Job 10 - DAWAN BÎLA AISKA1 ¿Naku baman yang ban raya kaia ki? ¡Yang danh swapri! Brukwi aisarika pan, kupi aimakbia kra, kupi tahplika wal param aisisni. 2 ¡Alai, Gâd, pâtkira ai kulkpara! ¡Ai wis dîa dukiara daihra kwahkisma! 3 Man mita sika baku ai paskram ba, ¿bara baku aitani lukisma ki, swiri dauki baku ban ai sauhkaia bahki ai kulkaia, bara man mita upla saura nani, diara saura daukaia ai lukanka ra paski ba tâ baikram? 4 ¿Dîa man sin upla nani diara kaiki ba baku kaikisma ki? 5 ¿Dîa man rayakam ba sin kunhku sa ki, upla praprura kum rayaka ba wal baku? 6 Baku kan, ¿dîa muni swakwanki nani bara saurki nani ba kaikaia plikisma ki? 7 Man kasak kaikisma yang na pâtkas sna, bara upla âpu sa man karnikam mununhta ba wina ai dakbi ai sakaia. 8 Man pali mihtam ni ai paskram, ¡bara nanara âpu ai daukaisma! 9 ¿Kupiam kraukisma ki slaubla ni ai paskatma ba, bara nanara kli tasba yamhpuska ra ai lakaisma ba? 10 Man bui yang wîni na ai paskram, sim bîp tialka laya klaswi ba baku. 11 Wîna bara taya pura wal sin ai dingkram, ai pitbi ai daukram dusa nani bara wâika nani wal sin; 12 raya kaia lâka bara latwan lâka wal aikram, bara aihwaki ai kaikisma ba lâka wal raya ai brisma. 13 Sakuna nanara kaikisna, lukanka kum man kupiam bilara yukuwan ra bri katma ba: 14 aihwaki ai kaiki katma yang na saura yamna sapa, baku swakwanki daukuna ba tâka mita pât ra ai lakaia. 15 Yang na pâtkira sna kaka, tiwri pali sna; pâtkas sna kaka lilia wiria brimna, bamna uya ai taibi brih sairka paskisma. 16 Yang na prautkira takisna kaka, man lika layan baku nini blikisma, wark aihka nani sin daukisma âpu ai daukaia dukiara. 17 Piua sut ra witnis nani maipara brisma, man lawankam ba kau ban maipara takisa, ¡sim war aiklaklabra waitnika ai kupia âpu rau muni ba baku! 18 ¿Dîa muni ai swiram aisubi takri? ¡Aitani kan kau upla ai kaikras kan ba piua ra pruri kata! 19 Yaptiki lama bîla wina raiti kat waia kapri, baku lika naha tasba ra bal iwras baku kaia katna. 20 Rayaki ba kunhku sa bamna, kupia kumi lâka ra ban ai swis bara lilia wiria pan brimna, 21 kli tawi balras ba yabalka ra kau impakras sna ba ra, tihmia tara tasbaika bara prura distika ra, 22 tihmukira bara aimawahkan tasbaika ba, bahara ingnika ba tihmu ba wal baku ba. |
© 2010 Bible Society in Nicaragua
Bible Society in Nicaragua