Job 4 - DAWAN BÎLA AISKA

Ai uplika nani bal aisin ba Elifaz

^1-2 Elifaz Temán wina ba, mahka aisaia munan, bara naku win: Kasak pali, Job, man ra kupiam turbanka lâka kabia, upla kumi ban lilak dimi mai aisabia kaka, sakuna man aisaras sâp kaia sip apia.

³ Man sika upla nani ra smalkanka uya yabi katma ba, swapnikira uplika nani tâ baiki katma ba;

⁴ man sika kupia lukra swapni taki kauhi uplika nani ra, kupia tâ baikram bûi kata ba, bara mahka kauhai kan uplika ra tâ baiki bri katma ba.

⁵ ¿Bara nanara man ra pât mai alkan na piua ra, man sasibrira taki si kupiam lukra karna bri kaia lâka ba swiram ki?

⁶ Man sika kasakka lâka kat Gâd dukia dauki katma ba, man sin waitna kumi daukankam ba wapni kata ba, ¿nanara nahki man kasak lukan lâka ba âpu sma?

⁷ Wiria luki kaiks, sip kama sapa diara kum pan kupiam kraukaia, kupiam krawisa ki, upla pâtkas kum ba ban pali sauhki tikan kaia.

⁸ Diara tânka briaia lâka ba ai smalkisa, baha nani lâ krikan lâka ra bara watawika lâka mâ nani mangkan ba, piua luan ra baha mâ krikisa.

⁹ Dawan ai lawanka ba witin nani purara pâsa baku puhbisa, bara sut sauhki tikisa.

¹⁰ Witin nani layan baku ai napa arkbi uhbia, sakuna Gâd mita napa nani ba sut kriki tikbia bara sâp takbia.

¹¹ Layan nani diara pliki alkaia sakras kan ban prui ba baku prubia, bara ai luhpia nani ba ban yakabrira baman swin kabia.

¹² Sturi bîla kum sâpkira yang ra balan, rangbi aisinka, kiahwak lupia baman walri.

¹³ Tihmia ra upla nani purara yapan ba aula, bara yapra wirhika kum bal ai taibi wingki prakaia ai munan.

¹⁴ Sibrin pali ai daukan ba ra, dusi nani sut tatatwi kan.

¹⁵ Pâsa kum maiwanku bal luan, bara taiya ra tamaya aiska ba tranwa takan.

¹⁶ Upla kum bahara bûi kan, bara ai lilka ba kaikaia sip kapri, sakuna ai mawan pali lika apia, diara sut bin âpu sâp kan, baha ningkara bîla baikra kum walri:

¹⁷ “¿Upla kumi sip sa ki Gâd mawanra kasakkira kaia, bara ai Papaskra mawanra sunukira pali takaia?

¹⁸ Witin ai lamara, ai mawanra, ai dukia dadaukra nani ba kat sin, sunukira kulkras sa. Gâd ai insalka nani ba kat sin pâtka sakisa,

¹⁹ ¡bara upla lika kau swapnikira sa, utla kum slaubla ni, auhya ra paskan ba baku sa; tuyukbaia sip sa, itikmuk kum ra tuyukbi baku!

²⁰ Titan wina tutni kat bilka ra pat sauhki tikan sa, pruan ba wina kli buras ban kaia ra sa, upla wala nani sin baha pruan ba dukiara ai kupia ra mangki lukras pali sa.

²¹ Ai rayaka ba danh takisa, trit klaki ba baku, sins lâka sin sut sip lan takras ban pruisa.”