Job 11 - DAWAN BÎLA AISKA

Sofar

^1-2 Sofar Naamat tasbaya uplika ba pana aisisa: Baha bîla aisinka bani ba, pana ansika kum bâra kaia sa, ban sakuna uya pali aisi ba mita apia sika ai raitka briaia ba.

³ ¿Dîa aisinkam ba mita yang nani na bîlas baku wan daukisma ki, bara lawaska kikankam nani ra upla âpu sa lukisma pana sip mai aisaras kabia ba?

⁴ Man bila wisma smalkankam ba wapni sa, bara lukisma man ba kasakkira aihwa pali sma.

⁵ ¡Aitani lukaina Gâd mita pana mai aisin kata!

⁶ Witin sins lâka tânka yukuwan ra ba mamrikbia, baha ba uya pali karna sa tânka briaia. Baku lika kaikaia kapram Gâd mita man klala briaia kapram ba praiska sin kau maikras ba.

⁷ ¿Man lukisma ki, man ba sip sma Gâd tânka tihu ra ba kaikaia, bara witin ai tânka tihuka pali ba tânka sut pali ba man kaikaia?

⁸ ¿Dîa daukaia sip sma, kan Dawan sinska lâka ba kasbrika pura pali ba wal kau purara pali sa? ¿Man dîa nu sma, sinska lâka ba albangka kum wal prakan ba tara kau tihu sa?

⁹ Baha nani ba naha tasba wal kau tara sa, kabu ba wal sin kau bîla yahpa sa.

¹⁰ Gâd bal upla ba silak ra mangki lâ ra paiwbia kaka, ¿ya bui sip kabia ki baha lâka krikaia?

¹¹ Witin ba kaikisa ya ba kuninkira sa, upla saurka ba sin witin kaikisa. Apia kaka, ¿man lukisma ki witin baha tânka briras sa?

¹² Ani yua biriku wail kum ba ai tânka swibia kaka, baha yua ra upla pûlkira ba sin diara tânka kasak ba bribia.

¹³ Yamni daukaia tânka ba alki bris, bara makabankam ba Gâd kat aisas.

¹⁴ Saurka karbanka brisma kaka, man baha wina dakwi taks; saurka ba yarka wamtla ra dimbiara.

¹⁵ Baku lika mamwan ba tâski âpu bukma, bara baku lika sâp kama sibrin âpu kaia;

¹⁶ pât wahwankam ba ban âmya tikma, âmya tikma lisamra lui wan ba baku.

¹⁷ Man rayakam ba yu wan lal kat ra ingwi ba wina kau ingbia, yuam nani tihmia tara pali takan ba, yu baiwaia ingnika ra tawbia.

¹⁸ Bîla kaikanka bri kasak luki iwi kama; Gâd mita aihwaki mai kaiki ba mita âmyapah yapma.

¹⁹ Wingkam puhbi kama awarka ra diara kumi sin sirang mai ikbia apia, upla uya man hilpkam pliki kabia.

²⁰ Sakuna watawikira nani ba lika baku kabia apia; bahki lâka ra hilp plikbia, yukuwaia pliska kumi sin sâkbia apia, prura ba lika ai bîla kaikanka tnata kumi baman kabia.