Jirimaya 49 - DAWAN BÎLA AISKA

Amón uplika nani ra takaia dahra aisin ba

¹ Amón uplika nani ra wiaia Dawan aisin bîla ba: “¿Israel luhpia nani ba anira sa? ¿Witin nani prapati briaia nani ba anira sa? ¿Dîa muni Milcom gâdka ba nanara Gad dawanka takan? ¿Dîa muni Amón uplika nani baha nani tawanka ra iwisa?

² “Bamna baha aitani, yang, Dawan ba, kasak aisisni: Baha yua balbia ba ra yang daukamna Rabá Amón uplika nani tawanka ba war aiklabi winanka ba walaia; slingwan nani paskanka tara kum takbia, upla nani ba pauta buki klahkla ra ambia. Bara Israel luhpia nani bal ai tawanka nani kli bribia. Yang, Dawan, kasak aisisna.

³ “¡Hesbón, mamna lulks, kan Ai ba pat slingban bamna! ¡Rabá wina mairka nani, puram mata ini banhs! ¡Man nani kwala siksa dims, lamam pruki banhs! ¡Grisi baku plapi banhs, wînam insauhki ban plapi bas! Kan gâd Milcom ba priski tasba wala ra brih auya, prîs nani sut upla tara kulkan nani ba sin.

⁴ ¿Dîa muni mamyunisma karnikam brisma wisi? Mapara babura nani, karnikam pat âpu takisma, diara nani kuki briram ba ra kasak lukisma bara aisisma: ‘¿Ya yang wal aiklabaia?’

⁵ Baha aitani, bamna tnamya bani wina sirang tara puramra blikamna. Yang, Dawan karnika sut brisna, kasak aisisni. Man nani kumi bani swakwaia yakan plapma, upla kumi sin âpu kabia kli asla mai daukaia.

⁶ Sakuna piua balbia yamniki nani ba Amón ra kli yabamna. Yang, Dawan, kasak aisisna.”

Edom uplika nani ra takaia dahra aisin ba

⁷ Edom uplika nani ra wiaia Dawan aisin bîla ba: “¿Temán ra sins lâka âpu takan ki? ¿Sinskira nani ba sip wiras ki witin nani dîa daukaia? ¿Sins lâka nani bri ba sut tiwan ki?

⁸ ¡Dedán uplika nani, taki plapi banhs, man nani yukuwaia was! Kan Isau uplika nani ba yang sauhkaia sna; witin nani ra klala yabaia yua ba aimakan.

⁹ Upla nani wain mâ dakbi ba ra, buns kumi pan swih auya; tihmia âimplikra nani aula bara dîa want ba baman alkuya.

¹⁰ Sakuna Isau diara bri kan ba sut yang âpu pali daukri, yukuwaika nani ba pura baikri, nanara kli sip yukuwi kabia apia. Ai luhpia nani, ai taya nani, ai lamara iwi nani ba, sut âpu daukan; upla kumi sin raya apia kan aisaia:

¹¹ ‘Raukam nani ba yang laimara swis, yang main kaiki kamna. Piarkikam nani ba yang ra tniwaia sip sa.’ ”

¹² Dawan aisisa: “Baha wala nani ba, pât wauhbia kapka ba diara ai dukia apia kan, sakuna ban din kaka, yabal wala âpu sa, bamna man klala briaia sma, man sin baha wina diaia sma.

¹³ Yang, Dawan, nini ra swer takisna: Bosrá tawanka tara ba upla iwras tasbaya daukbia, slingban kabia, swira paskan bara lahtuban kabia upla nakra ra, bara tawan wala nani ba slingban ban kabia.”

¹⁴ Maisi pakanka kum Dawan wina yang ra balan; maisa papakra ba nisan nani tilara aisi taukisa: “¡Man nani asla taks, Edom mapara wapi was! ¡Man nani aiklabaia ridi taks!

¹⁵ Tawan nani tilara man ba kau sirpi lupia mai daukamna, upla nani tilara kau saura mai kaikaia.

¹⁶ Kupiam prautka mita kunin mai munan, upla ra sirang tara ikaia daukisma. Walpa tara nani untika ra dimisma, il nani bahna ra sin bâra sma. Yakal tara baku wamtla bahara mâki kama sin, baha wina mâyara mai batakamna. Yang, Dawan, kasak aisisna.

¹⁷ “Edom sauhkanka ba tara pali kabia, baha wina sirang wan ikaia takbia. Upla nani sut bahak lui kabia ba witin nani klala brin ba kaiki sirang iwi kabia,

¹⁸ witin nani ra sin Sodoma, Gomora wal, lamara tawanka nani kan bara sauhki tikan ba, baku takbia. Upla kli bahara iwbia apia, bahak wapi sin lui kabia apia. Yang, Dawan, aisisna.

