Jirimaya 50 - DAWAN BÎLA AISKA

Babilon kauhan ba

¹ Dawan naha bîla nani Jirimaya ra aisin, Caldea uplika nani ra wibia Babilon ra takaia ba dahra nani:

² “Nisan nani ra maisa paks, naha tânka witin nani briaia. Maisa pakanka tukinka ba purara buks; diara kumi sin yukukpara. Man nani wis: ‘¡Babilon kata pat brin! ¡Bara gâdka Bel kata ba lawaska kikaia ra lakan, Marduc gâdka kata ba, sibrin tara ra sa! Aidulka nani, gâdka bahki nani ba, lawaska kikaia ra tawan bara sibrin tara ra sa.’

³ Yahbra wina nisan kum witin mapara kitwi aula bara kuntrika ba diara âpu bîla man daukbia. Upla nani, daiwan nani, diara kumi sin bahara takaski kabia apia, sakuna sut plapi laihura wabia.”

Israel luhpia nani kli tawi balan ba

⁴ Dawan aisisa: “Baha yua ra, Israel bara Juda uplika nani ba yang ra balbia ai Dawanka ai Gâdka ai pliki ini kabia.

⁵ Saion ra waia yabalka ba makabi walbia, bara naku aisi baha tani ra wabia: ‘Kaisa Dawan ra yawan waia, lâ kum daukbia witin wal asla ban kaia lâka, kli sin wan âuya tikaia apia.’

⁶ Yang upliki nani ba sîp nani tiwan baku kan, sepadka nani mita saura tapahkan, swin il nani ra wih aimawahkaia. Il kum wina il wala ra wan, ai klarka nani kata ba sin ban âuya tiwan.

⁷ Waihla nani ba witin nani wal prawan bara pin, ningkara aisin: ‘Yang nani pât apia, kan witin nani ai Dawanka mapara saura daukan, ai pata piaia bri kan ai damika nani bîla kaikanka ba.’

⁸ “¡Babilon, Caldea uplika nani tawanka ba wina man nani plaps! ¡Dakni ba tâura man nani pas tâ bri plaps!

⁹ Yang daukaisna upla karna dakni kum yahbra wina balaia baha nani sin baha piua ra bal Babilon wal aiklabia. Witin nani ai yabalka pain wapni dauki bal aiklabi pura lubia. Aiklaklabra âuya mâira nani, witin nani trisba kumi sin bahki ra lulkras.

¹⁰ Caldea uplika nani dukia ba sut dakbi bribia; witin nani baha dukia nani ba ailal bribia ba kat. Yang, Dawan, kasak aisisna.

Babilon batakan ba

¹¹ “Caldea uplika nani, man nani bal yang upliki nani diara bri kan ba sut briram ba, ¡bara liliam dauks, pi, di, dimi! ¡Bîp mairin twi kura ra pih srutwi baku srutwi banhs! ¡Aras nani srutwi ihbi baku dauks!

¹² Sakuna man nani tasbayam bara tawankam pali ba sin swira daukan prâka dimbia. Nisan nani kulkanka tilara mâyara pali kama, tasba lâwan bîla man, diara âpu daukan.

¹³ Yang kupi baikamna bara upla kumi sin bâra swimna apia, upla bahara iwras pali tasbaya takbia. Upla nani bahak lui kabia ba tâ iwan tara taki kabia baku klala brin ba kaiki.

¹⁴ “¡Pantamangka lalulkra nani, Babilon kir kutbi lulkaia ridi taks! ¡Trisbaya nani ba sut witin mapara lulks, maipara saura daukan, Dawan mapara!

¹⁵ ¡Man nani tnaya bani ra war aiklabaia winanka ba dauks! ¡Babilon ai waihla mihta ra pat aimakuya! Tawer nani ba kauhan, tawanka kutbanka nani ba sasakban. ¡Baha sika yang pana munaisna ba: man nani sin pana muns! ¡Witin ra pana muns witin nani mita munan ba baku!

¹⁶ Man nani upla kumi sin Babilon ra swipara, saumuk mangkaia, apia kra dâkaia sin. Aiklabi sasauhkra ba kaikbia ba ra tringsar nani ba sut ai tasbaya ra tawi wabia, kumi bani ai tasbaya ra waia taki plapbia.

Israel kli tawi balbia

¹⁷ “Israel ba sîp tiwan kum baku sa, layan nani mita nina blikisa. Asiria kingka pas bal alki pin; baha wina, Nabucodonosor Babilon kingka ba mita alki pin bara dusa nani ba arban.

¹⁸ Baha mita, yang, Dawan karnika sut brisna, Israel Gâdka mai wisna: Babilon kingka ba kuntrika ra sin klala yabaisna, Asiria kingka ra munri ba baku.

¹⁹ Israel ba ai tasbaya ra kli waia daukamna, sîp kum Carmelo, Basán, Efraín ilka nani tilara, Galaad ra ai pata ailal pali piaia bri ba baku.

²⁰ Yang, Dawan ba, kasak aisisni: Baha piua ra Israel, Juda tilara pâtka kulki saurka nani ba âpu kabia, kan yang bui witin nani pâtka swih tikamna bara raya kaia swimna.

Babilon batakan ba

²¹ “¡Man nani Merataim uplika nani mapara aiklas bara Pecod uplika nani mapara sin! ¡Nina blîks, iki âpu dauks! ¡Dîa daukaia mai wisna ba kat sut dauks! Yang, Dawan, baku daukaia adar maikisna.”

²² Kuntrika ba ra war aiklabi binka tara ba walisa, diara ailal sauhki tiki ba.

²³ ¡Babilon ba, tasba aiska amarka kan, nanara lika kriwan, yuya lupia baman takan! ¡Babilon ra baku takan ba nisan nani mita aihka saura kaikisa!

