Job 5 - DAWAN BÎLA AISKA

¹ Job, upla kum ra wins, ya pana mai winbia sapa kaikaia. ¿Man ani insalka ra plapi waisma ki?

² Sari lâka ra, apia kaka kupiam pât wahwanka ra kauhaia ba, pat ban pruaia ra wan brih wisa.

³ Yang kaikri upla pûlkira nani ba diara sut mapa ra pâwaia trai munisa, ban sakuna pat pali ai watla ba slingbi âpu daukan sa.

⁴ Ai luhpia nani ra hilp munaia upla âpu sa; lâ dadaukra nani ba mita pâtkira pali baku kulkan sa; witin nani tâwan aisaia upla âpu sa.

⁵ Ai pata mâ nani kriki auhban ba plun wahwi nani ba mita bal pîsa, kiaya tila nani wina sin mâ sakisa, bara diran dauki nani ba mita ai yuyaka ba tâwan witin ra tumisa.

⁶ Saurka lâka ba tasba wina pâwi bal takras, sari lâka ba sin tasba wina urhwi takras.

⁷ Upla mita sika sari lâka pliki sakisa, pauta klauhan yuyaka biulwi ba baku.

⁸ Man wamtlika ra, yang bui Gâd ra kaikamna, bara trabilki nani sut ai mihta ra swimna.

⁹ Witin sika diara tara aihkakira nani uya daukisa, baha diara nani ba upla sip tânka briras sa.

¹⁰ Witin yaban tasba ra lî auhisa, bara baku tasba ba lî buskisa,

¹¹ bawikira nani ba witin mita purara bukisa, sari bri ini nani ba, witin bui lilia daukisa;

¹² kuninkira nani diara daukaia ai kupia ra luki paski ba sauhki tikisa, bara lukanka ba batakisa.

¹³ Kuninkira ba ai kuninka lâka ba ni prak alkisa, bara dîa dîa daukaia luki ba sut krikisa.

¹⁴ ¡Kakna yu ingnika pali ra, tihmia ra baku upla traika kaiki taukisa; kunin prâka siksa ba dimi, kakna ra tihmia baku wataukisa!

¹⁵ Umpira bara taiban lâka ra uplika ba, watawikira upla tataibra nani ba mihta wina, Dawan mita bâk swaki sakisa.

¹⁶ Witin sika swapnikira nani bîla kaikanka ba, ¡witin mita sika saurakira nani bîla ba prakisa!

¹⁷ Dawan mita yaura lawi dauki uplika ba, upla liliakira sa; bamna Gâd karnika sut bri ba mita mai wipi ba bahki kulkpara.

¹⁸ Witin bui mai insauhkbia kaka, witin mita kwala ni wilkbia; ai mihta ni latwan maikbia kaka, witin wina daskaika ba maikbia.

¹⁹ Kli kli pât wina dakbi mai saki kabia, bara ban saura ba swika ban man ra mai alkbia apia.

²⁰ Plun wahwan piua ra, prura wina dakbi mai sâkbia bara war aiklabanka piua ra, sord wina dakbi mai sâkbia.

²¹ Twisa saura aisi ba tilara aihwaki mai kaiki kabia, sauhki tikaia lâka balbia ba ra, swaki mai sâkbia.

²² Sauhki tikan lâka tilara bara plun wahwan piua ra man kaiki kiki kama, bara daiwan saura wail nani ba sibrinka sin mai daukbia apia.

²³ Walpa nani yabal ra ba minam prukbia apia, daiwan prautkira nani ba sin pâmnika kabia.

²⁴ Man wamtla bilara sin diara sut mampara aitani param kabia, man daiwram nani ba kulki kaiki kama bara sut bâra kabia.

²⁵ Kiamkam nani ailal brima twi ra inma nani ailal ba baku.

²⁶ Karnika manis wal ban almuk takma, plawar mâ pihwan wilkan ba baku.

²⁷ Diara tânka briaia lâka ba naku wan smalkisa naha tânka na baku sa; bamna man sin naha wals, bara man mita sin tânka ba pliki kaiks.