Job 16 - DAWAN BÎLA AISKA

Job

^1-2 Bamna Job pana aisi, naku win: Naha sât aisinka nani ba yang pat aima ailal walri, man nani mita maisi nihkaia watlika ra kau ni sirang aikisma.

³ ¿Bîla bahki nani aisaia ba lika tnata âpu sa ki? ¿Baha dîa tânka sa ki maipara aisisma ba?

⁴ Man nani ba yang waitlika ra katma kaka, yang sin man nani aisisma baku aisamna; laila na nikbi, lawaska kikan lâka bîla nani ni, lî aubra baku mai aisaia kapri.

⁵ Latwan lâka aisinka ni bara maisa nihkra bîla nani ba ni aisi tâm baikamna.

⁶ Sakuna aisaia ba mita, wîni latwanka na sip daskras sa; bara sâp kaia lâka ba mita, sikniski na wina rawaia lâka lika aikras sa.

⁷ Gâd mita karniki nani ba sut âpu daukan, upliki nani sut sin yang wina sakan,

⁸ bara silak ra ai mangkan sa. Witin ba yang maipara aisaia buan, maipara dahra kwakwahkra kunin ailal bukan sa.

⁹ Dawan mita nini bliki bisbi ai tikisa, daiwan kras baku sirang ai ikisa, waihli kan baku ai nakra ni laki ai kaikisa.

¹⁰ Upla ailal maipara asla taki bûi, laiwaska kiki ai munisa; ai mihta tanhtika ni maiwanra ai pruki swiri daukisa.

¹¹ Gâd mita upla watawikira bara lâ sasauhkra nani mihta ra ai mangkan sa.

¹² Yang kupia kumi iwi kapri witin wal, bara naina wina witin ai alkan; ai tuyukbi yuya baman ai daukan, ai trisbaika lulkaia markka ai daukan.

¹³ Tnaya bani wina trisba ai lulkisa, wîni tara na umpira kaikras ai sabi klauhbisa, biaira sirpika nani sut tasba ra yakabisa.

¹⁴ Wîni insauhkanka nani ba purara kli kli sabisa, war aiklaklabra baku trisba ai lulkisa.

¹⁵ Sari lâka ni aibanhri sa, krukus kwalka ni dimri, bara tasba yamhpuska ra yang laila dingkri.

¹⁶ Inan baman maiwan sut puskan, naikra nani sin pukni takan.

¹⁷ Yu kumi sin yang bui upla kum ra saura munras kapri, puri sunra ba lika kasak sa.

¹⁸ Naha lâ sauhkanka lâka na, maipara kasakka lâka daukaia winisa. ¡Tasba, winanki na bikpara!

¹⁹ Kasbrika purara upla kum bâra kaia sa yang tâiwan aisaia,

²⁰ lukanki tânka Gâd ra param wiaia, baku mika witin naikra laya ba kaikbia.

²¹ Upla kum pan bubia, Gâd mawanra tâiwan aisaia, upla kum mawanra upla wala tâwan aisi ba baku.

²² Rayaki yua nani brisna ba sin mahka lui auya sa, bara tisku lika mahka impaki wamna kli balaia apia yabalka ra.