Job 9 - DAWAN BÎLA AISKA

Job

^1-2 Bamna Job pana aisi, win: Âu, yang kasak daihra walisna baha ba baku takan ba, nahki upla ba Dawan mawanra pâtkas sa wisi aisi ai raitka bribia.

³ Upla kumi ai raitka briaia wibia, witin wal aisi blahwi natka ra, Gâd mita pana diara tânka tausin dukiara makabi walbia kaka, upla pana diara tânka kumi dukiara sin mapara aisaia âpu kabia.

⁴ Gâd ba tara pali sa karna kaia lâka mapa ra, bara sins lâka mapa ra sin, ¿bamna ya sip sa witin mapara aiklabi pura lui si pri kaia?

⁵ Gâd ai lawanka wal il nani ba kitbisa; baha nani batakisa bara upla kumi sin baha tânka briras sa.

⁶ Witin tasba nikban nani blikisa, tasba ai playka bapanka nani ba sin munan nikwisa.

⁷ Witin lâ mangkisa wan yu ba bal takaia apia, slilma nani ba sin ai ingnika sakaia apia.

⁸ Witin lika upla kumi wina hilpka briras kasbrika ba paskan, kabu daiwra saura ba sin ai mina ra taibi ikan.

⁹ Slilma nani daknika ba witin paskan; slilma daknika lilka ba Pupu, Yar, Kiswa, bara slilma daknika wala nani sin waupasa tani ra kasbrika ra bâra ba.

¹⁰ ¡Witin diara manis tara aihkakira nani daukisa, baha diara nani ba upla mita sip tânka briras pali sa!

¹¹ Gâd ba laimak bal lubia kaka sin yang sip kaikamna apia; tnaiya ra lui wabia ba ra sip sin tânka briras kamna.

¹² Witin diara kum dawanka takbia kaka, ¿ya sip sa makabaia dîa witin dauki ba dukiara?

¹³ Gâd ba lawbia kaka, pat pali sip kupia slakras sa; Rahab aikuki ai tâ baiki waihla nani mapara bûi nani ba sut ai mina ra taibi swira daukisa.

¹⁴ ¿Bamna nahki pali, dîa bîla nani aisi sakamna Dawan mapara aisaia?

¹⁵ Yang na dîa sât pâtkas kamna kra sin, sakuna mapara aisaia diara âpu sna; witin sika lâika dadaukra ba, bamna naha baman lika makabisna, witin bui yang ra umpira ai kaikbia.

¹⁶ Lâ ra paiwamna kaka, bara witin ba yang wal aisaia wabia kaka, yang sip lukras sna bîli nani ba wali alki bribia.

¹⁷ Pâsa saura blîkbia ba ra ai pruki ai sauhkaia, pâtkas pali yang wîni ra diara sin âpu sakuna, insauhkanki nani ba kau ailal takaia sip sa;

¹⁸ kau kupi saurka lâka ni aibanhbia kra, bara ai swika wingki sin puhbamna apia kra.

¹⁹ ¿Karnika lâka bri ba plikaia? Witin ba kau karnika brisa ¿Lâ ra balaia paiwaia? ¿Bara ya mita munka bal lâ mawanra bubia?

²⁰ Yang na wapni pali kamna kra, ban sin tâski âpu kamna sin, sakuna witin mita ban ai wibia, yang na pâtkira bara saurakira.

²¹ Yang na pâtkas sna kra, ¿sakuna baha ba dîa sa? Yang pat swapri pali sna raya kaia.

²² Diara nani sut ba, wal aikuki kumi baku sa. Bara naha tânka sika kaikisna ba: Witin mita pâtkira nani ba bara pâtkas nani ba sin, sut aikuki baku sauhki tikisa.

²³ Pât saura tara kum tilara upla pâtkas nani pruisa kaka, Gâd bui witin nani ra kaiki lawaska kikisa bîla kaikanka âpu prui ba.

²⁴ Tasba na saurakira nani mihta ra swisa, lâ dadaukra nani ra nakra wilkisa. Bara baha ba Gâd wina apia kaka, ¿ya wina kabia ni?

²⁵ Yui nani ba karna plapisa, tasba ra lilia tânka ba kaikras pali.

²⁶ Duri tara nani karna plapi ba baku ninara auya, yakal ai daiwra alkaia ninara karna plapi auya ba baku sin.

²⁷ Pâtki na âiya tikaia munamna, bara lilia baku takamna,

²⁸ sakuna wîni latwanka saura nani ba sut mita kli tawi sirang ai ikisa, yang nu sna Gâd ba lukras sa yang na pâtkas sna.

²⁹ Bara witin mita pâtkira ai kulkisa kaka, yang ra hilp kumi sin âpu kau trai munaia hilpki plikaia.

³⁰ Sup ni mihti nani ba sikbamna kaka, bara tâski sikbi sakaika sin sikbamna kra,

³¹ Gâd mita drapapa tâski luklukia ra ai dingkbia, bara yang kwailka pali mita ba sin tâski pali ai kulkbia.

³² Waitna wala kumi wal baku, yang mita sip Gâd wal maiwan kat aisaras, bara sip wimna apia, kaisa yawan wal lâ mawanra waia.

³³ Aitani lukaina wan tilara lâ dadaukra kum kata, witin sin karnika bri kan kata, yawan wâl wan purara.

³⁴ Bara Gâd klala aiki ba takaskaia kan, kau sibrin ai dingki ba sin tikaia.

³⁵ Baku lika sibrin âpu ban aisaia, yang lukras sna man mampara saura daukri.