Jirimaya 7 - DAWAN BÎLA AISKA

Jirimaya prias watla ra smalkisa

¹ Dawan ba Jirimaya ra aisi, bara win:

² “Man Dawan tempelka durka ra bûi naha smalkanka na wis: Juda wina uplika nani sut, nahara bal dimi Dawan mayuni banhwisma ba, naha bîla man nani ra blikan na wals.

³ Dawan karnika sut bri, Israel Gâd ba, aisisa: ‘Rayakam lâka warkkam nani ba man nani yamni dauks, bara yang ban mai swirka man nani naha tasbaya ra kau ban iwi kama.

⁴ Baha nani kunin mai muni naku aisi ba ra kasak luki banhpara: ¡Dawan tempelka ba nâra sa, Dawan tempelka ba nâra sa!, aisi ba.

⁵ ‘Man nani rayakam lâka warkkam nani ba yamni daukma kaka, walkam aikuki sin kasakka lâka daukma kaka;

⁶ tringsar nani diara bri ba mihta dakbras kama kaka, rau nani bara piarka nani ba sin baku saura munras kama kaka, naha tasbaya ra sin upla pâtkas nani ba ikras kama kaka, gâd wala nani ba sin mayunras kama kaka, baha dukia nani brisma ba tâka mita sika kli pât ra tawisma ba,

⁷ bara baku lika naha tasbaya damikam nani tasbaya ban kaia yabri na ra ban mai swirka nâra kama.

⁸ ‘Man nani sika diara bahki upla kunin aisi bîla nani ba kasak lukisma.

⁹ Man nani implikisma, ikisma, upla maya lâka sauhkisma, swer taki kunin aisisma, Baal ra diara kîa pain angki yabisma, gâd wala man nani wal diara daukaia briras sma ba baha nani ra mayunisma,

¹⁰ baha ningkara naha tempelka yang ra baman maiyunaia aikan na ra aula, yang maiwanra bal buaia. Bara man nani lukisma nahara man nani pain kabia bara diara takbia apia; man nani lukisma yang kau sip kupi alki briras sna dukia nani ba ban dauki kaia.

¹¹ ¿Dîa man nani kupiam ra lukisma, naha watla yang ra baman mayunaia watla aikan na âimplikra nani watla kum sa? Yang, Dawan, kasak aisisna.

¹² Yang waitla Siló ra man nani was, baha pliska ba pas yang sakri bahara takaski maiyunaia, bara kaiks Israel upliki nani watawan tâwan dîa daukri ba.

¹³ Bara ban kra yang bui man nani ra kli kli pat kupiam krauki daukankam ba dukiara, sakuna man nani bîli wali daukaia apia wiram, uni kahbaia pan sakuna man nani baha sin daukras. Yang Dawan, baha kasak aisisna.

¹⁴ Baha mita, yang pliski holikira Siló ra dîa munatna ba baku, naha tempelka mâki aikan na ra sin daukamna, naha tempelka man nani ra maikri na baha damikam nani ra yabri ba, man nani bahara kasak lukisma ba.

¹⁵ Man nani ra sin yang maiwan wina mai kangbi mai sakamna, muihkam nani Efraín kiamka nani ra pat kangbi sakri ba baku.’

Israel luhpia nani kasak lukras kan ba

¹⁶ “Jirimaya, man naha uplika nani tâwan aisi puram sunpara, tâwan kau ban aisi kapara. Ai taibi ai aisapara, kan yang mai walamna apia bamna.

¹⁷ ¿Witin nani Juda tawanka tara nani ra Jerusalem yabalka nani ra sin dîa dauki ba man kaikras sma ki?

¹⁸ Luhpia nani ba pauta wahbisa, aisika nani pauta ba mukisa, bara yaptika nani ba plawar ba akbi plitas nani daukisa, gâd mairin Kasbrika purara Kwinka ba ra yaia. Baha dauki mini prukisa, bahara wain prisantka yabisa, baha purkara sin, witin nani kakaira apia ba gâdka ra wain prisantka ba yabisa.