²⁴ Babilon, man sika klauna minam alkaika ba paskram, bara damra walras kli bahara kauhram, daiwan ra alki baku mai alkan, kan man Dawan mapara buram bamna.

²⁵ Dawan bui witin war aiklabaia dukia nani bri kan durka ba sakan, ai kupia baiwan ra aiklabaia dukia ba sakan, kan Dawan, karnika sut bri ba, wark kum aiska daukaia brisa Caldea uplika nani nisanka ba wal.

²⁶ ¡Tnaya bani wina bal aiklas! ¡Pata watla nani durka ba param sâks! ¡Upla sut bal dihbi bri sauhki tiks! ¡Upla kumi sin raya kabiara!

²⁷ ¡Suldiar nani ba sut iki tiks, sut ikaia watla ra blîks! ¡Saura pali witin nani ra! ¡Witin nani yua ba balan, klala aiklabaia yua ba!

²⁸ (Babilon wina plapi swak takan nani ba Saion ra wan bara sturi aisin, Dawan yawan wan Gâdka nahki Babilon nani ra daukan ba ai tempelka sauhkan ba tâwan, dîa pana munaia kan ba kat munan dahra ba.)

²⁹ “¡Pantamangka lalukra nani sut paiws, witin nani Babilon wal aiklabaia! ¡Tawan tara ba kir kutbi banhs, upla kumi sin plapi takaia apia! ¡Witin nani ra aibaps ai mana dîa briaia ba! ¡Witin nani dîa daukan ba baku witin ra dauks! Witin bui yang ra ai kulkras aisin, Dawan ra, Israel Gâdka holikira ba.

³⁰ Bahamna wahma nani ba yabal ra prui prawi kabia, aiklaklabra nani ba sin baha yua ba sut ikan kabia. Yang, Dawan, kasak aisisna.”

³¹ Dawan karnika sut bri ba aisisa: “Maipara saura aisasara nisanka, yang mampara sna; yua ba balan, klala maikaia yua.

³² Maipara saura aisasara nisanka, minam pruki kauhma, mai alki mai bukaia upla âpu kabia. Tawan nani ba sut angkamna, baha pata klauhan ba ni tawan wala lamara nani ba sin sut angkbia.”

³³ Dawan karnika sut bri ba aisisa: “Israel luhpia nani ba bara Juda uplika nani ba sin, rausasauhkra nani mita saura muni pâtka ba wahwisa. Witin nani ba silak ra mangkan sa bara sakaia want apia sa.

³⁴ Sakuna witin ra swaki sasakra ba sip pali sa, ai nina ba Dawan karnika sut brisa. Kasakka lâka ba witin mita daukbia; kupia kumi lâka ba ai uplika nani kuntrika ra yabia, bara sirang tara iwaia ba Babilon uplika nani ra yabia.”

³⁵ Dawan aisisa: “¡War ba Babilon purara uplika nani purara sa! ¡Wihta nani bara sinskira nani ba purara!

³⁶ ¡War ba diara kakaira nani purara sa: witin nani tanis takaia!

³⁷ ¡War ba suldiar nani purara sa: sibrin mita tatatwaia! ¡War ba araska nani purara sa, waginka nani purara sin! ¡War ba mana aibapan suldiar nani purara sa: witin nani mairin baku swapni lakaia! ¡War ba diara nani bri ba purara sa: wala nani bal implikaia!

³⁸ ¡War awala nani purara sa: lî nani ba lâwbia! Babilon ra sika aidul aihka saura nani banhwan sa, witin nani bahara kulki bara sinska ba lap tiwan.

³⁹ “Baha mita Babilon ba limi kruhbu nani, suksuk tara nani watla takbia, sip pâlras tara nani bâra kabia. Ban mani handat nani lui kabia, bahara upla nani kli iwbia apia.

⁴⁰ Sodoma ra, Gomora ra, bara tawanka nani lamara kan ba sut sauhkan ba baku, witin ra sin takbia. Upla baha tasbaya nani ra kli iwbia apia, baha lamak sin wapi lui kabia apia. Yang, Dawan, kasak aisisna.

⁴¹ “Laih pali yahbra tani tasbaya nani wina, nisan karna pali kum king nani ailal balaia ridi takisa.

⁴² Trisbaya nani langsa nani brisa; upla krakraka nani, upla ra umpira kaikras, winanka nani ba baku bin tara dauki baku sa, aras nani ra uli impakisa. Witin nani ridi pali sa Babilon mapara aiklabaia.

⁴³ Babilon kingka ba baha sturka walan ba ra, sibrin mita wîna aiska srimisa, sari bri sibrin daukisa mairin luhpa baikaia latwan bri ba baku sa.

⁴⁴ “Yang kakalni balamni, Jordan awala unta tila wina layan kum taki aula ba baku, witin bal taki auya twi kura sangni baman pâwi ba tasbaya kat, Babilon uplika nani ba munrika baha wina plapbia, bara yang bâk sakuna uplika ba yarka, bahara wihta aimakbia. Bamna, ¿ya yang wal ai prakaia sip sa? ¿Ya bal yang maiwanra buaia sip sa? ¿Ani sepadka ba yang maiwanra bal bapi buaia sip sa?

⁴⁵ Man nani wals, yang Dawan, Babilon mapara dîa daukaia ridi takri ba; dîa Caldea uplika nani mapara daukaia luki kaikri ba: Sîp kau sirpi nani ba sin brih wabia, twi langnika nani ba sin sauhkan kabia.

⁴⁶ Babilon kauhanka ba bin tara takbia, tasba ba tatatbia, winanka ba nisan nani sut walbia.”