Job 41 - DAWAN BÎLA AISKA

¹ Bara Leviatán ra,, ¿kiulh kum ni miski alkma ki? ¿Kiwa kum ni sip sa ki twisa ba wilkaia?

² ¿Ai kakma ba kiwa tara ni wilkaia sip kama ki, kmakmaya ra dus alhnira kum dingki lukaia sip kama ki?

³ ¿Dîa mamkabaisa ki, umpira kaikma wisi, bara bîla swapni ni mamkabaia sa ki?

⁴ ¿Dîa yabrika pramis takbia albikam kaia, ai rayaka aiska ra?

⁵ ¿Ai lâka daukaisma ki, piawira lupia kumi baku? ¿Luhpiam pulaika apia baku priski daukma?

⁶ ¿Sip kabia ki markit ra plun nani mâ ba bâra kaia? ¿Klaki pîs sirpi daukbia atkaia dukiara?

⁷ ¿Trisba ni daiwra taya ra sabi lukaia sip kama ki, apia kaka ai lal ra dâka ni?

⁸ Man wih ai purara mihtam mangkma kaka, bara aiklabanka kum maikbia kli âmya tiwaia apia, bara kli sin baku daukma apia sa.

⁹ Leviatán ra namkra ni kaikma ba baman, ya kabia sin, sibrin mita tâ iwan pali takisa.

¹⁰ Ya kra kum mita tuski munbia kaka, ai kupia sauhkisa, upla kumi sin sip ai mawanra bubia apia.

¹¹ ¿Yamna ai mawanra bubia, bara diara munras swak takbia? ¡Upla kumi sin âpu sa tasba aiska ra!

¹² Ai mina nani ba dukiara aisaras ban swimna, bara karnika bri ba tnata âpu kira.

¹³ ¿Ya sip sa ki ai wîna taika witin ra praki ba sakaia, apia kaka kaina kahbaika aima wâl prais bri ba mâ walak lukaia?

¹⁴ ¿Ya ai bîla ba kwâkbia ki, ai napa nani kutbanka sibrinkira ba?

¹⁵ Ai nina dusa nani lama kat ba lika kaina kahbaika nani sa, asla prakan sa bara karna pali sa walpa karnika baku.

¹⁶ Asla dihbi prakan sa, pâsa sin bâk luras sa.

¹⁷ Kumi wala ba wal asla prawan sa, upla kumi mita sin sip aihka dakbi sâkbia apia.

¹⁸ Ai trisiamka munuya ba lika imyula baku sa, ai nakra nani ba ingwisa titan wan yu uluya ba baku sa.

¹⁹ Ai kakma wina pauta klauhan takisa bara pauta biulwanka nani sin bal takisa.

²⁰ Ai kakma nani wina kiasma takisa, dikwa kumi pauta ra piawi ba baku.

²¹ Ai wingka puhbra ba masku nani yan klauhisa, ai bîla wina pauta klauhan nani takisa.

²² Ai nana dusa ba karna pali sa, witin ai mawanra upla sut sibrin takisa.

²³ Baha purkara ai wîna ani pîska karnika âpu kan ba sut karna daukan, baha ba karna sip diara dimras, ayan slilkan bapan karnika ba baku.

²⁴ Ai kupia ba walpa tara ba baku brisa, akbaia walpaya karnika ba baku sa.

²⁵ Witin buisa ba ra, gâd bahki nani ba sut si brisa bara sibrin tara wal plapi banhwisa.

²⁶ Sord, langsa, trisba, aiklabaia dukia sâtka wala nani sin sut ni, aiklabaia bubia kra bahki kabia.

²⁷ Witin ai mapara ayan ba twi lâwan baku sa, bara bras ba lika dus sukwan ba baku sa.

²⁸ Trisba nani ba mita munan plapras sa, walpa nani ni lulki sabi ba lika, twi lâwan ni sabi praiska sa.

²⁹ Amar tara ni prukaia ba lika, yauhrus ni pruki baku sa, langsa lulkanka wasbi piua ra witin lika kikisa.

³⁰ Raswi ba piua ra, slaubla ra yabal baikisa, rais milka nani mala ba wal daukisa ba baku.

³¹ Kabu tihuka ba yan dikwa kum piawi baku sa, dikwa kum batana abalkaia ba baku sa.

³² Liura mark pihni lipi swisa, upla tâwa yari pihwan ba baku sa.

³³ Naha tasba ra baha dukia sâtka âpu sa, baha ba daukan sa sibrin kaia apia ba mata.

³⁴ Kau aimayuni nani ba mapara buisa, baha sika daiwan saura nani sut kingka ba.