Jirimaya 8 - DAWAN BÎLA AISKA

¹ Dawan ba kasak aisisa: “Baha piua ra raiti nani ba wina king nani Juda wihtka nani, prîs nani, prapit dusa nani sâkbia ba ra, Jerusalem ra iwi kan uplika nani dusa nani ba sin sâkbia,

² witin nani lapta, kati, slilma nani ra latwan kaikan, baha warkka daukan, nina blikan, baha nani ra aisi ai tânka pliki wali kan, bahara mayuni kan ba mawanra lulki swibia. Upla kumi sin baha dusa nani ba bikaia wisi alki bukbia apia. Tasba ra prawi kabia, daiwan kânka nani baku.

³ Naha uplika saura nani kau pruras raya kabia ba, yang mita munrika ani anira tauki kabia ba tilara, witin nani raya kaia apia mahka pruaia ba kau yamni kulkbia. Yang, Dawan, karnika sut brisna, kasak aisisna.

Israel klala yabia pâtka ra ba

⁴ “Jirimaya, man naha bîla nani mai wisna na upla nani ra wis yang aisisna: ‘Upla ba kauhi ba ra, kli buisa; ai yabalka tikan ba ra, kli ai ninara tawi sakisa.

⁵ Ban kaka, Israel, ¿man nani dîa muni ai atkram? Jerusalem, ¿dîa muni ai swih waram ban kaia ra? ¿Dîa muni maipara bûi ban sma? ¿Bara kli tawi balaia brin mai daukras ki?

⁶ Kiaima pri tniki aman pali wali katna, sakuna upla kumi sin watawika lâka dauki ba wina ai kupia laki rait ba aisaras, bara wiras: ¿Yang dîa daukatna ki? Sakuna kumi bani dîa saura dauki kan yabalka ba kat ban wan, war ra aiklabi araska ai tâ kat karna plapi auya ba baku.

⁷ Suki kasbrika ra pâli ba sin ai dara walisa ahkia kli tawi balaia. Butku, plipli, yami sin, witin nani nu sa ahkia plis wala ra waia. Sakuna man, yang upliki nani lika yang lâika nani ba kakaira apia sma.

⁸ ¿Nahki man nani wiaia sip sma diara tânka brabrira nani sma, Dawan lâka ba sin brisma? ¡Sturi âiulbra nani ba, daiwan tnawa ba buski kunin baman ulban!

⁹ Sakuna baha nani sinskira puli ba swira daukan kabia, daiwan nani alkaika ra alkan sinska lap tiwi ba baku. ¿Witin sins lâka brisa aisi ba anira sa, yang bîli nani lulki swin na?

¹⁰ Baha tâwan mairkam nani ba waitna wala nani ra yabaisna, tasbayam nani ba sin upla wala nani baha dawanka aimakbia. Kan upla almuk nani ba, tuktan nani bara upla sut, saura dauki wina baman lalah briaia lukisa; prapit nani ba, prîs nani ba sin sut upla ra taibi lalahka dakbaia warkka daukisa.

¹¹ Upliki nani insauhkanka nani ba taya purara ba baman kaikisa; witin nani aisisa baha nani sut ba pain baman sa, kuna kasak baha sut ba saura man sa.

¹² ¡Witin nani ai swira briaia kan baha dukia nani witin nani dauki ba, yang kau sip kupi alki takaskras sna ba dukiara! Sakuna apia, witin nani ai swira lukras. ¡Witin nani ai swira ba dîa sapa tânka sin briras takan! Baha mita, yang bui witin nani ra klala yabamna ba ra, witin nani ai mina pruki kauhbia wala nani kauhan ba baku. Yang, Dawan ba, aisisna.’ ”

¹³ Dawan kasak aisisa: “Plawar mâ klaki baku upliki nani ba klakaisna, wain mâ kumi sin kiwka ra swibia apia, kwah mâ kumi sin dusa ra swibia apia. Wahia lâwan nani baman bâra kabia.”

¹⁴ Bara upla nani ba aisabia: “¿Dîa dukiara yawan nâra kau takaskisa? ¡Kaisa yawan sut tawan tara nani karna paskan ba ra waia bara bahara sut wan ikbia! Dawan, wan Gâdka mita pruaia ra wan lakan sa bamna; puisin liura diaia wankbia, kan yawan bui witin ai mapara saura daukan ba tâka mita.

¹⁵ Yawan sika aihwaki kan wan mapara yamni ba balaia, sakuna yamni kumi sin yawan ra balras kan. Yawan sika siknis wina rawaia bîla kaiki kan, sakuna sirang wan ikaia lâka bamna sa.

¹⁶ ¡Wan waihla ba pat aula! ¡Laih Dan ba wina araska nani kakma praukbi ba walisa! Araska nani ba ihbi bara tasba aiska nikbisa. Witin nani aula kuntri na bara yuyaka nani ba sut sauhki tikaia, tawanka tara nani, uplika nani bahara iwi nani sut sin.”

¹⁷ Dawan kasak aisisa: “Man nani mampara piuta puisinkira nani blikamni, baha nani ba mita man nani ra mai sambia; baha nani mapara sukia nani ba diara daukaia âpu kabia.”

Jirimaya ai uplika nani pura mata inisa

¹⁸ Sairka na tikaia saika âpu sa, kupi lukanka na daswuya sa.

¹⁹ Kan yang upliki nani inanka ba tasba aiska ra walisa bamna: “¿Dawan Saion ra âpu sa ki? ¿Kingkam ba bahara apia sa ki?” Bara Dawan pana naku aisisa: “¿Dîa muni witin nani mini prukan aidul nani ra mayuni, gâd wala nani witin nani kakaira apia ba?”

²⁰ Lapta piua ba pat bal luan sa, mâ dâkaia piua sin luan, sakuna kau yawan na swaki wan sakras.

²¹ Upliki nani pât wahwi ba tâka mita, yang sin pât wahwisna; kupi wirha sibrin mita ai taibi ai brisa.

²² ¿Galaad ra sîka kum pan âpu sa ki? ¿Upla raki uplika kum bâra âpu kabia ki? ¿Dîa muni witin bui yang upliki nani ba rakras sa?