Jirimaya 6 - DAWAN BÎLA AISKA

Waihla nani bal Jerusalem ba kutban

¹ ¡Benjamín tasbaya ra iwi uplika nani, Jerusalem wina taki plaps, man nani yukuwaia watla pliks! Bara trumpit ba Tecoa ra puhs, bara sain kum Bet-haquérem ra dauks, diara saura kum, pât tara kum saura wan munaia aisi yahbra wina aula.

² Saion luhpia mairin ba sin twi tasbaya pranakira kum baku sa, baha ba sauhki tikan kabia,

³ sepad nani ba ai daknika nani wal anira auya; tnaya kir bâra takaski daknika kumi bani ba baha lamara twi pîsa.

⁴ Ai waihla nani ba aisisa: “¡Jerusalem mapara aiklabaia ridi taks! ¡Man nani bal, yu wan lal kat yawan aiklabaia! Sakuna, ¡sari pali!, pat tutni sa, tihmia pat aula.

⁵ ¡Bamna kaisa yawan tihmia ra aiklabaia bara tawerka nani ba slingbia!”

⁶ Karnika sut bri Dawanka ba win naku daukaia: “¡Man nani dus nani ba klaki baps, kainam kahbaika dauks Jerusalem mapara aiklabaia! Tawanka ba pât ra lakan sa klala yabia taiban lâka ni banhwan bamna.

⁷ Jerusalem wina sika watawika lâka urhwisa, liwanhta wina lî kârma kururwi ba baku. Lâ krikanka diara sauhkan sturka baman walisna; insauhkan nani ba latwan bri ba baman kaikisni.

⁸ Jerusalem, man mita wapnika dauks, apia kaka yang kupi sauhki man wina tnaya ra tawamna, upla iwras tasbaya ra mai lakamna, upla âpu bîla man mai swimni.”

Klala yabaia ba maisa pakisa

⁹ Karnika sut bri Dawanka ba aisisa: “Israel luhpia nani takaskuya ba witin nani bal plikbia bara kli pliki kabia, wain nasla ra awa nani tilara mâ nani kli kli pliki ba baku, kumi sin swibia piaia sut pali wahbia ba kat.”

¹⁰ Bara yang pana wîri: “¿Ya yang ra ai walbia, bara witin nani ra aisamna kaka, mai sauhkanka na witin nani ra wimna kaka? Witin nani ai kiama ba prakan sa, Dawan, witin nani sip walras sa; witin nani man aisisma ba lamwaska kikisa, aisisma ba witin nani yamni kulkras.

¹¹ Dawan, yang na man lawankam ni ai banhkram ba mita puri luan sa, kau alki takaskaia sip apia sni.” Dawan bui ai win: “Wahma nani yabal ra tauki ba purara laiks, tiara daknika nani ba purara laiks. Maya waitna nani bara maya mairin nani ba silak ra brih wabia, dama pali nani ba sin brih wabia.

¹² Watla nani ba, nasla nani ba, maya mairin nani ba upla wala nani bribia. Kan yang mihti bukamna baha kuntri ra iwi nani ba klala yabaia. Yang, Dawan, kasak aisisna.

¹³ “Tara nani bara sirpi nani ba, upla sut, saura dauki wina baman lalah briaia lukisa; prapit nani prîs nani sin sut, upla ra taibi lalahka dakbaia warkka daukisa.

¹⁴ Upliki nani insauhkanka nani ba taya purara ba baman kaikisa; aisisa diara sut ba pain baman sa, kuna kasakka ba sut saura man sa.

¹⁵ ¡Witin nani ai swira briaia kan baha dukia nani witin nani dauki ba yang kau sip kupi alki takaskras sna ba dukiara! Sakuna apia, witin nani ai swira lukras. ¡Witin nani ai swira ba dîa sapa tânka sin briras takan! Baha mita, yang bui witin nani ra klala yabamna ba ra, witin nani ai mina pruki kauhbia wala nani kauhan ba baku. Yang, Dawan ba, aisisna.”

Israel ba Gâd mapara buisa

¹⁶ Dawan bui ai uplika nani ra wisa: “Man nani yabal kat bûi ba ra kaiks, blasi pali yabalka nani ba dukiara makabi wals, yabal kau yamni ba bâra sa; baha yabalka ra waps bara man nani ris brima.” Sakuna witin nani aisin: “Apia, apia, yang nani baha yabalka ra wapan ai daukras”

¹⁷ Dawan mita tawan ra aihwawakra nani ba swin, bara upla nani ra win: “Winanka daukuya binka ba man nani wals.” Sakuna upla nani ba win: “Apia, yang nani baha daukamna apia.”

¹⁸ Baha mita Dawan aisisa: “Nisan nani, man nani wals, kaiki tânka bris upliki nani ra dîa takbia ba.

¹⁹ Tasba, wals: Naha uplika nani ra sauhkaia ba bri balaisna watawika nani daukaia luki daukan ba mana; yang bîli nani aisin ba witin nani baha walras, yang smalkanki nani ba witin kau saura ni kulkan.

²⁰ ¿Dîa muni man nani Sabá wina kîa pain angkaia dukia nani ba bri sal aikisma, laih tasba wala wina dus wahia kîa pain nani bri balisma? Daiwan aiska angkisma ba yang yamni kaikras, sakripais wala nani daukisma ba sin.”

²¹ Baha mita, Dawan aisisa; “Naha uplika nani na ai mina pruki kauhaia daukaisna. Aisika nani, luhpia nani, lamara uplika prui nani ba sut, aikuki baku prui banhbia.”

Yahbra wina bal kutban ba

²² Dawan aisisa: “Laih pali yahbra tani tasbaya ba wina nisan karna pali kum ba balaia ridi takisa.

²³ Trisba nani bara sord nani brisa; witin nani lika upla ra umpira kaikras, saura rausauhkisa; winanka nani ba kabu binka tara baku sa, aras ra uli aula. Saion mapara aiklabaia ridi sa.”

²⁴ Jerusalem ra upla nani ba aisisa: “Baha sturka ba yang nani walri, bara sibrin mita karniki âpu takan sa; yang nani kupi wirha bara latwan pali wahwisna, mairin kum luhpa baikaia ba baku.

²⁵ ¡Man nani insla ra, yabalku sin wapara! ¡Waihlam nani ba bara aiklabaia dukia ba alki ridi sa; tnaya bani ra sirang wan ikaia ba bâra sa!”

²⁶ ¡Yang upliki nani, krukus prâka dimi sari tukinka ba; yamhpus ra aikarwi bas, kwala siksa dimi sari pali bri ini bas, luhpiam waitna kumi baman bri kapram pruan baku; kan wan sauhki tikaia uplika ba pat pali yawan ra balbia bamna!

²⁷ Dawan bui ai win: “Yang upliki nani ba wihtka mai mangkisna, tânka ba trai kaikaia. Tânka ba laki kaiks, daukanka ba nahki sapa.”

²⁸ Dawan, witin nani sut ba wan mapara babura atia sa; upla dusa kakuhbra nani bara watawikira atia; bras baku, ayan baku sa.

²⁹ Angkaia payaska puhbaika ba karna pali puhbisa, pauta klauhan ba mita lit ba slilkisa. Sakuna slaslilkra nani ba bahki pali wark takisa, tâskika ba sip angki sakras, watawikira nani ba sip âpu takras.

³⁰ Witin nani nina ba mâkan kaia sa “silbar saura pali takan”, Dawan, man bui witin nani ba lulki swiram bamna.