Jirimaya 48 - DAWAN BÎLA AISKA

Moab uplika nani mapara takaia dahra aisin ba

¹ Dawan karnika sut bri ba, Israel Gâdka, witin aisin, Moab ra diara nani takbia ba win: “¡Nebo tawanka umpira, sauhkan bâra ba! ¡Quiriataim ba alkan mâyara ikan! ¡Ai kan kahbaika pliska ba slingbi tasba kat batakan!

² Moab prana ba sut âpu daukan. Waihla nani ba Hesbón ra aisi kaikan nahki daukaia, Moab nisanka ba tikaia. Madmén, man sin mai sauhkbia aiklabanka ba ninam bliki ban kabia.

³ Horonaim wina taki winbia: ‘¡Aisawan bara sauhkan tara sin!’

⁴ “Moab ba sauhkan sa, latwan brin inanka nani ba Sóar kat walisa.

⁵ Luhit yabalka bâk ai nakra laya saki ai kanra wapisa; diara sauhkan ba luki sari bri witin nani ba Horonaim wina iwi aula.

⁶ ¡Man nani plaps! ¡Ya swakwaia sip sma ba swakwi taks! ¡Upla iwras tasbaya ra kiaya pâwi ba baku takbia!

⁷ “Moab, man karnikam ra diara ailal brisma ba ra kasak luki kapram, sakuna man ra sin bal puram lubia. Man gâdkam Quemós tasba wala brih wabia, prîska nani, uplika tara nani kulkan ba sut.

⁸ Tawan tara nani sut ba sauhki tikan kabia, kumi sin swak takbia apia; il bîla ba langnika nani ba sut sauhkan kabia. Yang, Dawan, kasak aisisna.

⁹ Moab ba sauhki tikaisa bara baha luki walpaya swis, sauhki tikan kabia bamna; tawanka tara nani ba slingban kabia bara upla bâra takaski kabia apia.”

¹⁰ (¡Baha uplika Dawan ai warkka daukaia yan ba liliakira daukras ba saura pali kabia! ¡Saura pali kabia baha uplika ra upla iki nani ba tilara dimi ikras ba!)

¹¹ Moab ba piu sut ai kupia kumi iwisa, priski tasba wala ra brih waras sa. Wain laiki swin bâra ba baku sa, batil kum wina batil wala ra laikras, baha mita kîa ba damnika ba aiska ban sa.

¹² Sakuna Dawan baha kasak aisisa: “Nanara baha yua ba aula, upla nani blikamna baha wainka ba batil wala nani ra laikaia, bara batilka bîla man takuya kriki yuya man daukbia.

¹³ Bara Moab ai dara walbia ai gâdka Quemós ba tâwan sika witin ra impliki bîla kaikanka âpu dauki ba, Israel sin daukan Betel ra baman kasak luki kan ba tâwan witin ra impliki bîla kaikanka âpu daukan.

¹⁴ “Moab aisabiara: ‘Yang nani tahplu nani, aiklaklabra nani karna sna.’

¹⁵ Moab bara tawanka nani sasauhkra ba pat aula; wahmika kau painkira nani ba prubia. King ba kasak aisisa, witin ai nina ba sika Dawan karnika sut bri ba.

¹⁶ Moab ba sauhki tikaia lamara sa, saura pali munan kaia ba pat baila sa.

¹⁷ Moab lamara iwi banhwisma ba, witin sturka wawalra sma ba, man nani lika witin pura mata ini naku wis: ‘¡Man nani kaiks ai kingka lâka ba slingwan, karna pali, pranakira kata ba!’

¹⁸ “Dibón tawanka tara, mai kulki iwaika ba wina mâyara bal iws, tasba lâwan pali ba ra iws, kan Moab sasauhkra mampara itwi aula, wamtla karna nani ba pat slingban sa.

¹⁹ Aroer tawanka uplika nani, yabal tnaya ra bri bâra kaiki bas; dîa takan ba pruras nani ba ra makabi wals.

²⁰ Moab ba mâyara batakan sa, sibrin tara brisa. ¡Man nani sari bri witin pura mata ins! ¡Arnón awala bâk aisi was Moab ba sauhki tikan!”

²¹ Tasba langni ra iwi tawanka nani ba klala yabaia lâka daukan ba piua balan: Holón, Jahas, Mefáat,

²² Dibón, Nebo, Bet-diblataim,

²³ Quiriataim, Bet-gamul, Bet-meón,

²⁴ Queriot, Bosrá, baha tawanka nani lamara ba, bara laihura nani ba sut.

²⁵ Dawan kasak aisisa: “Moab karnika ba krikan, karnika ba slingban.”