¹⁹ Yang kakalni balamni, Jordan awala ra unta tila wina layan kum taki aula ba baku, witin bal taki auya inta wahia pâwi ba tasbaya kat, Edom uplika nani ba munrika baha wina plapbia, ban sakuna uplika ba yarka bahara wihta aimakbia. Bamna, ¿ya yang wal prakaia sip sma? ¿Ya bal yang, maiwanra buaia sip sa? ¿Ani sepadka ba yang maiwanra bal bapi buaia sip sa?

²⁰ Man nani wals, yang Dawan, Edom mapara dîa daukaia ridi daukri ba, dîa atia Temán mapara daukaia luki kaikri ba: Sîpka kau sirpi nani ba sin brih wabia, twi langnika nani ba sin sauhkan kabia.

²¹ Edom kauhanka ba bin tara takbia, tasba ba tatatbia; hilp makabi wini kabia, inanka binka ba Kabu Pauni kat wali kabia.

²² Waihla ba Bosrá mapara yakal tara ai tnawa ilingki aula ba baku balbia, baha yua Edom aiklaklabra nani ba mairin luhpa baikaia tatatwi ba baku tatatwi kabia.”

Damaskus uplika nani ra takaia dahra aisin ba

²³ Damaskus uplika nani ra wiaia bîla ba: “Hamat, Arpad tawanka nani ba swira daukan sa, sturi saura ba witin nani walan bamna. Sibrin tara daukisa, witin nani sip sâp apia sa.

²⁴ Damaskus, pat karnika âpu takan, plapaia ridi sa. Sibrin mita witin ra taiban, kupia wirha takan, pât nani taiban, mairin luhpa baikaia ba baku sa.

²⁵ Tawan tara nina purara kulki ba, âuyapah tawanka tara ba, nanara lulki swin sa.

²⁶ Baha yua wahma nani ba yabal ra prawi kabia, aiklaklabra nani bri ba sut pruan kabia. Yang, Dawan ba karnika sut brisna, kasak aisisni.

²⁷ Damaskus kutbanka ba yang angkamna, bara baha pata klauhanka ba mita Ben-hadad watla tara nani ba angki sauhkbia.”

Quedar bara Hasor wal mapara diara takaia dahra aisin ba

²⁸ Quedar kiamka nani ra Hasor ra wihta nani ra wiaia Dawan aisin bîla nani ba, baha uplika nani ba sika Babilon kingka Nabucodonosor mita aiklaban ra pura luan ba: “¡Kainamra waps, Quedar nani wal aiklas! ¡Lalma tani ra iwi kiamka nani ba rausauhks!

²⁹ Watla nani ba bris bara daiwra nani ba sin, kwala nani paman ba diara watla nani ba sin. Kiamilka ba bris bara puram wins: ‘¡Sibrin tara tnamya kir bâra sa!’

³⁰ ¡Hasor ra iwi uplika nani, taki plaps! ¡Wih yukuwi banhs! Yang, Dawan, naha mai wisna. Nabucodonosor, Babilon kingka ba, man nani mampara balaia pat luki kaikan sa.

³¹ Yang, Dawan, man nani ra mai wisna: ¡Kainamra waps, baha uplika nani trabil âpu ai âuyapah ba wal aiklas, get nani âpu, prakaika sin âpu, yakan pali iwi ba mapara!

³² ¡Kiamilka nani, daiwra nani ba brih was! Baha uplika nani ai tâwa irbi klaki ba yabal sât sât ra waia yakaban sa; tnaya bani wina pât bri sal sauhkaia sna. Yang, Dawan, kasak aisisna.

³³ Hasor ra kli upla iwbia apia, suksuk tara nani watla takbia. Upla kli bahara takaskbia apia, bahak sin wapi lui kabia apia.”

Elam uplika nani ra takaia dahra aisin ba

³⁴ Sedequías, Juda kingka mangkan ba piua ra, Dawan Jirimaya ra naha bîla nani na aisin Elam uplika nani ra wiaia:

³⁵ “Yang, Dawan karnika sut brisna, kasak aisisni: Elam uplika nani pantamangka bri ba krikaisna, baha pali ba ni sika aiklabi ba.

³⁶ Tâ walhwal wina baha uplika nani mapara pâsa bri balaisna, ai yukuwaika pliki kuntri nani sut ani anira waia daukaisna.

³⁷ Yang daukaisna Elam uplika nani ba witin nani ra ikaia aula ba mapara tatatwi kaia, witin nani ra sauhki tikaia blikamna, witin nani ra war blikamna bara sauhki âpu daukamni. Yang, Dawan, kasak aisisna.

³⁸ Yang iwaiki ba Elam ra kabia, bara ai kingka nani wihta nani ba sut pruaia daukamna. Yang, Dawan, kasak aisisna.

³⁹ Sakuna naika Elam ba kli sât wala takbia yamniki nani yabamna ba ra, Yang, Dawan, kasak aisisna.”