Job 36 - DAWAN BÎLA AISKA

Elihú aima walhwal ra aisisa

¹ Elihú naha diara na aisi, naku win:

² Wiria kupiam alki takaski bris, bara mai smalkamni, bamna Gâd tâwan kau diara aisaia brisni,

³ diara tânka kaikaia sip sna ba, laihura mangki kaikamna, baku lika mairikbia nahki papaskra ba kasak sa.

⁴ Yang kasak mai wisni kunin kumi sin âpu, kainamra sinskira kumi brisma sut ba daukan ba.

⁵ Gâd ba lika karnakira pali sa, bara sinskira tara pali sa, bamna witin pâtkas uplika ba baha kulkras sa.

⁶ Saurakira rayaka pâtka ba ban swih tikras sa, sakuna umpira nani lâka lika wapni daukisa.

⁷ Piua bani upla wapni nani ba kan kahbisa, king nani ai iwaika ra iwi nani ra tâ baikisa, baha nani ba purara bukisa.

⁸ Sakuna sîn nani ni wilki brisa, bara latwan ba bui saura pali munisa.

⁹ Dîa saura witin nani daukan ba Gâd mita yan kaikisa, nahki witin nani ai kupia prautka lâka mita klauna alki brih wan ba.

¹⁰ Wapni mangkaia dukiara aisisa, bara makabisa ai saurka ba mahka swibia.

¹¹ Bîla wali baha kat sin dauki banhbia kaka, lilia bara ai âuyapah kabia, ai yua nani kau tâka ba piua ra.

¹² Sakuna bîla kat wali daukras sa kaka, prui raiti bilara kat iwi wih banhbia, kau yamni ai dara walras sa piua ra.

¹³ Upla watawikira nani ai kupia ra lawi pali banhwisa, priskan banhwisa sakuna hilp makabia apia.

¹⁴ Kau wahma witin nani pruisa, ai rayaka ba danh takisa swira lâka ra.

¹⁵ Pât wahwanka tilara, Gâd mita swaki sakisa pât wahwi uplika ba, latwan wahwi ba tila bâk yan tânka brisa.

¹⁶ Man sin pât nani wina swaki mai sakan, bara pri lâka uya pali maikan sa, tibilkam ba lika plun auhni ni banhkan sa.

¹⁷ Upla saura nani pât briaia kan ba, man ra tnata alkan kabia, bara lâmka aisi dauki pât ra mai lakan ba wina, sip swak takma apia sa.

¹⁸ Kaiki bas diara mana mai atkbiara, lalah ailal mita yabrika kupiam alkbiara.

¹⁹ Pât mai taiban kabia piua ra, man ra hilp âpu kabia; man winankam bara karnikam sut ba lika bahki kabia.

²⁰ Wingkam puhpara, kan tihmia ba aula, baha piua ra upla nani ba âpu takisa.

²¹ Aman kaiks kli saura ra tawi wama, man ba pât wahwan wal tânkam pliki kaikan ba.

²² Gâd karnika tara ba ra aman kaiks, smasmalkra kumi sin sip witin ba wal prakras.

²³ Witin dîa daukaia ba mapara upla kumi mita sin diara wiaia ba âpu sa, dîa saura daukbia sin mapara aisaia ba sin âpu sa.

²⁴ Tasba aiska mita ai warkka ba dukiara mayunisa, kupiam krauks man mita sin mayunaia sma ba.

²⁵ Upla sut mita kaikaia sip sa, laih wina kabia sin.

²⁶ Gâd tara ba tânka yawan sip aiska kaikbia apia, witin manka nani sin sip kulkbia apia.

²⁷ Lî tahwi nani ba sut witin watla kum ra mangki brisa, ningkara baha ba wina lî yan auhisa.

²⁸ Lî auhi ba lika kasbrika nani wina yan auhisa, bara lî ailal pali upla nani purara auhisa.

²⁹ ¿Kasbrika nani plapi ba, ya tânka brisa ki, apia kaka dîa muni alwani bin takisa kasbrika purara?

³⁰ Imyula ba Gâd mita yan lipisa kabu purara, kabu tihuka ba pura praki brisa.

³¹ Baku witin bui upla nani plun dakakisa, bara plun sin ailal pali yabisa.

³² Imyula ba witin ai mihta nani ra brisa bara naha na mark ba kat yabisa, witin bui dîa lâ mangki yan ba kat.

³³ Alwani ba Gâd bâra ba dahra aisisa, pâsa saura ba aisisa ai kupia baiwanka ba tânka.