napa yarika ba layan mairin kum napa baku, tawanka ba kutban sa.

⁷ Wan wainka kiwka nani kata ba sut pin sa, wan kwah damni dusa wahia nani kata ba sin sut pin; bara dusa taya baman swin sa, tnawa nani ba pihni diara âpu swin sa.

⁸ Nanara kwala siksa dimi, tiara kum ai waitnika wal ai maya kan pruan ba dukiara inisa baku,

⁹ prîs nani ba baku inbia; kan pura sunaia watla ra plun mâ prisantka bara wain laya sin Dawan ra brih waia nanara âpu sa.

¹⁰ Insla nani bilara diara âpu dauki swin sa, tasba ba kwala siksa dimi sari sa. Plawar mâ nani ba âpu takan, wain nasla ra, wain kiwka nani ba sut lâwan, oliv dusa nani ba sin sut srawan oliv batana laya sin âpu.

¹¹ Man nani, insla bara wain nasla dadaukra nani, tasba ra kauhi sari brih ini banhs; plawar mâ bara barli mâ nani mangkan ba sut, tasba kat tiwan bamna.

¹² Wain nasla ra, wain kiwka nani ba sut lâwan, bara kwah damni dusa nani sin sut pruan. Drap nani, supa sâtka dusa nani ba sin lâwan, mâ damni saki dusa nani sut sin, bara dus mâ sâtka wala nani insla ra bâra kan ba lâwan sa. ¡Bara baku sin upla nani liliaka ba sut srawi lui âpu takan sa!

¹³ Prîs nani, Dawan altarka ra dukia dadaukra nani, man nani kwala siksa dims, bara sari tara brih, altar lamara wih ini banhs. Nanara man nani Dawankam tempelka ra piaia bara diaia prisantka nani brih waia âpu takan bamna.

¹⁴ Upla sut ra paiws bara kaiki plun piras tânka ba, dauki banhs; tâ uplika almuk nani bara kuntri ra iwi uplika nani ba sut, Dawan tempelka ra asla dauks, bara ningkara Dawan ra puram suni banhs.

¹⁵ ¡Dawan ai warkka daukaia yua ba, pat baila pali sa! ¡Yua saura pali kabia, sauhki tikanka tara kabia upla nani purara, Dawan karnika tara bri ba mita baha ba brih aula bamna!

¹⁶ ¿Yang nani naikra kat, pati nani sut âpu daukan apia? ¿Bara Gâd tempelka liliaka ba sin, sut âpu daukan apia?

¹⁷ Saumuk nani tasba ra mangkan ba, baha kat sut pruan, plawar mâ âpu takan, plun mâ nani sunaia pliska ba ba mahka aisawi dringwisa.

¹⁸ ¡Daiwan uhbi ba baku! Bîp nani ba, bahki ra wataukisa twi pliki, sîp daknika ba sin sut pruisa.

¹⁹ ¡Dawanki, yang sarikira pali man ra puri sunisna, kan pauta klauhan mita angkan sa upla iwras tasbaya ra twi bara dus nani ba sut âpu pali daukan sa!

²⁰ ¡Daiwan wail nani ba sin man ra inisa, tingni laya nani lâwan ba mita; twi untika nani ba sut, pauta klauhi amisa!