Jirimaya 52 - DAWAN BÎLA AISKA

Sedequías king aimakan ba

¹ Sedequías 21 mani bri kan king lâka ba brin, witin 11 mani Jerusalem ra king kan. Yaptika nina Hamutal, Jirimaya luhpia mairin, Libná tawanka wina kan.

² Sakuna witin ai daukanka nani Dawan nakra ra yamni apia kan, Joaquim daukan ba baku dauki kan.

³ Baha mita Dawan Jerusalem mapara bara Juda mapara ai kupia baikan, bara ai lama wina saki lulkan. Sedequías, Babilon kingka ba mapara buan ba ningkara.

Jerusalem kauhanka ba

⁴ Sedequías pat 9 mani king aimaki kan, baha manka ra kati matawalsip, yua matawalsip ra, Nabucodonosor aiklaklabra nani sut aikuki Jerusalem mapara balan, bara tawan ba kutban. Jerusalem lama kat aiklabaia watla nani ba mâkan baha wina aiklabaia.

⁵ Bara witin nani bâra ban kan Sedequías sin king ban kan mani 11 alkan ba kat.

⁶ Baha manka ra kati walhwal, yua 9 aimakan ba kat tawan ba plun âpu takan, upla nani plun piaia âpu kan.

⁷ Caldea uplika nani tawan ba kutbi bri kan, sakuna witin nani tawan kutbanka walpaya bâk unta kum daukan, bara king, suldiar nani ba aikuki tihmia ra bahak taki wan. Bara king giadinka yabalka bâk wan tawan kutbanka wâl ba lilak get bâk lui, Jordan ra waia ilka bîla yabalka ba ra aimakan.

⁸ Sakuna Caldea uplika nani suldiarka nani ba king Sedequías nina blikan, bara Jeriko tasbaya langnika ba kat Sedequías ba alkan, bara Sedequías suldiarka nani ba sut witin ba swih plapan.

⁹ Caldea uplika nani witin ba alkan bara Babilon kingka Riblá ra bâra kan, bara bahara brih wan Hamat tasbaya ra. Bahara Nabucodonosor, Sedequías mapara lâ daukan.

¹⁰ Sedequías kaiki kan luhpia waitna nani ba nana dakbi ikan, Juda wihtka tara nani ba sin baku ikan.

¹¹ Bara Sedequías lika nakra nani ba daiki priski Babilon ra brih wabia win, bara bahara witin silak ra kan pruan ba kat.

Tempel ba sauhkan sa

¹² Nabucodonosor Babilon kingka pat 19 mani king kan baha manka ra kati matsip, yua matawalsip yua ra, Nebuzaradán, king warkka nani pura kakaira king watla ra aihwakra nani kamandantika ba, Jerusalem ra wan,

¹³ tempel ba angkan, king watla ba bara tawan ra utla nani ba, baku sin upla tara nani watla sin angkan,

¹⁴ bara Caldea suldiarka nani witin wal balan nani ba mita Jerusalem kutbanka ba batakan.

¹⁵ Baha ningkara upla nani kau bâra kan ba, wala nani Babilon kingka ra tniwan nani ba, diara papaskra nani ba Nabucodonosor mita Babilon ra brih wan.

¹⁶ Upla nani kau umpira nani ba baman tasbaya ra swin baha nani wain nasla nani tasbaya langnika ba ra dauki kaia.

¹⁷ Caldea uplika nani ba mita bras ni paskan dukia nani tempel ra kan ba sut krikan: utla playka nani ba, playka karnika alki nani ba, lî watla tara ba, braska nani ba sut Babilon ra brih wan.

¹⁸ Naha diara wala nani na sin brih wan: yamhpus auhbaika nani ba, subil nani ba, diara nani klin daukan dukia nani ba, kâp tara nani ba, ispan tara nani ba bara diara watla paskan pura sunra dauki yus muni dukia nani kan ba sut kwahkan.

¹⁹ Baha nani daukan ba baku sin, aihwawakra nani kamandantika ba sin, gul ni, silbar ni paskan dukia nani ba sut brih wan: bisin nani ba, pauta aswan auhbaika nani ba, kâp tara nani ba, yamhpus auhbaika nani ba, wain laiki kahbaika kapka tara nani ba.

²⁰ Baha playka tara wâl ba sika lî watla tarka tara pali ba playka nani ba, bîp wainhka 12 lilka bras ni paski playka ba daukan, baha playka tara wâl ba karnika alki kan, baha sika Salaman mita win tempel ra paskan, laya watla wirhika ba wan wiras sa.

²¹ Baha playka tara nani ba yarika, yahpika ba wâlsut ba kumi baku kan kau, wibia kaka kumi bani ba yarika ba 27 pît pura, bara yahpika sin 18 pît tnaya bani ra; playka nani ba untra kan bara bras ni paskan twaknika ba 3 ins.

²² Playka nani kumi bani ba tâura pîs wala prakaika daukan kan, baha pîska ba 7 pît bri kan, bara bras slilki dus mâ apil sâtka bahmuna paski baha ni skahkan. Playka wâl ba wal sim sât kan.

²³ Playka kumi bani ba prana daukaia baha dus mâ sâtka ba bras ni handat kum paskan, bara baha mâ nani 96 ba tasba wina kaiki kan.

Ju nani ba priski tasba wala ra brih wan

²⁴ Suldiar nani kamandantika Nebuzaradán mita Seraías prîs tara ba sin priskan, Sofonías sin pat prîs warkka ra aimakaia kan ba witin ba sin priskan, bara kau wala nani tempel warkka dauki ba wina sin yumhpa.

²⁵ Tawan uplika nani ba tila wina aiklaklabra nani ra adar yabi kan suldiar nani wihtka ba silak ra mangkan, king watla ra wark taki nani waitnika 7, tawan ra tauki ba sin alkan, war aiklaklabra nani wihtka upla alki tauki kan ba sin alkan, bara upla kulkanka tara bri nani ba sin 60 alkan tawan bîla kat.

^26-27 Nebuzaradán naha uplika nani sut ba Babilon kingka ra brih wan Riblá ra, baha lika Hamat tasbaya ra. Bara Riblá kat Babilon kingka lâ ba dauki uplika nani ba bâra ikan. Baku dauki, Juda uplika nani ba priski tasba wala ra brih wan.

²⁸ Nabucodonosor upla nani priski brih wan kulkanka ba naku kan: witin pat 7 mani king kata ba piua ra 3,023 upla nani Juda wina brih wan;

²⁹ kli 18 mani king aimaki kata piua ra 832 upla nani Jerusalem wina brih wan;

³⁰ baha wina kli 23 mani king aimaki kata ba piua ra kli Nebuzaradán mita 745 upla nani Juda wina brih wan, bara sut ba kulkan 4,600 upla nani witin priski brih wan.

Babilon ra Joaquín ba pri sakan

³¹ Joaquín Juda kingka ba priski brih wan yua ba wina kulkan ba ra, baha manka ra kati 12, yu 25 aimakan kat 37 mani alkan. Baha pali manka ra Evil-merodac ba Babilon kingka mangkan, bara witin ai kupia yamnika ba Joaquín ra marikan silak watla wina sakan,

³² bara king wala nani Babilon ra bâra kan ba tilara witin ba baha nani wihtka mangkan, baku Joaquín ra kau yamni munan.

³³ Baku daukan ba mita, Joaquín silak watla ra dimi kan prâka ba daikaia sans brin, bara king lamara iwi piaia, witin kau raya kan yua nani ba sut.

³⁴ Yu bani Babilon king ba Joaquín main kaiki kan, witin pruan ba kat.