Job 3 - DAWAN BÎLA AISKA

Job ai wîna pâtka ba dukiara brukwisa

^1-2 Lâs kat Job ba mahka ai bîla sakan, bara saura aisin witin aisubi takan yua ba mapara.

Job

³ ¡Yaptiki kwihra tiwan tihmika ba saura pali kulkan kabia! ¡Saura pali sin kulkan kabia aisubi takri yua ba!

⁴ ¡Aitani lukaina baha yua ba tihmia ni takan kata, bara Gâd mita baha yua ba kaikras ban yu baiwaia kan!

⁵ ¡Aitani lukaina, kasbrika distika tara kum bui tihmia dingkan kata, apia kaka kasbrika siksa pali kum bui yu ingnika ba tikan kata, apia kaka aiskura alki, tihmia tara ba mita sirang tara ni ikan kata!

⁶ ¡Aitani kaia kan baha tihmika ba, tihmia tara ra ban tiwan kata, bara baha yua ba kati yua nani tilara, mani yua nani tilara sin kulkan kaia apia kan!

⁷ ¡Aitani lukaina baha tihmika ba biarapara ni takan kata, bara lilia binka winaia apia kan!

⁸ ¡Aitani lukaina, sukia uplika nani mita baha yua ba saura win kata, Leviatán wal aisi nani ba!

⁹ ¡Aitani lukaina baha yua titanka, slilma nani ba ai ingnika ingras kata; ingnika bîla kaiki kan ba sin balras kan kata, lalma kahbi ingnika ba sin tasba ra ingras kan kata!

¹⁰ ¡Ban ai swin aisubi takri tihmika ba saura pali kulkan kabia, bara naikra wina pât ba yukukras kan!

¹¹ ¿Dîa muni yaptiki biara ra pruras kapri? Apia kaka, ¿dîa muni nan ai baikan ba ra pruras kapri?

¹² ¿Dîa muni ai plahpia nani ba ra ai suni ai briaia, tiala sin ai dakakaia kan ba?

¹³ Yang ba pruri kata kaka, nanara yang âiyapah pali yapi kaia kapri, kupi kumi lâka ra sâp prawi kaia kapri,

¹⁴ king nani, wihta nani, raiti tara papaskra nani ba tilara kaia kapri,

¹⁵ apia kaka, wihta tara nani ai watla ra gul bara silbar nani auhbi banhki dauki ba tilara kaia katna.

¹⁶ ¿Dîa muni tukta nani piua kau kan, baiki biki ba baku ai bikras kan, tukta nani kau aisubi takras ai yapti biara ra pruan ba baku?

¹⁷ Raiti ra upla saurakira nani kupia turbanka lâka ba tnata alkisa; bara swapan nani ba sin baha kat ai riska brisa.

¹⁸ Silak ra mangkan uplika nani ba, bahara kupia kumi lâka ba wal prawisa; bara wark pura kakaira nani winanka ba bahara kli walras sa.

¹⁹ Bahara upla tara bara upla sirpi ba wal sim baku sa, bara alba ba sin ai dawanka wina pri takisa.

²⁰ ¿Dîa muni Gâd bui swin, pât wahwi uplika nani ba ingni ba kaikisa? ¿Dîa muni kupia wirha pali uplika ba, kau ban swisa raya kaia?

²¹ Prura bîla kaiki uplika ba sip pruras sa, prura ba ai dukia kukan tara yukukan pliki ba baku plikisa kuna.

²² Baha uplika ba sika raiti ra bri si mangkuya ba kat ai liliaka sakisa.

²³ Gâd mita nakra prakan baku yan wapi taukisa, tnaya bani ra yabalka ba prakisa.

²⁴ Tikluki nani ba sika yang pati ba, latwan saura brukwanka ba sika yang diranki ba.

²⁵ Sîa ai dauki kan dukia nani ba ban sirang ai ikisa bara sin yang purira kauhan.

²⁶ Ris briaia lâka âpu, kupi daskaia lâka sin âpu, kupia kumi lâka sip sakras, kupia turban lâka baman lika.