Jirimaya 5 - DAWAN BÎLA AISKA

Jerusalem uplika nani saura daukan ba

¹ Dawan ba naku aisisa: “Man nani Jerusalem yabalka aiska plapi taws, pulaia pliska nani ba ra pliki pain laki kaiks, upla kasakka lâka kat dauki ba kum man nani wal prawma sapa, witin kunin luha kaia luki ba. Man nani ba witin wal prawma kaka, yang bui Jerusalem pâtka ban swih tikamna.

² Upla ailal bâra sa Dawan nina ra aisi swer takisa, sakuna witin nani kunin man aisisa.”

³ Dawan, man plikisma ba sika kunin aisaras uplika ba. Man bui witin nani ra klala yabram, sakuna baha witin nani ra latwan yaras kan; man bui witin nani ba sauhkram, sakuna witin nani diara lan takras. Kiamapara nani, walpa baku karna, yabal yamni ba ra witin nani kli tawi balaia apia lukan.

⁴ Yang luki kapri: Upla umpira nani ba baman diara tanis daukisa, Dawan dîa brin dauki ba witin nani tânka briras ba mita, Gâd adarka nani ba sin kaikras ba mita.

⁵ Bara yang wîri upla diara tânka bri nani ba wal aisamni. Witin nani lika, namhpa namhpa lukras kira, Dawan dîa brin dauki ba Gâd adarka nani ba tânka bribia. Sakuna witin nani sut sin Gâd mapara buan, bîla wali daukaia apia win.

⁶ Baha tâka mita layan nani taki bal witin nani ba ikbia, upla iwras tasbaya wina yul wail nani bal drusbia, bara limi bulni nani mita sin ai tawanka bîla kat dimi witin nani takbia bara alki aubi kalkbia; witin nani sika saurka ailal pali daukan bamna, aima ailal upla pât ra lakan.

⁷ Dawan naku aisisa: “¿Naha pâtka nani sut na nahki ban swih tikamna? Man luhpiam nani ba lulki ai swin, bara gâd apia nani ba mayunisa. Yang bui witin nani ra plun ailal pali yabri, sakuna witin nani lika yang wal wapni apia kan, witin nani sut aiska ba ur tatakra takan.

⁸ Aras wainhka nani ai mairka pliki ihbi tauki ba baku, witin nani ai uplika mairka kaiki ihbi taukisa.

⁹ ¿Witin nani baha daukan ba yang klala yabaia apia sna ki? Tawan kum uplika nani witin nani dîa daukan ba, ¿yang bui witin nani ra baha praiska kat mana yabaia apia sna ki?

¹⁰ ¡Bamna ai waihla nani ba bal nasla ra dimi wain kiwka nani ba palkbia, sut pali sauhki tikras kabia kra! ¡Tnawa nani ba krikbia, kan yang wainki nasla apia takan bamna!

¹¹ ¡Israel Juda wal yang maipara buan! Yang, Dawan, kasak aisisna.”

Klala yabia maisa pakisa

¹² Israel Juda wal Dawan ba ai Dawanka briaia apia win; witin nani aisin: “Gâd ra baha tâwan wan kulkbia apia win. Bamna diara saura wan mapara takbia apia, war bara plun wahwan sin yawan ra balbia apia.”

^13-14 Prapit nani ba lika pâsa baman sa, witin nani Dawan wal aisaras. Bamna baha pain, naha bîla na Dawan, Gâd karnika sut bri ba ai win: “Witin nani baha bîla nani aisin ba tâka mita, naha diara witin nani ra takbia: Bîli aisinka nani ba man bîlam ra pauta klauhi baku kaia daukamna, bara naha uplika nani lika pauta baikan baku kabia, bara baha pata klauhan ba mita angki âpu tikbia.”

¹⁵ Dawan ba kasak aisisa: “Israel, yang bui man mampara upla kwâra tara kum laih wina bri balaisna, upla karna patitara uplika nani. Witin nani aisi bîla ba man kakaira apia, witin nani aisi ba man tânka briras.

¹⁶ Witin nani ba aiklaklabra tahplu nani, aiklabaia dukia nani bri ba tânka sika prura.

¹⁷ Namsla dâkisma patam mâ ba witin nani pibia, luhpiam waitna nani luhpiam mairin nani ba sin pih âpu daukbia. Sîpkam nani ba, bîpkam nani ba, wain nasla nani, kwah damni dusa nani brisma ba pibia. Aiklabaia dukia nani bri ba ni tawankam karna nani kutbanka ba bahara kasak lukisma ba sut sauhki tikbia.”

¹⁸ Dawan ba kasak aisisa: “Ban sakuna, baha yua, witin nani sut ba âpu pali daukamna apia.

¹⁹ Witin nani man ra mamkabi walbia: ‘Dawan wan Gâdka ba, ¿dîa muni naku pali wan daukan?’, bara man bui witin nani ra pana wis: ‘Man nani kakaira apia gâdka nani ra mayunram ba, baha baku tasbayam ra apia, sakuna upla wala tasbaya ra baha nani warkka takma.’

Israel lawi dauki smalkan ba

²⁰ “Israel, Juda wal kingka tasbaya uplika nani ra maisa paki wis:

²¹ ‘Tanis lamla karna takan uplika, man nani naha wals, namkra brisma sakuna kaikras, kiamam brisma sakuna walras sma ba.

²² Yang Dawan sna ba, naku wisni: ¿Dîa man nani bui yang ra sip si briras sma ki? ¿Dîa man nani maiwanra sip tatatras sma ki? Kabu un kir tawan ba baku sika yang mita kabu piarkika ba mangkri, ripka tara nani karna âpu tilwisa bara bin tara daukisa, sakuna piarkika ba wina luras sa.

²³ Man nani sika kupiam karna brisma bara maipara babura sma; ai briras ai swi si mahka waram.

²⁴ Kupiam wal aisi kaikras bara naku sin aisaras: Dawan wan Gâdka ra kulkanka ba yabaia, bara witin mita piua kat lî auhaia bara lî sikwaia nani piua ba wankbia, mâ nani dâkaia piua ba sin piua kat wankbia.

²⁵ Sakuna man nani saurkam tâka ba mita baha piua nani sut aihka man lakan, bara baha yamnika ba man nani sip briras sma.

²⁶ Kan upla saura nani yang upliki nani tilara bâra sa tnawira âialkra nani kahbi tauki ba baku sa, mina alkaika nani mangkisa, wala nani ba alkaia dukiara.

²⁷ Witin nani ai watla ba implikan dukia nani ni banhkisa, piawira nani ailal alki watla ra auhbi ba baku, witin nani baku dauki ai karnika manis brih yuyakira takan,

²⁸ witin nani plun pain pîsa ba mita batana sa. Ba mita watawika lâka nani dauki ba takaskras: rau nani ra raitka yaras, umpira nani ra sin raitka yaras.

²⁹ ¿Baha daukanka nani ba tâwan klala yabaia apia katna ki? ¿Baha uplika nani baku daukan mana ba kli yabaia apia sna ki? Yang, Dawan, kasak aisisna.

³⁰ ‘Diara saura, sirang wan iki ba, naha tasbaya ra takisa.

³¹ ¡Prapit nani aisi ba lika kunin baman; prîs nani ba ai brinka kat lâ nani daukisa, bara yang upliki nani ba baha lâka ba want sa! Sakuna, ¿baha piua ba lubia bara man nani dîa daukma ki?’ ”