²⁶ Man nani Moab ba yas bla takbia, kan Dawan mapara buan ba tâwan. Baku bamna Moab ba witin aikabi baha ra karwi kabia bara upla sut witin ai lawaska kikbia.

²⁷ Moab, ¿Israel ba âimplikra kum baku, saura kaiki kabia piua bani ra lawaska kiki kapram apia?

²⁸ Moab uplika nani, tawankam nani swih plaps; butku nani baku, walpa tara nani ra iwaia was, walpa unta ra wamtla mâks.

²⁹ Yang nani kaikisna Moab lukisa witin baman tara sa: ai prautka lâka ba, pura luaia lâka bri ba, witin baman daiwi takisa.

³⁰ Dawan sin kaikisa witin bui upla wala ra kulkras ba, aimayuni upla wala mapara saura aisi ba.

³¹ Baha mita Moab uplika nani sut sarka bri inamni, pura mata inamna, Quir-heres uplika sarka sin inamna.

³² Sibmá wainka nasla, puram mata inamna, Jazer uplika nani pura mata inan ba purkara. Wainkam awa ba lalami kabu purak lui Jazer kat wan. Sakuna nanara wain mâ nani ba sauhkan sa.

³³ Moab giadinka nani ra lilia lâka winanka ba kli walras sa. Wain nani apahki swin ba sut âpu takan. Wain taibaia uplika nani sin âpu, lilia aiwananka nani sin aiwanras.

³⁴ Hesbón uplika sari bri winisa, inanka nani ba Elalé, Jahas kat walisa, Sóar wina Horonaim kat sin bara Eglat-selisiya ra sin walisa, Nimrim lî kârma nani ba sin lâwan sa.

³⁵ Dawan ba kasak aisisa: “Moab uplika nani ba yang mita sauhkamna, idan nani ninara wih kiuhsi nani ra utla mâkisa, baha gâdka nani ra sakripais dauki kîa pain nani angki yabisa.”

³⁶ Baha mita Moab pura mata yang kupi ai mamna lulkisa, Quir-heres uplika nani pura mata sin upla bikaia plutka puhbi ba baku, witin nani diara ailal kukan ba âpu daukan.

³⁷ Tâwa nani sut irban, unmaya sin klakan; mihta nani ba sut insauhkan bara krukus prâka nani dimisa.

³⁸ “Moab utla bahna latara iwaia pliska bani ra, tawan yabalka nani sut ra upla ini yahwi ba walisa, kan Moab ba kriki pîs lupia daukri bamna, lî watla saura kan krikan baku. Yang, Dawan, kasak aisisna.”

³⁹ ¡Man nani Moab pura mata ini banhs! ¡Sibrin tara daukisa! Swira tara takan ai nina tawi wan ai lamara iwi nani ba sut nakra ya pain apia, saura kaikisa.

⁴⁰ Dawan aisisa: “Moab waihla yakal tara ai tnawa nani ilingki aula ba baku mapara aula.

⁴¹ Tawan tara nani bara kan kahbaika pliska nani sin waihla nani bal bribia. Baha yua Moab ra aiklaklabra nani ba mairin luhpa baiki tatatwi ba baku kabia.

⁴² Moab nisanka ba tiwbia, kasak maipara buan, Dawan mapara buan bamna.

⁴³ Baha mita, yang, Dawan ba, kasak aisisna: Antin tatakra nani daiwan nani nina bliki baku Moab uplika nani nina bliki kabia, apia kaka unta ra kauhaia, apia kra ai mina alkaika pâtka ra dimaia.

⁴⁴ Antin tatakra nani mita alkras kabia ba unta ra kauhbia, unta wina bal takbia ba mina alkaika ra mina alkbia, Moab uplika nani ra klala yabaia piua ba yang bri balamna. Yang, Dawan, kasak aisisna.

⁴⁵ “Tila ba karnika âpu taki yukuwaia watla pliki Hesbón ra waia plapisa; sakuna Hesbón, Sihón kingka tawanka ba sin nanara pauta buki klauhisa, pata klauhan ba Moab ilka nani ba sut angkisa, bin saura dadaukra uplika nani ba.

⁴⁶ ¡Moab, man ra saura pali kabia! ¡Quemós uplika nani, man nani tiwram! ¡Luhpiam waitna nani, luhpia ra mairin nani priski tasba wala ra brih auya!

⁴⁷ Sakuna baha ningkara yang kli lakamna Moab ba kli yamnika briaia; yang, Dawan, kasak aisisna.” Naha sika Dawan mita Juda mapara lâ daukan ba.