Job 1 - DAWAN BÎLA AISKA

Dawan mita yan Job ba umpira lâka ra kauhan

¹ Us tasbaya ra waitna kum bâra kan, ai nina ba Job; witin ai rayaka ba tâski âpu lâka ra wapni iwi kan, Gâd dukia kasak yamni dauki kan, upla ra saura munras yamni baman muni kan.

² Job ba ai luhpia waitna nani 7 bri kan bara ai luhpia mairin nani sin yumhpa.

³ Bara witin sîp 7,000, kiamil 3,000, wark bîpka nani 500, biriku mairin 500 bri kan, alba nani sin ailal pali bri kan. Lalma tasbaya ra witin baman kau upla yuyakira kan.

⁴ Job luhpia waitna nani ba, kumi bani ai watla ra pata tara dauki kan ai piua kat piaia dukiara, bara baha piua ra ai lakra yumhpa ba sin paiwi kan.

⁵ Pata tara dauki pih luya ningkara, Job ai luhpia nani ba paiwi kan, bara titan ra bûi bara kumi bani dukiara daiwan aiska angki ai pura suni kan, witin nani ai saurka ba wina sunu daukaia dukiara. Job naha na dauki kan piua bani, ban kra luki kan ai luhpia nani ba Gâd mapara saura daukan sa sapa.

⁶ Yu kumi, laih pura tasbaya uplika nani ba Dawan mawanra wih buaia wan, bara witin nani wal sin dahra kwakwahkra insalka ba wan.

⁷ Dawan mita makabi walan: —¿Man ani wina aulma? Bara dahra kwakwahkra ba pana win: —Tasba tâ aiska kir tnaya walhwal wina impaki tauki si aulna.

⁸ Bara Dawan mita pana win: —¿Man naipakan Job ba kaikatma ki? Tasba ra witin baku wala âpu sa, waitna kumi kasakka lâka kat yang duki dauki ba, ai rayaka wapni, tâski âpu, upla ra saura munras, yamni baman dauki ba.

⁹ Sakuna dahra kwakwahkra ba pana win: —Kasakkira baku man dukiam daukisa, sakuna mana luha lika wark takras.

¹⁰ Man mita swiram upla kumi sin witin wîna ra kangbras sa, ai watla uplika nani ra bara diara sut bri ba ra sin apia, diara witin dauki ba sut yamni baman munisma, bara witin sika daiwan kau ailal brisa, lalma tasbaya uplika sut bri ba wal.

¹¹ Sakuna diara nani sut bri ba ai mihta wina daks, bara man kaikma nahki mamwan kat saura mai wibia ba.

¹² Bara Dawan mita dahra kwakwahkra ra win: —Aitani, dîa brin mai dauki ba kat dauks Job dukia nani ba wal, sakuna witin pali wîna ra lika saura munpara. Bara dahra kwakwahkra ba, Dawan mawan wina mahka taki wan.

¹³ Yu kumi, Job luhpia waitna nani bara luhpia mairin nani sut, asla taki pata tara dauki pi kan ai muihni almuk watla ra.

¹⁴ Bara waitna kum Job watla ra wan bara diara saura takan ba win: —Yang nani wark bîpka nani brih tasba baiki banhwi kapri, biriku mairin nani ba sin baha lamara bûi twi pih banhwi kan,

¹⁵ tisku kan sabeo nani wan bara bîp nani ba implikan, bara skiru ni waitna nani kan ba sut ikan. Yang baman baha tila wina swak taki aulna, sturka ba maisam pakaia.

¹⁶ Waitna ba dahra kau aisi danh takras kan, waitna wala kum wan bara Job ra naku win: —Imyula kum pura wina kauhan ba ra, sîp main kaiki nani ra bara sîp nani ba sin sut ikan. Yang baman baha tila wina swak taki aulna, sturka ba maisam pakaia.

¹⁷ Waitna ba kau ban baha dahra aisi danh takras kan, waitna wala yumhpika ba bal diman bara naku win: —Caldea uplika nani daknika yumhpa wan mapara taki aiklaban bara kiamil nani kata ba sut implikan, baku sin skiru ni baman waitna nani kan ba sut ikan. Yang baman baha tila wina swak taki aulna, sturka ba maisam pakaia.

¹⁸ Waitna ba baha dahra kau aisi danh takras ba ra, wala kum balan bara naku win: —Man luhpiam waitna nani ba luhpiam mairin nani aikuki luhpiam almuk watla ra pata tara kum dauki pi kan ba ra,

¹⁹ pat pali upla iwras tasbaya tani wina pâsa saura kumi krawan, bara utla ba tnaya walhwal ra pruki bara utla tara ba luhpiam nani purara batakan, bara sut kat ikan. Yang baman baha tila wina swak taki aulna, sturka ba maisam pakaia.

²⁰ Bara Job ba ai kupia wirhika wal ai mina ra buan bara ai prâka kalkan, ai tâwa klakan, bara bawan mayunra lâka dauki natka ra.

²¹ Bamna naku aisata: —Kwala luha tasba ra balri, bara kwala luha naha tasba wina wamna. Diara sut Dawan mita aikan, bara Dawan mita sin kli mihti dakban; ¡Dawan nina ba ban mayunan kabia!

²² Baku bamna, baha sut tilara Job saura kumi sin yaras, ai bîla ni sin Gâd mapara saura aisaras kata.