¹⁹ Sakuna witin nani bui yang ra kau mini prukaia watlika ra, witin nani kau ai mina prukisa bara klauna kau ai swira daukisa. Yang, Dawan, kasak aisisna.

²⁰ Bahamna, yang Dawan ba kasak mai wisni yang lawanki ba naha tawanka nani purara, uplika nani ba purara, daiwan nani ba purara, dus nani pâwi ba purara bara insla mâ nani dâki ba baha nani sut purara blikamna. Impiara ami ba baku ami ban dasras kabia.”

²¹ Karnika sut bri Dawanka, Israel Gâdka ba, ai uplika nani ra wisa: “Man nani wîna nani aiska angks, sakripais nani sin dauks, man nani brin mai dauki ba baku, bara baha wîna ba brih pis.

²² Sakuna man nani damikam nani ba Idsip wina sakri ba ra, wîna nani aiska angkaia sakripais wala nani daukaia wisi yang diara kumi sin wiras kapri.

²³ Yang bui witin nani ra wîri ba lika yang bîli wali kaia bara yang lika witin nani ai Gâdka kamna, baku witin nani sin yang upliki nani kabia. Bamna yang dîa aisari ba witin nani dîa daukaia wîri ba baku dauki kaia, diara yamni witin nani takaia mata.

²⁴ Sakuna witin nani bîli wali daukras, uni sin kahban daukras witin nani ba kiama karna takan, kupia lukanka ai saura brinka ra baman tniwan, bara baha mita brih wan. Yang ra kli tawi balaia watlika ra tawi ai kaikras mahka wan.

²⁵ Man nani damikam nani Idsip wina takan ba yua wina naiwa kat, prapitki nani duki dadaukra nani ba man nani ra kum blikri ba ninara wala nani bliki ban sna.

²⁶ Sakuna man nani bui yang bîli wali daukaia apia wiram, uni sin kahbras, almukkam nani ba wal man nani kau kiamam karna takan.

²⁷ “Jirimaya, man naha sturka nani na sut witin nani ra wis, man bîlam wali daukras sa sakuna; karna wini aisas, ban kra pana mampara aisaras kabia sin.

²⁸ Witin nani ra wis: ‘Naha nisanka sika ai Dawanka ai Gâdka bîla wali daukras ba, saura daukan smalki ba sin walan daukras ba. Kasak wapni aisaia aisinka ba witin nani aisinka wina âpu pali aihwa takan.’ ”

Gâdkas nani daukanka Jerusalem ra

²⁹ ¡Jerusalem uplika nani, tâmwa ba klaki lulks! ¡Kiuhsi nani diara pâwras ba ra wih sari taki lawana aiwans! Kan Dawan uplikam nani ra ai kupia baikan sa, witin nani ba tnaya ra laki lulki swisa.

³⁰ Dawan ba kasak aisisa: “Yang yamni kaikras sna, Juda uplika nani diara daukan ba: yang saura kaikisna aidulka ba witin nani bri yang tempelki ra brih wan bara waitla ba tâski daukan.

³¹ Witin nani ba Ben-hinom ilka bîla ra altar kum paskan nina ba Tófet, bahara ai luhpia waitna nani ai luhpia mairin nani angkaia, witin nani ra wiras kapri baha daukaia, yang lukanki ra sin baha daukaia lukanka âpu sa.

³² Bahamna yang, Dawan, baha kasak aisisni yua kum balbia bara baha pliska nina ba ban Tófet mâki kabia apia, Ben-hinom langnika ra sin apia, sakuna aisi kabia, Upla Iki Tikan langnika. Upla pruan nani ba Tófet ra bri si bikbia, plis wala âpu kabia bamna.

³³ Upla pruan wîna nani pi tnawira daiwra nani mita pibia, bara upla kumi sin âpu kabia daiwra nani ba munka plapbia.

³⁴ Yang daukamna Juda tawanka nani ba bara sin Jerusalem tawanka yabalka nani ra lilia dauki aiwananka ba, maya baiki lawana nani aiwani ba sut lap tiwaia; tasbaya aiska ba upla iwras tasbaya baku bîla man swimna.”