Job 8 - DAWAN BÎLA AISKA

Bildad

^1-2 Bildad Súah tasbaya wina ba naku aisi, win: ¿Ahkia kat ba baku aisi kaia sma ki, aisinkam ba lika prari payaska karna krawi ba wal baku karna aisisma ba?

³ Gâd karnika sut bri ba, aima kumi sin kasakka lâka ba bara wapni lâka ba wal warbi laki aisaras.

⁴ Kasak pali man luhpiam nani Gâd mapara saura daukan kaia sa, bara witin dîa klala witin nani ra yabaia kan ba yaban sa.

⁵ Bamna Gâd pliks, karnika sut bri Gâdka ba, bara makas umpira mai kaikbia.

⁶ Man ba sunu wapni aihwaki kama kaka, witin mita aihwaki mai kaiki kabia, kasakka lâka kat wamtla, luhpiam, dukiam nani ba kli maikbia.

⁷ Yuyaka man bri katma ba lika baha ba bahki sa, naika ra man dukiam nani briaia sma ba wal praki kaikbia ba ra.

⁸ Damikam nani ra makabi wals, bara witin nani diara tânka kaiki kan ba tânka wina man sin diara tânka kaikaia lâka brima.

⁹ Yawan nani lika nahwala uplika sa, bara diara tânka briras; wan yua nani na tasba ra lui auya dista kumi baku.

¹⁰ Sakuna damikam nani ba sip sa mai wiaia, bamna witin nani diara tânka uya pali mai smalkbia.

¹¹ Bamna snati bara papiru ba lî manis bri ba tasbaya ra baman pâwisa.

¹² Lî ba lâwras ba ra sangni pâwisa, ban sakuna lî ba lâwan ba ra, baha nani pas lâwisa inma wala nani ba kau lâwras ba ra.

¹³ Saurakira nani ba sin baha baku takisa, Gâd ra ai âuya tiki nani ba, bîla kaikanka nani bri ba sut saura baman takisa.

¹⁴ Ai kasak lukanka lâka ba bara diara briaia bîla kaiki ba sut lika, anansi watla ba baku swapni sa.

¹⁵ Brinka kabia trit awa mina sirpi ba ra alkaia, kuna sip karna apia kabia; apia kaka anansi watla ba ra ai tâ baiki kaia, bara sip tâ baikras kabia.

¹⁶ Upla saura nani ba lika, inma wahia nani sangni insla bilara pâwi ba baku sa, insla kutban aiska ra lalamisa.

¹⁷ Ai wakia nani ba walpa taya purara aiblakwisa, bara ban walpa nani ra prak prawisa.

¹⁸ Sakuna baha ba wina upla kum mita sâkbia kaka, upla kumi sin tânka bribia apia bahara dîa pâwi kan ba.

¹⁹ Baku ai pâwanka lâka ba tnata alkisa, bara ai watlika ra inma wala nani pâwisa.

²⁰ Bamna Gâd mita tâski âpu uplika ba sip lulki swiras sa, watawikira nani ra sin tâ baikanka lâka yabras sa.

²¹ Witin mita maikbia kli kiki kaia, bara lilia mita sin mai munka puram wini kama.

²² Sakuna tani wala ra, waihlam nani ba witin mita swira lâka ni ai pura prakan kabia, bara saurakira nani watla ba lika sauhki tikan kabia.