Job 12 - DAWAN BÎLA AISKA

Job

^1-2 Bamna Job pana witin nani ra win: ¡Kasak pali, man nani sika tawan bîla baikra ba aisisma, bamna man nani prui banhma yua ra, sinskam lâka ba sin âpu takbia!

³ Sakuna yang sin tânka brisna, man nani wal kau mâyara lika apia sna. ¿Ya ba naha diara sut na tânka briras sa ki?

⁴ Yang na pâtkas sunu sna sakuna, piua wala ra Gâd makabanki nani ba wali kan, upliki nani mita lika laiwaska kikisa.

⁵ Sakuna pât luha uplika ba, pât ra uplika ra yamni kaikras; ai kupia lukras kira kauhaia baman uplika ba ra platukbi batakaia ba witin lukras sa.

⁶ Tahplu nani ba ai watla ra ai âuyapah sa; Gâd mapara uplika nani ba ai âuyapah iwisa ai watla nani ra, kan witin nani lukisa, Gâd ba witin ai mihta bilara alki brisa.

⁷ Daiwan nani ra bara tnawira nani ra sin makabi wals, bara witin nani mita mai smalkbia.

⁸ Baku sin tasba bara kabu inskika nani ra sin makabi wals, bara witin nani mita mai smalkbia wis.

⁹ ¿Upla kum bâra sa ki kau tânka briras ba Gâd ai mihta nani ni diara sut paskan ba?

¹⁰ Rayaka bri bani bara rayaka ba sut, ai mihta ra brisa.

¹¹ Wan kiama ba upla bîla aisinka sât sât wali tânka brisa, wan darkaya ba sin auhni nani ba tânka brisa.

¹² Almuk nani ba sins lâka brisa, kan mani ailal tasba ra iwan, diara nani kaikan ba tânka ba wina sins lâka brin.

¹³ Sakuna Gâd ba sinskira bara karnakira sa; witin mita diara nani daukaia tânka ba luki sakisa bara tnata alkisa.

¹⁴ Gâd mita sauhki tikan ba upla âpu sa baha kli paskaia, ani uplika ra Gâd mita durka prakan ba upla wala âpu sa durka ba kwâkaia.

¹⁵ Witin mita lî ba alki takaskisa kaka, diara sut ba lâwisa; kuna witin lî auhaia ba ban swin auhisa ba ra, tasba ra lisamra dingkisa.

¹⁶ Ai karnika ba piu bani pura luaia lâka ba yabisa; kunin munan uplika ba bara kuninkira ba sin witin ra bawisa.

¹⁷ Dawan mita munisa sinskira nani ai sinska lâka ba tikaia, bara lâ dadaukra nani ba sinskas takisa.

¹⁸ King nani ba karnika âpu daukisa, bara kwala luha yaban alki priski brih auya.

¹⁹ Prîs nani ba sin ai warkka ba wina sakisa, bara karnika alki bri nani ba batakisa.

²⁰ Sins lâka briaia sinska lâka smalki uplika nani ba, sins lâka ba âuya tikisa, bara almuk nani sins lâka yamni bri ba sinska ba sin, lukanka wina sakisa.

²¹ Upla tara kulkanka lâka bri nani ba sin, kulkanka lâka âpu daukisa, karnakira nani karnika ba sin karnikas daukisa.

²² Dara prakan tânka yukuwan ra bâra ba, tânka briaia param sakisa; tihmu pali tilara diara bâra ba sin ingni ra sakisa.

²³ Witin nisan nani ba tara daukisa, bara âpu sin daukisa; yakabrira daukisa bara kli sin asla daukisa.

²⁴ Kuntri kum lalka nani sinska lâka ba tikisa, bara upla iwras tasbaya yabalka kum ra yaban tiwisa;

²⁵ witin nani ba saura yabalka tihmu ra swin sa, aimawahki taukisa, upla kum laya tahpla din bla ba baku.