Job 7 - DAWAN BÎLA AISKA

¹ Upla rayaka naha tasba ra ba lika suldiar kum rayaka baku sa, dîa daukaia win ba dauki tnata alkaia sa.

² Alba kumi dista ra dimaia dukiara ai bahkia puhbi ba baku sa, wark uplika kum ai mana briaia ba bîla kaiki ba baku sa.

³ Kunin ai munan kati nani aiska bahki baman iwi kaia, tihmia bani pât wahwi katna.

⁴ Aitnikuna ba ra tnata âpu baku daihra walisna, aikarwi tawan baman, lalma kahbi kat ba yang swapisna, bara sin lukisna: ¿Ahkia yang buamna ki?

⁵ Wîni tara aiska na liwa pali baman sa, bara sukwan blaska nani sin; bara taiya purara insauhkan nani ba, sukwi mabiara taki laiwisa.

⁶ Yui nani ba tnata alkuya sa, bîla kaikanka âpu kira, kwala mamaia masinka pat pali mami ba baku sa.

⁷ Ay, Gâd, kupiam krauks yang rayaki ba lika wan wingka puhbra kumi baku sa, bara yu kumi sin kli lilia brimna apia sa.

⁸ Upla kumi sin kli ai kaikbia apia; namkra ba yang kat mangki ai kaiks, bara yang kau ban raya kamna apia.

^9-10 Kasbrika pihni lui wi lap tiwi ba, baku sa sika upla kumi raiti bilara aimaki ba: baha wina kli sin tawi balras sa, ai taya nani bui ai mawan ba kli sin kaikbia apia.

¹¹ Baha mita, yang sip sâp kapras; latwan pâtka wahwisna na tila wina, brukwanki nani ba param pali aisi kaia sna.

¹² ¿Dîa yang na kabu daiwra tara saura pali baku namkra ra aihka sna, baha mita aihwaki ai kaikisma ki?

¹³ Ban kra sin lukisna krikri ra baman riski briaia lâka ba sakamna, bara yapamna ba ra pâtki nani ba wina ingni takbia,

¹⁴ yang yaprisauhkan tilara sirang ai ikisma, ¡wîni wirha dingki sirang ai ikisma!

¹⁵ Kanra yamni kabia wingki praki ai ikma kaka, kau yamni sa pruaia ba wihki raya kaia ba wal.

¹⁶ Yang kau sip apia sna, kau raya kaia brin ai daukras sa, ai swis kupia kumi lâka ra, kan rayaki ba lika wan wingka puhbra kumi baku sa.

¹⁷ ¿Upla ba dîa sa, bara uya pali tara kulkisma ba? ¿Dîa muni upla ba dukiara uya pali lukisma ba?

¹⁸ ¿Dîa muni aihwaki kaikisma yu bani ra, bara pat pat sin tânka pliki kaikisma?

¹⁹ ¿Dîa muni namkra yang wina lakras sma ba, ai swirka bîli laya sin sip langkras sna ba?

²⁰ Saura daukamna kaka, ¿man ra dîa mai munisna, silak watla aihwawakra? ¿Dîa muni trisbaikam nakra baku ai brisma ba? ¿Yang na man puramra karbanka wirha kum sna ki?

²¹ ¿Saurki ba ban sip swih tikras sma ki? ¿Watawi daukri ba sip pâtki swih tikras sma ki? Pat pali tasba yamhpuska tilara prawi kamna; ai plikma ba ra, âpu kamna.