Jirimaya 47 - DAWAN BÎLA AISKA

Filisteo nani mapara diara takaia ba dahra aisin

¹ Naha bîla nani na sika Dawan Jirimaya ra aisin filisteo nani dukiara, king fero, Gaza ra aiklabaia kau waras kau ba kainara:

² “Yang Dawan sna ba, naku wisni: Yahbra wina lisamra tara kum aula, awala purak laiwi ba baku; tasbaya aiska ra diara bâra ba sut lî dingkbia, tawan tara nani ba, bahara iwi nani ba sut, kuntri ra upla nani ba wini banhwisa, witin nani latwan bri alai inisa.

³ Aras nani plapi ba walbia, wagin nani taya binka ba wilwaika nani pruki ba binka sin, aisika nani karnika âpu takbia, ai luhpia nani ba lulki swibia.

⁴ Filisteo nani ba âpu daukaia aikan bamna, witin nani Tiro, Sidón wina dakbi sakaia hilpka nani briaia ba takaskbia.” Âu, filisteo nani ba Dawan mita sauhkbia, witin nani Creta wina balan ba.

⁵ Gaza uplika nani ai tâwa irbia, Ascalón uplika nani sip aisaras takbia. Blasi upla tarka tara nani kan ba wiria takaskan nani, ¿ahkia kat man tamya ra klaki ban kama sari brisma tukinka ba?

⁶ ¡Alai, Dawan sordka ra! ¿Ahkia kat man takaskaisma? ¡Sord, tamya ra kli dims, bâra bas, sâp bas!

⁷ ¿Sakuna witin nahki sâp kabia Dawan mita wark daukaia adar yaban kaka? Witin aiklabaia adarka yan Ascalón bara kabu un aiska ba wal.