Job 6 - DAWAN BÎLA AISKA

Job

^1-2 Bamna Job pana aisi, naku win: Yang wîni latwanka, sairka, yang umpirki pâtka lâka nani sut na, paun mangki kaikbia kaka,

³ kabu auhika ba wal kau wirha kaia kan. Baha mita latwan lâka wal aisari.

⁴ Gâd karnika sut bri ba mita ai trisbaika nani ni ai saban sa, bara baha puisinka nani ba wîni aiska ra plapisa. Gâd maipara aiklabi ba mita sibrin ai daukisa.

⁵ ¿Biriku ba twi piaia bri kabia kaka, ban inbia ki? ¿Bîp wainhka nani sin twi piaia bri kabia kaka, ban uhbi kabia ki?

⁶ ¿Ya plun sâlkas bara auhni sin âpu ba ban pibia ki? ¿Plun kum kauhla ba dîa auhnika bâra kabia ki?

⁷ Aima kumi sin naha pata sâtka piaia apia lukri ba, nanara baha ba pati pisna.

⁸ ¡Aitani lukamna dîa makabamna ba Gâd aikbia kaka! ¡Aitani lukamna dîa brin ai dauki ba dauki aikbia kaka!

⁹ ¡Aitani kabia, Gâd ban lukbia kaka, rayaki na tuyukbi âpu ai daukbia kaka!

¹⁰ Wîni latwanka nani saura ai taiban ba mita, yang ra maisi nihkra tara kum kabia, bamna piu bani Gâd kasakkira lâka ba holikira kulkri.

¹¹ Mapara buaia karnika âpu sna, bara aitani apia sna ban raya kaia.

¹² Wîni na walpa baku karna apia sa, bras karnika baku sin apia sa.

¹³ Yang pali wîni ra karniki âpu sna, yakan yang wîni na swaki sakaia, bara karnika wala wal tâi baikaia sin âpu sna.

¹⁴ Upla kum pât wahwi ba pânika mita latwan kaikaia sa, Gâd, karnika sut bri ba wal, ai lâka ba ban wapni apia kra kabia sin.

¹⁵ Sakuna man nani upliki nani, yang maipara tiwram sa, tingni kumi lâwan ba baku.

¹⁶ Lî lâwi mâyara iwan ba buhutni takisa, sno wihki lî klaswan abalki ba baku.

¹⁷ Kauhla piua ba luan ba ra, lî kârma nani ba sut sin lâwisa, lapta piua ba aula ba ra, lî ban danh takisa.

¹⁸ Upla kwâra lî pliki aula ba ai yabalka ba tiki, upla iwras tasbaya yabalka ra wapi, lî diran mita ban pruisa.

¹⁹ Impapakra daknika nani Temá bara Sabá wina ba, baha tingnika nani ba kaikaia pali plikisa.

²⁰ Sakuna witin nani baha kat wan, bara kaiki muni sari takan; bîla kaiki kata ba kat sari lâka ra takaskan.

²¹ Baku sma man nani ba yang maipa ra: pâtki tara na kaiki sibrin takisma.

²² Sakuna yang mita lika man nani ra diara kumi sin makabras, upla ra yang rayaki swaki sakaia dukiara lalah aibapbia sin,

²³ apia kra waihli kum mihta wina kra ai dakbi ai sâkbia, ban kra upla âikra saura nani mihta wina sin kra ai dakbi ai sakaia wiras sni.

²⁴ Man nani kupia kraukanka bîla nani ai smalks bara sâp takamna, swakwanki daukri nani ba mairiks.

²⁵ Upla kumi sin âpu sa, diara kasak wan smalkan bîla ba walaia apia wibia ba, sakuna man nani lika pâtkas daihra kwahkram sa.

²⁶ Bîli wal aisinka nani ba tâka mita, man nani lâika dauki, maipara saura aisi banhwisma, aisinki taniskira nani pâsa wal lui wan ba.

²⁷ Man nani sip sma rau kum rayaka wal sin pulaia, bara pâmnika pali ba sin atkaia.

²⁸ Ai kaiks nanara maiwan kat, bara ai wis kunin aisisna sapa.

²⁹ Man nani aisinkam ba bahki ra laks, watawikira baku kapara; laki kaiki banhs yang raitki bri aisisna ba.

³⁰ ¿Dîa ban kra lukisma, yang na kuninkira kum sna, dîa aisisna ba tânka sip briras sna?